ଭୁବନେଶ୍ୱର,୧୮/୧୧: ଏଣିକି ଭୁବନେଶ୍ୱର ଏମ୍ସ ପାଖରେ ଥିବା ଦୁଇଟି ଆହାର କେନ୍ଦ୍ରରେ ରାତିରେ ଖାଦ୍ୟ ମିଳିବ । ରୋଗୀ ସହାୟକମାନେ ସୁଲଭ ମୂଲ୍ୟରେ ସୁଷମ ଖାଦ୍ୟ ପାଇପାରିବେ । ରାତିବେଳା ଦୁଇଟିଯାକ ଆହାର କେନ୍ଦ୍ରରେ ଚାରି ଶହ ଲେଖାଏଁ ମିଲ୍ସ ପ୍ରସ୍ତୁତ କରାଯିବ । ମେୟର ସୁଲୋଚନା ଦାସ ଶୁକ୍ରବାର ଏହି ରାତ୍ରଭୋଜନ ବ୍ୟବସ୍ଥାକୁ ଉଦ୍ଘାଟନ କରିଛନ୍ତି ।
ଆହାର କେନ୍ଦ୍ରରେ ସ୍ୱଳ୍ପ ମୂଲ୍ୟରେ ସୁଷମ ଖାଦ୍ୟ ଦେଇ କ୍ଷୁଧାର୍ତ୍ତଙ୍କ ଭୋକ ମେଣ୍ଟାଇବାକୁ ବିଏମ୍ସି ପ୍ରୟାସ ଚଳାଇଛି । ଏବେ ୫ଟି ଆହାର କେନ୍ଦ୍ର ବିଭିନ୍ନ ପ୍ରମୁଖ ହସ୍ପିଟାଲ ପାଖରେ ରହିଛି । ଏମ୍ସ ପାଖରେ ଥିବା ୨ଟି ଆହାର କେନ୍ଦ୍ରରେ ଦୈନିକ ୭୫୦ ଲୋକ ଖାଉଛନ୍ତି । ରାତ୍ରଭୋଜନ ବ୍ୟବସ୍ଥା ଯୋଗୁ ରାଜ୍ୟ ଓ ରାଜ୍ୟ ବାହାର ରୋଗୀ ସହାୟକମାନେ ବେଶ୍ ଉପକୃତ ହେବେ ବୋଲି ବିଏମସି ମେୟର ଶ୍ରୀମତୀ ଦାସ କହିଛନ୍ତି । ଏବେ ରାଜଧାନୀରେ ମୋଟ ୧୧ଟି ଆହାର କେନ୍ଦ୍ର ଚାଲିଛି । ୩ଟି କେନ୍ଦ୍ରରେ ରାତ୍ରଭୋଜନ ବ୍ୟବସ୍ଥା ଥିଲା ।ଏବେ ଆଉ ଦୁଇଟି ଆହାର କେନ୍ଦ୍ରରେ ଏହା ଆରମ୍ଭ ହୋଇଛି । ଆଗକୁ ବରମୁଣ୍ଡାରେ ନବନିର୍ମିତ ଆନ୍ତଃରାଜ୍ୟ ବସଷ୍ଟାଣ୍ଡ ପାଖରେ ଆହାର କେନ୍ଦ୍ର ଖୋଲିବ । ଏହି ଆହାର କେନ୍ଦ୍ର ସମ୍ପୂର୍ଣ୍ଣ ଶୀତତାପ ନିୟନ୍ତ୍ରିତ ହେବ । ଏଠାରେ ପ୍ରତିଦିନ ୨ ହଜାରରୁ ଅଧିକ ଲୋକ ଖାଇବା ଭଳି ବ୍ୟବସ୍ଥା ହେବ ।
ଏହି କାର୍ଯ୍ୟକ୍ରମରେ କର୍ପୋରେଟର ବିରଞ୍ଚି ନାରାୟଣ ମହାସୂପକାର ଓ ସ୍ଥାନୀୟ କର୍ପୋରେଟର ରଶ୍ମୀ ରଞ୍ଜନ ପାଟ୍ଟଶାଣୀ ଓ ଡେପୁଟି କମିଶନର ପ୍ରିୟଙ୍କା ମଲ୍ଲିକ ଉପସ୍ଥିତ ଥିଲେ ।
