ନୂଆଦିଲ୍ଲୀ, ୨୫/୦୧: ଘୋଷଣା ହୋଇଛି ପଦ୍ମ ପୁରସ୍କାର । ୨୦୨୪ ବର୍ଷ ଲାଗି ୩୪ ଜଣ ପଦ୍ମଶ୍ରୀ ପୁରସ୍କାର ପାଇବେ । ଓଡ଼ିଶାର ୨ ଜଣଙ୍କୁ ମିଳିବ ଏହି ସମ୍ମାନ । ଭଜନ ଗାୟକ ଗୋପୀନାଥ ସ୍ୱାଇଁ ଏବଂ ଲୋକ ନୃତ୍ୟ ପାଇଁ ଭାଗବତ ପ୍ରଧାନଙ୍କୁ ମିଳିବ ପଦ୍ମଶ୍ରୀ ପୁରସ୍କାର ।

ଗଞ୍ଜାମର ଗୋପୀନାଥ ସ୍ୱାଇଁ ଦୀର୍ଘ ୯ ଦଶନ୍ଧି ଧରି କୃଷ୍ଣ ଲୀଳା ଭଜନ ଗାଇ ଆସୁଛନ୍ତି । ପରମ୍ପରାକୁ ପ୍ରୋତ୍ସାହନ ଯୋଗାଉ ଥିବାରୁ ଗୋପୀନାଥଙ୍କୁ ମିଳିବ ପଦ୍ମଶ୍ରୀ । ଗୋପୀନାଥ ୫ଟି ପୁରୁଣା ରାଗ ଗାଇବା ଅନ୍ୟମାନଙ୍କୁ ଶିକ୍ଷା ଦେଇଛନ୍ତି । ଗାଁରେ ପାରମ୍ପରିକ ଆଖଡ଼ା ପ୍ରତିଷ୍ଠା କରିଥିଲେ । ବୟସାଧିକ ସତ୍ତ୍ୱେ ଗୋପୀନାଥ ଦକ୍ଷିଣ ଓଡ଼ିଶାରେ କୃଷ୍ଣ ଲୀଳା ଉପରେ ଶିକ୍ଷା ଦାନ କରି ଆସୁଛନ୍ତି । ସେ ୫ ବର୍ଷ ବୟସରୁ କୃଷ୍ଣ ଲୀଳା ଯାତ୍ରା ଆରମ୍ଭ କରିଥିଲେ । ଏବେ ଗୋପୀନାଥଙ୍କ ବୟସ ୧୦୫ ବର୍ଷ ।

ସେହିଭଳି ଶବ୍ଦ ନୃତ୍ୟ (ଲୋକ ନୃତ୍ୟ) ପାଇଁ ବରଗଡ଼ର ୮୫ ବର୍ଷୀୟ ଭାଗବତ ପ୍ରଧାନ ପାଇବେ ପଦ୍ମଶ୍ରୀ । ସେ ବିଭିନ୍ନ ମନ୍ଦିରରେ ଲୋକ ନୃତ୍ୟ କରି ଗୌରବ ଆଣିଛନ୍ତି । ଭାଗବତ ୫ ଦଶନ୍ଧି ଧରି ମହାଦେବ ନୃତ୍ୟ କରି ଆସୁଛନ୍ତି । ଶବ୍ଦ ନୃତ୍ୟକୁ ବଞ୍ଚାଇ ରଖିବା ଲାଗି ଭାଗବତ ୬୦୦ରୁ ଅଧିକ ଜଣଙ୍କୁ ଶିକ୍ଷା ଦେଇଛନ୍ତି । ୧୯୬୦ ମସିହାରେ ଭାଗବତ ପ୍ରାଥମିକ ବିଦ୍ୟାଳୟରେ ଶିକ୍ଷାଦାନ କରୁଥିଲେ । ଆର୍ଥିକ ଦୁଃସ୍ଥିତି ଆସିଥିଲେ ବି ସେ ଭାଙ୍ଗି ନ ପଡ଼ି ଶବ୍ଦ ନୃତ୍ୟକୁ ଗୁରୁତ୍ୱ ଦେଇ ଆସିଥିଲେ ।