ନୂଆଦିଲ୍ଲୀ,୬।୭: ଚୀନ୍ ନିଜର ଦୂତାବାସ ଜରିଆରେ ଫ୍ରାନ୍ସର ଲଢୁଆ ବିମାନ ରାଫେଲ ଫାଇଟର ଜେଟ୍ ବିରୋଧରେ ଅପପ୍ରଚାର କରୁଛି। ଏନେଇ ଫ୍ରାନ୍ସ ସେନା ଓ ଗୁଇନ୍ଦା ଏଜେନ୍ସି ନିଜର ଏକ ରିପୋର୍ଟରେ ଖୁଲାସା କରିଛି। ବିଶେଷକରି ମେ ମାସରେ ଭାରତ ଏବଂ ପାକିସ୍ତାନ ମଧ୍ୟରେ ବିବାଦ ପରେ ଏହି ପ୍ରଚାର ବୃଦ୍ଧି ପାଇଛି। ଚୀନ୍ ତାର ଲଢ଼ୁଆ ବିମାନଗୁଡ଼ିକୁ ରାଫେଲ ଲଢ଼ୁଆ ବିମାନ ଅପେକ୍ଷା ଭଲ ବୋଲି ଉପସ୍ଥାପନ କରୁଛି।
ରିପୋର୍ଟ ଅନୁଯାୟୀ, ଚୀନ୍ ଦୂତାବାସରେ ନିଯୁକ୍ତ ପ୍ରତିରକ୍ଷା ଆଟାଚ୍ ବିଭିନ୍ନ ଦେଶକୁ ରାଫେଲ୍ ଲଢ଼ୁଆ ବିମାନ ନ କିଣିବାକୁ ଜୋର ଦେଉଛନ୍ତି।ବିଶେଷ ଭାବରେ ଇଣ୍ଡୋନେସିଆକୁ ମନାଇବା ପାଇଁ ଚେଷ୍ଟା କରାଯାଉଛି, ଯାହାକି ରାଫେଲ୍ ଜେଟ୍ କିଣିବା ବିଷୟରେ ବିଚାର କରୁଛି। କେବଳ ଏତିକି ନୁହେଁ, ଚୀନ୍ ତା’ର ଲଢ଼ୁଆ ବିମାନକୁ ପ୍ରୋତ୍ସାହିତ କରୁଛି ଏବଂ ବିଭିନ୍ନ ଦେଶକୁ ସେଗୁଡ଼ିକୁ କିଣିବା ପାଇଁ ଚାପ ପକାଉଛି।
ପହଲଗାମ୍ ଆତଙ୍କବାଦୀ ଆକ୍ରମଣ ପରେ, ମେ ମାସରେ ଭାରତ ଏବଂ ପାକିସ୍ତାନ ମଧ୍ୟରେ ଭୟଙ୍କର ଲଢେଇ ହୋଇଥିଲା, ଯେଉଁଥିରେ କ୍ଷେପଣାସ୍ତ୍ର ଏବଂ ଲଢ଼ୁଆ ବିମାନ ବ୍ୟବହାର କରାଯାଇଥିଲା। ସାମରିକ ବିଶେଷଜ୍ଞମାନେ ଏବେ ଜାଣିବାକୁ ଚେଷ୍ଟା କରୁଛନ୍ତି ଯେ ପାକିସ୍ତାନର ଚୀନ୍ ନିର୍ମିତ ଅସ୍ତ୍ରଶସ୍ତ୍ର, ବିଶେଷକରି ଲଢ଼ୁଆ ବିମାନ, ଭାରତର ଫରାସୀ ନିର୍ମିତ ରାଫେଲ୍ ଲଢ଼ୁଆ ବିମାନ ବିରୁଦ୍ଧରେ କିପରି ପ୍ରଦର୍ଶନ କରିଥିଲା। ପାକିସ୍ତାନ ଦାବି କରିଛି ସେ ତିନୋଟି ରାଫେଲ୍ ଜେଟ୍ ସମେତ ପାଞ୍ଚଟି ଭାରତୀୟ ଲଢ଼ୁଆ ବିମାନକୁ ଗୁଳି କରି ଖସାଇ ଦେଇଛି। ତଥାପି, ଫରାସୀ ବାୟୁସେନା ମୁଖ୍ୟ ଜେନେରାଲ ଜେରୋମ୍ ବେଲାଙ୍ଗର କହିଛନ୍ତି, ଭାରତ ସମ୍ଭବତଃ ତିନୋଟି ଲଢ଼ୁଆ ବିମାନ ହରାଇଛି, ଯେଉଁଥିରେ ଗୋଟିଏ ରାଫେଲ୍, ଗୋଟିଏ ସୁଖୋଇ ଏବଂ ଗୋଟିଏ ମିରାଜ ୨୦୦୦ଅନ୍ତର୍ଭୁକ୍ତ।
