ବିନିକା, ୨୯।୭: ଯୌତୁକ ନିର୍ଯାତନା ଦେଇ ହତ୍ୟା କରିଥିବା ଅଭିଯୋଗ କଲେ ପରିବାର । ସୁବର୍ଣ୍ଣପୁର ଜିଲ୍ଲା ବିନିକା ଥାନା ଗଡ଼ଗଡ଼ବାହାଲ ଗ୍ରାମର ପୁଷ୍ପାଞ୍ଜଳି ଜାଲଙ୍କୁ ଯୌତୁକ ନିର୍ଯାତନା ଦେଇଥିବା ଅଭିଯୋଗ ହୋଇଛି । ପୁଷ୍ପାଞ୍ଜଳି ଜାଲଙ୍କ ସ୍ଵାମୀଙ୍କ କହିବା ଅନୁସାରେ, ଘରେ କେହି ନ ଥିବା ସମୟରେ ପୁଷ୍ପାଞ୍ଜଳି ଦଉଡ଼ି ଦେଇ ଘର ଛାତରେ ଆତ୍ମହତ୍ୟା କରିଛନ୍ତି । ପୁଷ୍ପାଞ୍ଜଳି ଜାଲଙ୍କ ସ୍ୱାମୀ ତାଙ୍କ ବାଡ଼ିରେ କାମ କରୁଥିବା ସମୟରେ ପରିବାର ଲୋକେ ଖବର ଦେବା ପରେ ତୁରନ୍ତ ଘରକୁ ଦୌଡ଼ି ଆସିଥିଲେ । ଆସି ଦେଖିବା ପରେ ପୁଷ୍ପାଞ୍ଜଳି ଜାଲ ନିଜ ବେକରେ ଦଉଡ଼ି ଲଗାଇ ଘର ଛାତରେ ଝୁଲୁଥିବା ଦେଖିବାକୁ ପାଇଥିଲେ । 

ସ୍ତ୍ରୀକୁ ଝୁଲୁଥିବା ଦେଖି ସ୍ଵାମୀ ଛାତରେ ଲାଗିଥିବା ଦଉଡ଼ି କାଟି ତାଙ୍କୁ ତୁରନ୍ତ ବିନିକା ଡାକ୍ତରଖାନାକୁ ଆଣିଥିଲେ । ପରେ ପୁଷ୍ପାଞ୍ଜଳିଙ୍କ ବାପଘର ଲୋକଙ୍କୁ ସ୍ୱାମୀ ଘଟଣାକୁ ନେଇ ଖବର ଦେଇଥିଲେ । ତେବେ ବିନିକା ଡାକ୍ତରଖାନାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଝିଆରୀକୁ ଯୌତୁକ ପାଇଁ ପୂର୍ବରୁ ଘରେ ସବୁବେଳେ ଗାଳିଗୁଲଜ ହୋଇଆସୁଥିବା ପୁଷ୍ପାଞ୍ଜଳିଙ୍କ କାକା ନନ୍ଦଳାଲ ଥପ୍ପା କହିଛନ୍ତି । ଏହା ଆତ୍ମାହତ୍ୟା ନୁହେଁ ହତ୍ୟା ବୋଲି ବିନିକା ଥାନାରେ ଲିଖିତ ଅଭିଯୋଗ ଆଣିଛନ୍ତି । ବିନିକା ଡାକ୍ତରଖାନାରେ ପୁଷ୍ପାଞ୍ଜଳି ଜାଲଙ୍କ ମୃତଦେହକୁ ପୋଲିସ ଜବତ କରି ଘଟଣାର ତଦନ୍ତ କରୁଥିବା ଜଣାପଡ଼ିଛି । ବିନିକା ପୋଲିସ ଶବକୁ ଜବତ କରି ଶବ ବ୍ୟବଚ୍ଛେଦ ପାଇଁ ପଠାଇବା ସହ ଘଟଣା ସମ୍ପର୍କରେ ଅନୁସନ୍ଧାନ ଚଳାଇଛି ।