ଡେରାଡୁନ୍, ୧୨/୧୧: ଉତ୍ତରାଖଣ୍ଡର ବ୍ରାହ୍ମାଖାଲ-ୟମୁନୋତ୍ରୀ ଜାତୀୟ ରାଜପଥରେ ସିଲ୍କ୍ୟାରରୁ ଡଣ୍ଡାଲଗାଓଁ ଯାଏ ନିର୍ମାଣାଧୀନ ଟନେଲର କିଛି ଅଂଶ ଭୁଶୁଡ଼ି ପଡ଼ିଛି । ନିର୍ମାଣାଧୀନ ସୁଡ଼ଙ୍ଗରେ ୩୬ ଶ୍ରମିକ ଫସିଛନ୍ତି ଆଶଙ୍କା କରାଯାଉଛି । ଏବେ ସୁଦ୍ଧା କେହି ମୃତାହତ ହୋଇଥିବା ସୂଚନା ମିଳିନି ।
କୁହାଯାଉଛି, ଏହି ଅଘଟଣ ଭୂସ୍ଖଳନ ଯୋଗୁଁ ଘଟିଛି । ଘଟଣାସ୍ଥଳରେ ସ୍ଥାନୀୟ ପ୍ରଶାସନ, ପୋଲିସ, ଏସଡିଆରଏଫ୍, ଏନଡିଆରଏଫ୍, ଅଗ୍ନିଶମ ବାହିନୀ ଓ ଆମ୍ବୁଲାନ୍ସ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି । ଉକ୍ତ ଟନେଲର ନିର୍ମାଣକାରୀ ସଂସ୍ଥା ଏନ୍ଏଚ୍ଆଇଡିସିଏଲ୍ ଭଗ୍ନାବଶେଷ ହଟାଉଛି । ଭିତରେ ସମସ୍ତ ଶ୍ରମିକ ସୁରକ୍ଷିତ ଥିବା ସୂଚନା ମିଳିଛି ।
ଫସିଥିବା ଶ୍ରମିକଙ୍କ ପାଖରେ ଅକ୍ସିଜେନ୍ ସିଲିଣ୍ଡର୍ ରହିଛି । ପାଇପ୍ ଯୋଗେ ମଧ୍ୟ ଟନେଲ୍ ଭିତରକୁ ଶ୍ରମିକଙ୍କ ପାଖକୁ ଅମ୍ଳଜାନ ପଠା ଯାଉଛି । ଟନେଲର ୫୦ ମିଟର ଅଂଶ ଭୁଶୁଡ଼ି ପଡ଼ିଛି । ଏହି ଟେନଲ୍ ନିର୍ମାଣ କରୁଛି ନବଯୁଗ କମ୍ପାନୀ ।
ସିଲ୍କ୍ୟାରା ପଟୁ ଟନେଲର ମୁଖ୍ୟ ଦ୍ୱାର ନିକଟରୁ ୨୦୦ ମିଟର ଦୂରରେ ଭୂସ୍ଖଳନ ହୋଇଥିଲା । ସେତେବେଳେ ଟନେଲର ୨୮୦୦ ମିଟର ଗଭୀରରେ ଶ୍ରମିକ କାମ କରୁଥିଲେ । ଏହି ସୁଡ଼ଙ୍ଗ ହେଉଛି ଅଲ୍ ୱେଦର ପ୍ରକଳ୍ପର ଅଂଶ । ଯାହାର ଲମ୍ବ ୪.୫ କିଲୋମିଟର । ୪ କିଲୋମିଟର ଲମ୍ବ ସୁଡ଼ଙ୍ଗ ନିର୍ମାଣ ସରିଛି । ୨୦୨୪ ମାର୍ଚ୍ଚ ସୁଦ୍ଧା ସୁଡ଼ଙ୍ଗ ନିର୍ମାଣ ଶେଷ କରିବାକୁ ଲକ୍ଷ୍ୟ ରହିଛି ।
କଏଦୀଙ୍କ ଗୋଡ଼ରେ ଜିପିଏସ୍: ଯୋଜନା କଲା ଓଡ଼ିଶା, ବାହାଦୁରି ନେଲା ଜମ୍ମୁ-କାଶ୍ମୀର
