ଭୁବନେଶ୍ୱର,୦୩/୧୨: ବାତ୍ୟା ଓଡ଼ିଶାରେ ସିଧା ମାଡ଼ ହେବନି । ହେଲେ ଯେତିକି ପବନ, ବର୍ଷା ଧରି ଓଡ଼ିଶାରେ ପଶିବ, ସେଥିରେ ଉଜାଡ଼ି ଦେବ ଅମଳ ମୁହାଁ ଫସଲ । ବରବାଦ୍ କରିଦେବ ଧାନ, କପା, ମାଣ୍ଡିଆ, କୋବି, ଆଳୁ ଓ ଅନ୍ୟାନ୍ୟ ପନିପରିବା ଫସଲକୁ । ବିଶେଷ କରି ଦକ୍ଷିଣ ଓଡ଼ିଶା ଓ ଉପକୂଳବର୍ତ୍ତୀ ଅଞ୍ଚଳକୁ ବର୍ଷା ଆଶଙ୍କା ଘାରିଲାଣି । ଦକ୍ଷିଣରେ ପ୍ରବଳରୁ ପ୍ରବଳତର ବର୍ଷା ହେବ । ପବନ ବି ୬୦ କିମି ପର୍ଯ୍ୟନ୍ତ ଯାଇପାରେ ।
୩ରୁ ବର୍ଷା ଆରମ୍ଭ ହେବ । ୪ରୁ ବଢ଼ିବ । ଆସନ୍ତା ୫ ଓ ୬ରେ ପ୍ରବଳରୁ ପ୍ରବଳତର ବର୍ଷା ହୋଇପାରେ । ୧୧ ଜିଲ୍ଲାରେ ବର୍ଷା ସମ୍ଭାବନା ଥିବାବେଳେ ଦକ୍ଷିଣର ଅନେକ ସ୍ଥାନରେ ନିର୍ଧୁମ ବର୍ଷା ଆଶଙ୍କା ଅଛି । ଏ ବର୍ଷ ଆରମ୍ଭରୁ ବର୍ଷା ହେଲାନି । ଡେରିରେ ବୁଣାବୁଣି ହେଲା । ଏବେ ଅମଳ ମୁହାଁ ଫସଲ । ଧାନ ପ୍ରାୟତଃ ପାଚି ଯାଇଛି । ଏତିକିବେଳେ ମାଡି ଆସୁଛି ଲଗାଣ ବର୍ଷା ଆଉ ପବନ ।
କୃଷି ପାଣିପାଗ ବିଜ୍ଞାନୀଙ୍କ ଆଶଙ୍କା- ଏ ଅଦିନିଆ ଝଡ଼ବର୍ଷା ବିପତ୍ତି ଆଣିବ ଚାଷୀ ପାଇଁ । ବରବାଦ୍ କରିଦେବ ଫସଲ । ଭାଙ୍ଗି ଦେବ ଚାଷୀର ମେରୁଦଣ୍ଡ । ସମ୍ଭାବ୍ୟ ସ୍ଥିତିର ମୁକାବିଲା ପାଇଁ କୃଷି ବିଭାଗ ଘନଘନ ବୈଠକ କରିଛି । ମାଲକାନଗିରି, କୋରାପୁଟ, ରାୟଗଡ଼ା, ଗଜପତି ଓ ଗଞ୍ଜାମ ଜିଲ୍ଲାର ବିଭାଗୀୟ ଅଧିକାରୀଙ୍କୁ ଆଗୁଆ ସତର୍କ ରହିବାକୁ କୁହାଯାଇଛି । ଏହି ୫ ଜିଲ୍ଲାରେ ୬ ତାରିଖ ପର୍ଯ୍ୟନ୍ତ କୌଣସି କୃଷି ଅଧିକାରୀ ଛୁଟି ନେଇପାରିବେନି । କୃଷି ବିଭାଗ ପ୍ରମୁଖ ଶାସନ ସଚିବ ଅରବିନ୍ଦ ପାଢ଼ୀ ଶନିବାର ପାଣିପାଗ ବିଭାଗ, କୃଷି ସମ୍ପ୍ରସାରଣ ଶିକ୍ଷା, ଓୟୁଏଟି, କୃଷି ବିଭାଗ ଅଧିକାରୀଙ୍କ ସହ ବୈଠକ କରିଛନ୍ତି । ମାଇକରେ ଫସଲ ସୁରକ୍ଷା ବାର୍ତ୍ତା ପ୍ରଚାର ପାଇଁ କୁହାଯାଇଛି । ଅନ୍ୟପଟେ ସ୍ୱତନ୍ତ୍ର ରିଲିଫ କମିଶନର ସତ୍ୟବ୍ରତ ସାହୁ ଫସଲ ସୁରକ୍ଷା ପାଇଁ ଆବଶ୍ୟକ ପଦକ୍ଷେପ ନେବାକୁ ପରାମର୍ଶ ଦେଇଛନ୍ତି ।
ପାଣିପାଗ ବିଭାଗ ପୂର୍ବାନୁମାନ ହେଲା-ଆସନ୍ତା ୨୪ ଘଣ୍ଟାରେ (ରବିବାରକୁ) ଗଭୀର ଅବପାତ ବଳ ଜୁଟାଇ ବାତ୍ୟା ରୂପ ନେବ ଦକ୍ଷିଣ ପଶ୍ଚିମ ବଙ୍ଗୋପସାଗରରେ । ଏହାପରେ ମୁହାଁଇବ ଉତ୍ତର- ପଶ୍ଚିମ ଦିଗରେ । ୪ ତାରିଖ ପୂର୍ବାହ୍ଣରେ ପହଞ୍ଚିବ ଦକ୍ଷିଣ ଆନ୍ଧ୍ର ଓ ପାଶ୍ୱର୍ବର୍ତ୍ତୀ ଉତ୍ତର ତାମିଲନାଡ଼ୁ ଉପରେ । ୫ ତାରିଖ ମଧ୍ୟାହ୍ନ ପୂର୍ବରୁ ଆନ୍ଧ୍ରର ନେଲ୍ଲୋର ଓ ମଛଲିପଟ୍ଟନମ ଭିତରେ ଉପକୂଳ ଛୁଇଁବ । ସେତେବେଳେ ସେଠାରେ ପବନ ବହୁଥିବ ୮୦-୯୦ କିମି ବେଗରେ, ମଝିରେ ମଝିରେ ୧୦୦ କିମି ବେଗରେ ପିଟୁଥିବ ।
ସମ୍ଭାବ୍ୟ ଗତିପଥ ଯାହା ଅନୁମାନ କରାଯାଉଛି, ଆନ୍ଧ୍ର ଉପକୂଳବର୍ତ୍ତୀ ଅଞ୍ଚଳ ଦେଇ ଆଗକୁ ବଢ଼ିବ । ଓଡ଼ିଶାରେ ଏହା ପ୍ରଭାବ ପକାଇବ। ୩ ତାରିଖ ମାଲକାନଗିରି, କୋରାପୁଟ, ରାୟଗଡ଼ା, ଗଜପତି, ଗଞ୍ଜାମର ଅଳ୍ପ କେତେକ ଜାଗାରେ ହାଲୁକାରୁ ମଧ୍ୟମ ବର୍ଷା ହୋଇପାରେ । ଉପକୂଳର ଗୋଟିଏ ଦୁଇଟି ସ୍ଥାନ ସହ ନବରଙ୍ଗପୁର, କଳାହାଣ୍ଡି, କନ୍ଧମାଳରେ ସ୍ଥାନେ ସ୍ଥାନେ ବର୍ଷା ହୋଇପାରେ ।
୪ ତାରିଖ ମାଲକାନଗିରି, କୋରାପୁଟ, ରାୟଗଡ଼ା, ଗଜପତି, ଗଞ୍ଜାମ, ପୁରୀର ଅନେକ ସ୍ଥାନ ସହ କନ୍ଧମାଳ, ନବରଙ୍ଗପୁର, କଳାହାଣ୍ଡି, ନୟାଗଡ଼, ଖୋର୍ଦ୍ଧା, ଜଗତସିଂହପୁର, କଟକ ଜିଲ୍ଲାର ଅଳ୍ପ କିଛି ଜାଗାରେ ବର୍ଷା ସମ୍ଭାବନା ଅଛି । ମାଲକାନଗିରି, କୋରାପୁଟ, ରାୟଗଡ଼ା, ଗଜପତି, ଗଞ୍ଜାମର ସ୍ଥାନେ ସ୍ଥାନେ ପ୍ରବଳ ବର୍ଷା (୭୦ରୁ ୧୧୦ ମିଲିମିଟର) ଆଶଙ୍କା ଅଛି ।
୫ ତାରିଖରୁ ବଢ଼ିବ ବର୍ଷା । ଦକ୍ଷିଣ ଉପକୂଳ, ମାଲକାନଗିରି, କୋରାପୁଟ, ରାୟଗଡ଼ା, କନ୍ଧମାଳ, ନବରଙ୍ଗପୁର ଜିଲ୍ଲାର ଅଧିକାଂଶ ଅଞ୍ଚଳରେ ହାଲୁକାରୁ ମଧ୍ୟମ ବର୍ଷା ହେବ । ଦକ୍ଷିଣ ଆଭ୍ୟନ୍ତରୀଣ ଏବଂ ଉତ୍ତର ଉପକୂଳର ଅନେକ ସ୍ଥାନ ସହ ବାକି ଅଞ୍ଚଳରେ ବର୍ଷା ସମ୍ଭାବନା ଅଛି । ମାଲକାନଗିରି, କୋରାପୁଟ, ରାୟଗଡ଼ା, ଗଜପତି, ଗଞ୍ଜାମର ସ୍ଥାନେ ସ୍ଥାନେ ୭୦ ମିମିରୁ ୨୦୦ ମିମି ପର୍ଯ୍ୟନ୍ତ ପ୍ରବଳରୁ ପ୍ରବଳତର ବର୍ଷା ହୋଇପାରେ ମଙ୍ଗଳବାର । ନବରଙ୍ଗପୁର, କଳାହାଣ୍ଡି, କନ୍ଧମାଳ, ପୁରୀରେ ପ୍ରବଳ ବର୍ଷା (୭୦-୧୧୦ ମିମି) ସମ୍ଭାବନା ଅଛି ।
୬ ତାରିଖ ଉପକୂଳ ଓଡ଼ିଶାର ଅଧିକାଂଶ ଅଞ୍ଚଳ, କେନ୍ଦୁଝର, ମୟୂରଭଞ୍ଜ, ଅନୁଗୁଳ, ଢେଙ୍କାନାଳ, ରାୟଗଡ଼ା, ମାଲକାନଗିରି, କୋରାପୁଟର ଅନେକ ସ୍ଥାନରେ ମଧ୍ୟମ ବର୍ଷା ହୋଇପାରେ । ଗଞ୍ଜାମ, ଗଜପତି, ପୁରୀ, ନୟାଗଡ଼, ଖୋର୍ଦ୍ଧା, କଟକ, ଜଗତସିଂହପୁର, କନ୍ଧମାଳ, କୋରାପୁଟ, ମାଲକାନଗିରି, ରାୟଗଡ଼ାରେ ପ୍ରବଳ ବର୍ଷା ଆଶଙ୍କା ଅଛି । ୭ରୁ ବର୍ଷା ପରିମାଣ କମିବ । ତଥାପି ୭ ଓ ୮ରେ ହାଲୁକା ବର୍ଷା ହୋଇପାରେ ଅଳ୍ପ କିଛି ଜାଗାରେ ।
ବାତ୍ୟା ପ୍ରଭାବରେ ୪ ତାରିଖରେ ଓଡ଼ିଶା ଉପକୂଳରେ (ଗଞ୍ଜାମ, ଗଜପତି, ପୁରୀ, ଜଗତସିଂହପୁର)୩୫ରୁ ୪୫ କିମି ବେଗରେ ପବନ ବହିପାରେ । ପବନ ଝଟକା ମଝିରେ ମଝିରେ ୫୫ କିମି ପର୍ଯ୍ୟନ୍ତ ଯାଇପାରେ । ୫ ତାରିଖ ସନ୍ଧ୍ୟାରୁ ପବନ ବେଗ ଆହୁରି ବଢ଼ି ଘଣ୍ଟା ପ୍ରତି ୪୦-୫୦ କିମି ରହିପାରେ । ମଝିରେ ମଝିରେ ପବନ ଧକ୍କା ୬୦ କିମି ପର୍ଯ୍ୟନ୍ତ ଛୁଇଁପାରେ । ୫ ତାରିଖରେ ମାଲକାନଗିରି, କୋରାପୁଟ, ରାୟଗଡ଼ାରେ ୩୦-୪୦ କିମି ପବନ ହୋଇପାରେ । ପବନ ଧକ୍କା ୫୦ କିମି ପର୍ଯ୍ୟନ୍ତ ଯାଇପାରେ ।
ସମୁଦ୍ର ଅଶାନ୍ତ ଥିବାରୁ ମତ୍ସ୍ୟଜୀବୀଙ୍କୁ ସମୁଦ୍ର ଭିତରକୁ ଯିବାକୁ ମନା କରାଯାଇଛି । ୪ରୁ ୬ ଯାଏଁ ସମୁଦ୍ର ଅତ୍ୟନ୍ତ ଅଶାନ୍ତ ରହିବ ବୋଲି ସତର୍କ କରାଯାଇଛି ।
କୃଷି ପାଣିପାଗ ବିଶାରଦ ଦେବାଶିଷ ଜେନା କହିଛନ୍ତି, ଧାନ, କପା, ମାଣ୍ଡିଆ ଗୁରୁତର ଭାବେ ପ୍ରଭାବିତ ହୋଇପାରେ । ବାତ୍ୟା ପ୍ରଭାବରେ ଦକ୍ଷିଣରେ ବର୍ଷା ସମ୍ଭାବନା ଅଧିକ । ଦକ୍ଷିଣ ଓଡ଼ିଶାରେ ଧାନ, ମାଣ୍ଡିଆ ସହ କପା ମଧ୍ୟ ବହୁଳ ମାତ୍ରାରେ ଚାଷ କରାଯାଏ । ଧାନ ଫୁଲ ଧରିବା, କ୍ଷୀର ଢୋକିବା ଅବସ୍ଥା (ଭିତରେ ଚାଉଳ ଦାନା ବାନ୍ଧିବା ସମୟ) କିମ୍ବା ଅମଳ ସମୟରେ ଥିଲେ ଏ ବର୍ଷା, ପବନ କ୍ଷତି ପହଞ୍ଚାଇବ । ଧାନ ଝଡ଼ିବା ସହ ପବନରେ ପଡ଼ି ସଢ଼ିଯାଇପାରେ । ଧାନର ମାନ (କ୍ୱାଲିଟି) ବି କମିପାରେ । କୋବି ଫୁଲି ଫାଟି ଯାଇପାରେ । ଏ ବର୍ଷା ଯୋଗୁ ପ୍ରତ୍ୟେକ ଫସଲରେ ରୋଗ, କୀଟ ମାଡ଼ିଯାଇପାରେ । ଅମଳ ଉପଯୋଗୀ ଥିଲେ ଶୀଘ୍ର ଅମଳ କରି ଫସଲକୁ ସୁରକ୍ଷିତ ସ୍ଥାନକୁ ଆଣିବା ଉଚିତ ।