ବ୍ରହ୍ମପୁର, ୦୮/୧୦ : ଗଞ୍ଜାମ ଜିଲ୍ଲା କୁକୁଡ଼ାଖଣ୍ଡି ବ୍ଲକ କାର୍ଯ୍ୟାଳୟ ଆଗରେ ଆତ୍ମହତ୍ୟା ଉଦ୍ୟମ କରିଥିବା ଯୁବତୀଙ୍କ ମୃତ୍ୟୁ। ସୋମବାର ଯୁବତୀ ଜଣଙ୍କ ବ୍ଲକ ସମ୍ମୁଖରେ ନିଜ ଦେହରେ କିରୋସିନ ଢାଳି ନିଆଁ ଲଗାଇ ଦେଇଥିଲେ। ସେଠାରେ ଉପସ୍ଥିତ ଥିବା ସ୍ଥାନୀୟ ଲୋକେ ଯୁବତୀଙ୍କୁ ଉଦ୍ଧାର କରି MKCGରେ ଭର୍ତ୍ତି କରିଥିଲେ। ମଙ୍ଗଳବାର ସକାଳେ ଚିକିତ୍ସାଧିନ ଅବସ୍ଥାରେ ଯୁବତୀଙ୍କ ମୃତ୍ୟୁ ଘଟିଛି। ତେବେ ଯୁବତୀ ଜଣଙ୍କ କାହିଁକି ନିଜ ଦେହରେ ନିଆଁ ଲଗାଇ ଆତ୍ମହତ୍ୟା କଲେ ତାର କାରଣ ଜଣା ପଡ଼ିନାହିଁ। ଘରୋଇ କଳି ପାଇଁ ଆତ୍ମହତ୍ୟା କରିବାକୁ ଉଦ୍ୟମ କରିଥିବା ସନ୍ଦେହ କରାଯାଉଛି। ପୋଲିସ ଯୁବତୀଙ୍କ ବାପାଙ୍କୁ ଅଟକ ରଖି ପଚରାଉଚୁରା କରୁଛି।
ସୂଚନା ଥାଉକି, ବ୍ରହ୍ମପୁର ଆମ୍ବପୁଆର ରାଣୀ ପ୍ରଧାନ ବାପାଙ୍କ ସହ କୁକୁଡ଼ାଖଣ୍ଡିରେ ରହୁଥିଲେ। ସେ ବ୍ରହ୍ମପୁରର ଏକ ମହିଳା ମହାବିଦ୍ୟାଳୟରେ ଯୁକ୍ତ ୩ ଶେଷବର୍ଷର ଛାତ୍ରୀ । ତାଙ୍କ ମାଆଙ୍କ ବହୁ ବର୍ଷ ହେଲା ମୃତ୍ୟୁ ହୋଇଥିବା ବେଳେ ବାପା ଦ୍ୱିତୀୟ ବିବାହ କରିଛନ୍ତି । ବାପାଙ୍କ ସହ ତାଙ୍କର ବେଳେବେଳେ ଝଗଡ଼ା ହେଉଥିଲା । ସୋମବାର ସନ୍ଧ୍ୟାରେ ବାପା ଗାଳି କରିବାରୁ ସେ ନିଜ ଦେହରେ କିରୋସିନ ଠାଳି ନିଆଁ ଲଗାଇ ଦେଇଥିଲେ। ହୁତୁହୁତୁ ଜଳୁଥିବା ଅବସ୍ଥାରେ ସେ ଘରୁ ବାହାରକୁ ଦୌଡ଼ି ଆସିଥିଲେ । ତାଙ୍କୁ ସ୍ଥାନୀୟ ଲୋକ ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରିଥିଲେ। ରାଣୀଙ୍କ ଶରୀର ୭୦ ଭାଗରୁ ଅଧିକ ଜଳିଯାଇଥିଲା। ମଙ୍ଗଳବାର ସକାଳେ ଚିକିତ୍ସାଧିନ ଅବସ୍ଥାରେ ଯୁବତୀଙ୍କ ମୃତ୍ୟୁ ଘଟିଛି। ପୋଲିସ ଯୁବତୀଙ୍କ ବାପାଙ୍କୁ ଅଟକ ରଖି ପଚରାଉଚୁରା କରୁଛି।