ଅନୁଗୁଳ,୧୮/୧୧: ମାସ ପରେ ମାସ ବିତୁଛି । ଡେଇଁ ଚାଲିଛି ଡେଡଲାଇନ୍ । ମାତ୍ର ସରିବାର ନାଁ’ ନେଉନି ଅନୁଗୁଳ ପୌରପାଳିକାର କୁକୁରଶାଳା ନିର୍ମାଣ । ତତ୍କାଳୀନ ପୌରନିର୍ବାହୀ ଅଧିକାରୀ ଏହି ପ୍ରକଳ୍ପ ଜୁଲାଇ ସୁଦ୍ଧା ଶେଷ ହୋଇ କାର୍ଯ୍ୟକ୍ଷମ ହେବ ବୋଲି ପ୍ରତିଶ୍ରୁତି ଦେଇଥିଲେ । ମାତ୍ର ଇତିମଧ୍ୟରେ ୪ ମାସ ବିତିଥିଲେ ମଧ୍ୟ ପ୍ରକଳ୍ପର ଆଖିଦୃଶିଆ ଅଗ୍ରଗତି ହୋଇନି । ଗୋଟିଏ ପଟେ ସହରରେ କୁକୁରଙ୍କ ଉତ୍ପାତ ବଢ଼ି ଚାଲିଛି । ଅନ୍ୟପଟରେ ପ୍ରକଳ୍ପ ନିର୍ମାଣରେ ଅତିରିକ୍ତ ଖର୍ଚ୍ଚକୁ ନେଇ କାଉନ୍ସିଲରମାନେ ପ୍ରଶ୍ନ ଉଠାଇଥିବା ବେଳେ ପୌରପାଳିକାର ମନ୍ଥର ଗତି ଏହାକୁ ଅନିଶ୍ଚିତତା ମଧ୍ୟକୁ ଠେଲି ଦେଇଛି । ଦୁଇ ମାସରୁ ଅଧିକ ସମୟ ହେଲାଣି କୁକୁର ଧରା ଗାଡ଼ି କିଣାଗଲାଣି । କିନ୍ତୁ, ଏଯାବତ୍ କୁକୁରଙ୍କ ଅସ୍ତ୍ରୋପଚାର ପାଇଁ ଡାକ୍ତର ଓ କମ୍ପାଉଣ୍ଡର ନିଯୁକ୍ତି ନେଇ ପ୍ରକ୍ରିୟା ଆରମ୍ଭ ହୋଇନଥିବାରୁ ନିକଟ ଭବିଷ୍ୟତରେ ଏହାର କାର୍ଯ୍ୟକ୍ଷମ ନେଇ ଆଶଙ୍କା ପ୍ରକାଶ ପାଇଛି ।
ଅତିଷ୍ଠ କଲେଣି ବୁଲା କୁକୁର । ନିତି ରାତିରେ ଅଧିକାଂଶ ବାଇକ୍ ଆରୋହୀ ଆକ୍ରୋଶର ଶିକାର ହେଉଛନ୍ତି । କୁକୁର କାମୁଡ଼ିବାକୁ ଗୋଡ଼ାଉଥିବା ବେଳେ ଲୋକ ଗାଡ଼ିରୁ ପଡ଼ି କ୍ଷତାକ୍ତ ହେଉଛନ୍ତି । ସ୍ଥିତି ଏମିତି ଯେ, କୁକୁର ଭୟରେ ଲୋକ ରାତିରେ ଯା’ଆସ କରିବାକୁ ଭୟ କରୁଛନ୍ତି । ରାସ୍ତାଘାଟ, ଗଳିକନ୍ଦି ସବୁଆଡ଼େ ଘୂରିବୁଲି ଆତଙ୍କ ଖେଳାଉଛନ୍ତି । ଟ୍ରାଫିକ୍ ସମସ୍ୟା ସାଙ୍ଗକୁ ରାସ୍ତାରେ ଦୁର୍ଘଟଣାର ଏମାନେ ପ୍ରମୁଖ କାରଣ ସାଜୁଛନ୍ତି । ବୁଲା କୁକୁରଙ୍କୁ କାବୁ କରି ଟିକାକରଣ ସାଙ୍ଗକୁ ବଂଶ ବୃଦ୍ଧିରେ ରୋକ୍ ଲଗାଇବାକୁ ବହୁ ଦାବି ସତ୍ତେ୍ୱ କୁକୁର ବନ୍ଧ୍ୟାକରଣ ଯୋଜନା କାର୍ଯ୍ୟକାରୀ କରିବାରେ ପୌରପାଳିକା ବିଫଳ ହୋଇଛି । ବର୍ଷାଧିକ କାଳ ହେଲାଣି ଅନୁଗୁଳ କଲେଜ ନିକଟରେ ପୌରପାଳିକା ନିର୍ମାଣ କରୁଛି କୁକୁରଶାଳା । ବୁଲା କୁକୁରଙ୍କୁ ଧରିବା ପାଇଁ କୁକୁର ଧରା ଗାଡ଼ି କିଣା ସରିଛି । କୁକୁରଙ୍କ ଅସ୍ତ୍ରୋପଚାର ସାଙ୍ଗକୁ ଟିକାକରଣ ପାଇଁ ସ୍ୱତନ୍ତ୍ର ଗୃହ ନିର୍ମାଣ ମଧ୍ୟ ସରିଛି । ନିର୍ମାଣ କାର୍ଯ୍ୟ ଅନ୍ତିମ ପର୍ଯ୍ୟାୟରେ ପହଞ୍ଚିଥିଲେ ହେଁ ଅତିରିକ୍ତ ଖର୍ଚ୍ଚକୁ ନେଇ ଅଡ଼ୁଆ ପରିସ୍ଥିତି ସୃଷ୍ଟି ହୋଇଛି । ପ୍ରଥମେ ଏହି କୁକୁରଶାଳା ନିର୍ମାଣ ପାଇଁ ୨୮ ବ୍ୟୟ ଅଟ୍ଟକଳ ହୋଇଥିଲା ।
ଏଥିରେ ଗୃହ ନିର୍ମାଣଠୁ ନେଇ ସମସ୍ତ ଭିତ୍ତିଭୂମି ନିର୍ମାଣ କରିବାର ଥିଲା । ମାତ୍ର ପରବର୍ତ୍ତୀ ସମୟରେ ପେଭର ବ୍ଲକ ଓ ଫାଟକ ନିର୍ମାଣ ବାବଦକୁ ଆଉ ୧୦ ଲକ୍ଷ ଟଙ୍କା ଖର୍ଚ୍ଚ କରାଯାଇଛି । କୁକୁରଶାଳା ନିର୍ମାଣରେ ଅଯଥା ବ୍ୟୟ ଅଟ୍ଟକଳ କରି ବଡ଼ ଘୋଟାଲା କରାଯାଇଥିବା କାଉନ୍ସିଲରମାନେ ଅଭିଯୋଗ କରିଛନ୍ତି । ଗତ ପାରିଷଦ ବୈଠକରେ ଏହି ଅତିରିକ୍ତ ଖର୍ଚ୍ଚକୁ ନେଇ ତମ୍ବିତୋଫାନ ହୋଇଥିଲା । ଏହା ପରଠୁ ଏହି ପ୍ରକଳ୍ପ ଅନିଶ୍ଚିତତା ମଧ୍ୟକୁ ଠେଲି ହୋଇଯାଇଥିବା କୁହାଯାଉଛି । ସରକାରୀ ଅର୍ଥ ବରବାଦ୍ ହେବା ପୂର୍ବରୁ ତୁରନ୍ତ ଜିଲ୍ଲାପାଳ ଏଥିରେ ହସ୍ତକ୍ଷେପ କରିବାକୁ ଦାବି ହୋଇଛି । ଅପରପକ୍ଷରେ ଦୁଇ ମାସରୁ ଅଧିକ ସମୟ ହେଲା କୁକୁରଧରା ଗାଡ଼ି ଖତ ଖାଉଛି । ତୁରନ୍ତ ନିର୍ମାଣ କାମ ଶେଷ କରିବା ସହିତ ଡାକ୍ତର ଓ କମ୍ପାଉଣ୍ଡରଙ୍କ ସହିତ ଆବଶ୍ୟକୀୟ କର୍ମଚାରୀ ନିଯୁକ୍ତ କରି ପ୍ରକଳ୍ପକୁ କାର୍ଯ୍ୟକ୍ଷମ କରିବାକୁ ଦାବି ହୋଇଛି ।
ଏ ସଂକ୍ରାନ୍ତରେ ପୌରଯନ୍ତ୍ରୀ ରବିନ୍ ଦାସଙ୍କୁ ଯୋଗାଯୋଗ କରିବାରୁ ସେ କହିଲେ, କୁକୁରଶାଳା ନିର୍ମାଣ ଅନ୍ତିମ ପର୍ଯ୍ୟାୟରେ ପହଞ୍ଚିଛି । କିଛି ପେଭର ବ୍ଲକ ବିଛା କାମ ବାକି ରହିଥିବା ବେଳେ ତାହା ଆଉ ସପ୍ତାହକ ମଧ୍ୟରେ ଶେଷ ହୋଇଯିବ । ଏପର୍ଯ୍ୟନ୍ତ ଡାକ୍ତର କି କମ୍ପାଉଣ୍ଡର ନିଯୁକ୍ତି ନେଇ ପ୍ରକ୍ରିୟା ଆରମ୍ଭ ହୋଇନାହିଁ । କର୍ମଚାରୀ ନିଯୁକ୍ତି ସରିବା ପରେ କୁକୁର ବନ୍ଧ୍ୟାକରଣ ଯୋଜନା କାର୍ଯ୍ୟକାରୀ କରାଯିବ ବୋଲି ସେ ପ୍ରକାଶ କରିଛନ୍ତି ।
