ବୌଦ୍ଧ,୨୭/୪ : ରାସ୍ତା ମଝିରେ ଯୁବ ବ୍ୟବସାୟୀଙ୍କୁ ନିର୍ମମ ଭାବେ ହତ୍ୟା କଲେ ଦୁର୍ବୃତ୍ତ। ଛାତିରେ ଛୁରୀ ଭୁସି ହତ୍ୟା ହତ୍ୟା କରି ଘଟଣାସ୍ଥଳରୁ ଦୁର୍ବୃତ୍ତମାନେ ଫେରାର ହୋଇଯାଇଥିବା ଜଣାପଡ଼ିଛି। ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିବାବେଳେ ସ୍ଥାନୀୟ ଲୋକେ ରାସ୍ତା ଅବରୋଧ କରିଛନ୍ତି । ସେପଟେ ଘଟଣାସ୍ଥଳରେ ଆଦର୍ଶ ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡିଛି ।
ସୂଚନା ଅନୁଯାୟୀ ବୌଦ୍ଧ ସହରର ଯୁବ ବ୍ୟବସାୟୀ କେ ମୁନା ପାତ୍ର ଜଣଙ୍କ ସହ ଉପକଣ୍ଠ ଜଗଦୀଶପୁର ଛକ ନିକଟରେ ଥିବା ନିଜ ଗୋଦାମ ଘରକୁ ବ୍ୟବସାୟ ସାମଗ୍ରୀ ରଖିବାକୁ ଯାଇଥିଲେ । ସେଠାରେ କିଛି ଯୁବକଙ୍କ ସହ ବଚସା ହୋଇଥିବା ସୂଚନା ମିଳିଛି । ତେବେ ବଚସା ହେବା ପରେ ସମସ୍ତେ ରାସ୍ତା ଉପରକୁ ଆସିଥିଲେ । ପରେ ଛକ ରାସ୍ତା ଉପରେ ହଠାତ୍ ବ୍ୟବସାୟୀଙ୍କୁ ଅତର୍କିତ ଭାବେ ଛାତିରେ ଛୁରୀ ଭୁସି ଦୁର୍ବୃତ୍ତମାନେ ଏକ ସ୍କୁଟିରେ ଫେରାର ମାରିଥିବା ସ୍ଥାନୀୟ ଅଞ୍ଚଳରେ ଆଲୋଚନା ହେଉଥିବା ଜଣାପଡ଼ିଛି । ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି ଏବଂ ଉତ୍ୟକ୍ତ ଲୋକଙ୍କ ଦ୍ୱାରା ବାଇପାସ୍ ରାସ୍ତାକୁ ଅବରୋଧ କରାଯାଇଥିବାବେଳେ ଉଭୟ ପାର୍ଶ୍ଵରେ ଶହ ଶହ ଯାନବାହନ ଅଟକି ରହିଛି। ତେବେ ବ୍ୟବସାୟୀଙ୍କଠାରୁ ଟଙ୍କା ଲୁଟ କରିବା ଯୋଗୁଁ ଏହି ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଉଥିବାବେଳେ ଖବରପାଇ ଘଟଣାସ୍ଥଳରେ ଆଦର୍ଶ ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି। ସେପଟେ ଉତ୍ୟକ୍ତ ଲୋକଙ୍କୁ ବୁଝାସୁଝା ଜାରି ରଖିଥିବାବେଳେ ସହରରେ ପାଟ୍ରୋଲିଂ ବ୍ୟବସ୍ଥା ଢିଲାକୁ ନେଇ ସ୍ଥାନୀୟ ଲୋକେ ଉତ୍ୟକ୍ତ ହୋଇ ଉକ୍ତ ବାଇପାସ୍ ରାସ୍ତା ଅବରୋଧ କରିଛନ୍ତି।
