ଲକ୍ଷ୍ନୌ: ପହଲଗାମ ଆତଙ୍କବାଦୀ ଆକ୍ରମଣ ଘଟଣାକୁ ନେଇ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ବଡ଼ ବୟାନ ଦେଇଛନ୍ତି । ସେ କହିଛନ୍ତି ଯେ, ପହଲଗାମ ଆକ୍ରମଣ ଉପରେ ସରକାରଙ୍କୁ ବଡ଼ ପଦକ୍ଷେପ ନେବା ଉଚିତ । ଆମେ ସରକାରଙ୍କ ସହିତ ଅଛୁ। ବର୍ତ୍ତମାନ ସୀମାରେ ସୈନିକଙ୍କ ଆବଶ୍ୟକତା ରହିଛି। ପାକିସ୍ତାନ ଏବଂ ଚୀନ୍ ଉଭୟ ଆମ ପାଇଁ ଚ୍ୟାଲେଞ୍ଜ । ଅଖିଳେଶ କହିଛନ୍ତି, ଆମେ ଯଦି ପିଓକେ(ପାକିସ୍ତାନ ଅଧୀକୃତ କାଶ୍ମୀର) ଆଡ଼କୁ ଦେଖିବା ତେବେ ଆମକୁ ଚୀନ୍ ସହ ମୁକାବିଲା କରିବାକୁ ପଡ଼ିବ ।
ଅଖିଳେଶ ଆହୁରି କହିଛନ୍ତି ଯେ, ଆମେ ଖୋଲା ମଞ୍ଚରେ ରାଣା ସାଙ୍ଗାଙ୍କ ପ୍ରସଙ୍ଗରେ କଥାବାର୍ତ୍ତା କରିବାକୁ ପ୍ରସ୍ତୁତ। କିନ୍ତୁ କାଶ୍ମୀରରେ ୨୪ଟି ଆସନ ଖାଲି ଅଛି। ଏଠାରେ ବୁଲୁଥିବା ଏହି ସେନା (କରଣୀ ସେନା) ସେଠାକୁ ଯାଇ ନିର୍ବାଚନ ପରିଚାଳନା କରିବା ଉଚିତ। ଏସ୍ ପି ମୁଖ୍ୟ କହିଛନ୍ତି ଯେ, ପ୍ରଶ୍ନ ଏହା ନୁହେଁ ଯେ ମୁଁ କାହା ଘରକୁ ଯାଉଛି ଏବଂ କାହା ଘରକୁ ଯିବି ନାହିଁ। ପ୍ରଶ୍ନ ହେଉଛି ଆତଙ୍କବାଦୀମାନେ ଆମ ଘରେ କିପରି ପ୍ରବେଶ କଲେ ?
ଦିଲ୍ଲୀରୁ ଏହା ଉପରେ ପ୍ରଶ୍ନ ଉଠାଇ ସରକାର ଧ୍ୟାନ ହଟାଇବାକୁ ଚାହୁଁଛନ୍ତି । ଶହୀଦଙ୍କ ପରିବାର ସରକାରଙ୍କ ସାଂସଦ ଏବଂ ମନ୍ତ୍ରୀଙ୍କ ଉପରେ ସେମାନଙ୍କର ଅସନ୍ତୋଷ ପ୍ରକାଶ କରୁଛନ୍ତି । ଦେଢ଼ ଘଣ୍ଟା ପର୍ଯ୍ୟନ୍ତ କେହି ମୃତକଙ୍କ ବିଷୟରେ ପଚାରିବାକୁ ଆସିନଥିଲେ । ହସ୍ପିଟାଲରେ ପୀଡିତମାନଙ୍କୁ ଦେଖିବାକୁ କେହି ଗଲେ ନାହିଁ। ଆମେ ବିଶ୍ୱନେତା ବୋଲି ଦାବି କରୁଛୁ। ଯେଉଁମାନେ ଏକ ଧର୍ମନିରପେକ୍ଷ ଏବଂ ସମାଜବାଦୀ ଦେଶ ଗଠନ କରିବାକୁ ଚାହୁଁଥିଲେ, ସେମାନେ ସାମ୍ପ୍ରଦାୟିକ ହୋଇଗଲେ । ତାଙ୍କର ସମ୍ପୂର୍ଣ୍ଣ ଗୋଷ୍ଠୀ ବ୍ରିଟିଶମାନଙ୍କ ଦ୍ୱାରା ତିଆରି ଫର୍ମୁଲା ଉପରେ କାମ କରୁଛନ୍ତି ବୋଲି ଅଖିଳେଶ ଅଭିଯୋଗ କରିଛନ୍ତି ।
ପହଲଗାମ ଆତଙ୍କବାଦୀ ଆକ୍ରମଣକୁ ଅଖିଳେଶ ଯାଦବ ଦୃଢ଼ ନିନ୍ଦା କରିଛନ୍ତି । ସେ ଏହାକୁ ସୁରକ୍ଷା ତ୍ରୁଟି ଏବଂ ଗୁଇନ୍ଦା ବିଫଳତାର ପରିଣାମ ବୋଲି ବର୍ଣ୍ଣନା କରିଛନ୍ତି। ଏଥିସହିତ, କେନ୍ଦ୍ର ସରକାରଙ୍କ ନିକଟରେ କଠୋର କାର୍ଯ୍ୟାନୁଷ୍ଠାନ ଏବଂ ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା ପାଇଁ ଦାବି କରିଛନ୍ତ । ପୀଡିତ ପରିବାର ପାଇଁ ୧୦ କୋଟି ଟଙ୍କା କ୍ଷତିପୂରଣ ଏବଂ ସରକାରୀ ଚାକିରି ଦେବାକୁ ମଧ୍ୟ ଦାବି କରିଛନ୍ତି ଅଖିଳେଶ ଯାଦବ ।ସେପଟେ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିବା ନିଷ୍ପତ୍ତିକୁ ସମର୍ଥନ କରିଛନ୍ତି ଅଖିଳେଶ । ସୂଚନଯୋଗ୍ୟ, ପହଲଗାମ ଆତଙ୍କବାଦୀ ଆକ୍ରମଣରେ ୨୬ ଜଣ ପର୍ଯ୍ୟଟକଙ୍କ ମୃତ୍ୟୁ ହୋଇଥିଲା ଏବଂ ଅନେକ ଆହତ ହୋଇଥିଲେ। ଆକ୍ରମଣ ପରଠାରୁ ଜମ୍ମୁ-କାଶ୍ମୀରରେ ସେନା କାର୍ଯ୍ୟାନୁଷ୍ଠାନ ଜାରି ରହିଛି ।
