ଗୁଣପୁର,୪/୯ : ଚଳନ୍ତା ବସରେ ଗୋଟିଏ ନବଜାତ ଶିଶୁ କନ୍ୟା ଜନ୍ମ ହୋଇଥିବା ଘଟଣା ବେସ୍ ଚର୍ଚ୍ଚାର ବିଷୟ ହୋଇଛି । ତେବେ ମାନବିକତା ଦୃଷ୍ଟି କୋଣରୁ ବସରେ ଥିବା କର୍ମଚାରୀ ଗୁଣପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଇଥିବା ସୂଚନା ମିଳିଛି । ସୂଚନାଯୋଗ୍ୟ ଯେ, ପାରଳାଖେମୁଣ୍ଡିରୁ ନବରଙ୍ଗପୁର ଯାଉଥିବା ଗୋଟିଏ ବସରେ ଜଣେ ଅନ୍ତସତ୍ଵା ଗୁଣପୁର ଅଭିମୁଖେ ଆସୁଥିବା ବେଳେ ସନ୍ଧ୍ୟା ସାଢେ ୭ଟାରେ ଗଜପତି ଜିଲ୍ଲା କାଶୀନଗର  ଠାରେ ବସରେ ହିଁ ପ୍ରସୂତି ହୋଇଥିବାବେଳେ କନ୍ୟା ସନ୍ତାନ ଜନ୍ମ ନେଇଥିବା ସୂଚନା ମିଳିଛି । 

ଘଟଣାକ୍ରମରେ ଏହି ବସରେ ବସିଥିବା ଗଜପତି ଜିଲ୍ଲା ଗୁରାଣ୍ଡି ସ୍ବାସ୍ଥ୍ୟକେନ୍ଦ୍ରର ଡଃ ଅରୁଣ ନାୟକ ଓ ଡଃ ଶୁନିତା ମଲିକଙ୍କ ସହାୟତାରେ ଏହି ପ୍ରସୂତି ପ୍ରକ୍ରିୟା ସୁରକ୍ଷିତ ଭାବେ ବସରେ ହୋଇଥିଲା । ସମ୍ବଲପୁରରୁ ଆସିଥିବା ଡଃ ନାୟକ ଓ ଜଗତସିଂହପୁରରୁ ଆସିଥିବା  ଡଃ ମଲିକ ଗୁରାଣ୍ଡିରେ ଚାକିରି ଓ ଗୁଣପୁରରେ ଫିଜିଓଥାରାପି ସେଣ୍ଟର କରିଥିବା ସୂଚନା ମିଳିଛି। 

ତେବେ ଏହି ଘଟଣା ପରେ ବସ୍ କର୍ମଚାରୀ ଅତି ସତର୍କତାର ସହ ଗୁଣପୁର ଉପଖଣ୍ଡ ଚିକିତ୍ସାଳୟରେ ପ୍ରସୂତିଙ୍କୁ ମେଡ଼ିକାଲରେ ଭର୍ତ୍ତି କରାଇଥିଲେ। ଏବେ ଉଭୟ ମା’ ଛୁଆ ସୁସ୍ଥ ଥିବା ମେଡ଼ିକାଲ କର୍ତ୍ତୃପକ୍ଷ ସୂଚନା ପ୍ରଦାନ କରିଛନ୍ତି। ତେବେ ପ୍ରସୂତୀଙ୍କ ନିକଟରେ ତାଙ୍କର କୌଣସି ପରିଚିତ ଲୋକ ନ ଥିବାବେଳେ ପ୍ରସୂତି ଜଣକ କିଏ ସେନେଇ କିଛି ସୂଚନା ମିଳିପାରି ନାହିଁ ।