କେନ୍ଦୁଝର ୨୪/୦୬: କେନ୍ଦୁଝର ସହରରେ ୨୭ ବର୍ଷ ବ୍ୟବଧାନରେ ମୁଖ୍ୟମନ୍ତ୍ରୀ ସଦର ମହକୁମାରେ ରାତ୍ରୀଯାପନ  କରିଥିବା ସୂଚନା ମିଳିଛି। ପୂର୍ବରୁ କଂଗ୍ରେସ ସରକାର କ୍ଷମତାରେ  ଥିବା ବେଳେ  ୧୯୯୭ ମସିହାରେ  ତେଲକୋଇରେ ଏକ ଜିଲ୍ଲା ପରିଷଦ  ନିର୍ବାଚନ ପାଇଁ ପ୍ରଚାର ଆସିଥିବା ତତ୍କାଳୀନ ମୁଖ୍ୟମନ୍ତ୍ରୀ  ଜାନକୀ ବଲ୍ଲଭ  ପଟ୍ଟନାୟକ ସାନଘାଗରା  ଜଙ୍ଗଲ ବିଭାଗ ଅତିଥି  ଭବନରେ ରହିଥିଲେ । ଏହାପୂର୍ବରୁ ବିଜୁ ପଟ୍ଟନାୟକ ମୁଖ୍ୟମନ୍ତ୍ରୀ ଥିବା ବେଳେ ୧୯୯୨  ମସିହାରେ ଏକ ସରକାରୀ  କାର୍ଯ୍ୟକ୍ରମରେ କେନ୍ଦୁଝର ସର୍କିଟ  ହାଉସରେ ରାତ୍ରିଯାପନ କରିଥିଲେ । ଏବେ ଏହି ୨ ଲୋକପ୍ରିୟ  ମୁଖ୍ୟମନ୍ତ୍ରୀ ପରେ ତୃତୀୟ ମୁଖ୍ୟମନ୍ତ୍ରୀ ଭାବେ ମୋହନ ଚରଣ ମାଝୀ କେନ୍ଦୁଝରରେ ରାତ୍ରିଯାପନ କରିଛନ୍ତି ।    

ଲୋକପ୍ରିୟତାରେ ମୋହନ ଢ଼େର୍‌ ଆଗରେ ରହିଥିବା  ଚର୍ଚ୍ଚା ହେଉଛି । ଅତି ସାଧାରଣ ସ୍ତରରୁ ମୁଖ୍ୟମନ୍ତ୍ରୀ  ଆସନରେ ବସିଥିବା ଶ୍ରୀ ମାଝୀ ଲୋକ ସମ୍ପର୍କକୁ ଅଧିକ  ଗୁରୁତ୍ୱ ଦେଉଛନ୍ତି । ଯେତେ ବ୍ୟସ୍ତ ରହିଥିଲେ ମଧ୍ୟ  ତାଙ୍କୁ ଦେଖା କରିବାକୁ ଅପେକ୍ଷା କରିଥିବା ସାଧାରଣ ଜନତାଙ୍କୁ ଭେଟିବା ଓ ଅଭିଯୋଗପତ୍ର ଗ୍ରହଣ କରି  ହସିକରି ଦୁଇପଦ କଥା ହେଉଥିବାରୁ ବିଜୁ ବାବୁଙ୍କ  ପରେ ତାଙ୍କ ନାମ ରହିବ ବୋଲି ସବୁଠି ଚର୍ଚ୍ଚା ହେଉଛି ।  ରବିବାର ସେ କେନ୍ଦୁଝର ସର୍କିଟ୍‌ ହାଉସକୁ ଦିନ ପ୍ରାୟ  ଅଢ଼େଇଟାରେ ପହଞ୍ଚିବା ସମୟରେ ଭୋକ ଲାଗୁଥିଲେ  ମଧ୍ୟ ପ୍ରୋଟକୋଲ୍‌କୁ ଭାଙ୍ଗି ଲୋକଙ୍କୁ ଭେଟି ହାତ  ମିଳାଇବା ଓ ଫୋଟ ଉଠାଇବା ଘଟଣା ମୁଖ୍ୟମନ୍ତ୍ରୀ  ମୋହନଙ୍କୁ ଅଧିକ ଲୋକପ୍ରିୟ କରିଛି ।