ଭଦ୍ରକ,୧୫/୧୦: ଭଦ୍ରକ ସହରର ଛାତି ଉପରେ ଚାଲିଛି ଦେହ କାରବାର । ବିଳାସପୂର୍ଣ୍ଣ ହୋଟେଲ ଓ ଲଜ୍ରେ ଏଭଳି କାରବାର କାୟା ମେଲାଇଛି । ବଙ୍ଗୀୟ ଯୁବତୀମାନେ ଆସୁଛନ୍ତି । ସେମାନଙ୍କୁ ମୂଲଚାଲ କରି ସ୍ଥାନୀୟ ଅଞ୍ଚଳର ଦଲାଲ ଆଣୁଛନ୍ତି । ଏପଟେ ଗ୍ରାହକଙ୍କ ସହ ଡିଲ୍ କରୁଛନ୍ତି । ଗରାଖ ଯୋଗାଇବାରେ କିଛି ଏଜେଣ୍ଟ୍ ସମ୍ପୃକ୍ତ ରହୁଛନ୍ତି । ଏଭଳି କାରବାର ଭଦ୍ରକ ସହରରେ ଥିବା ବହୁ ହୋଟେଲ, ଲଜ୍ରେ ଚାଲୁଛି । ଶନିବାର ଭଦ୍ରକ ଟାଉନ୍ ଥାନା ଅଧୀନ ବାଇପାସ୍ ସ୍ଥିତ ଶାଶ୍ୱତ ଲଜ୍ରେ ପୁଲିସ ଚଢ଼ଉ କରିଛି । ଚଢ଼ଉ ବେଳେ ଲଜ୍ରୁ ୩ ଯୁବତୀଙ୍କ ସମେତ ୨ ଯୁବକଙ୍କୁ ଧରିଛି ପୁଲିସ୍ । ଏମାନେ ଦେହ ବେପାରରେ ସମ୍ପୃକ୍ତ ଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି ବୋଲି ସିଟି ଡିଏସ୍ପି ଅଂଶୁମାନ ଦ୍ୱିବେଦୀ କହିଛନ୍ତି । ଶାଶ୍ୱତ ଲଜ୍ ମାଲିକଙ୍କୁ ମଧ୍ୟ ପୁଲିସ୍ ଅଟକ ରଖିଛି ।
ଶାଶ୍ୱତ ଲଜ୍ରେ ଦେହ ବେପାର ନେଇ ଦୀର୍ଘ ଦିନ ହେଲା ଚର୍ଚ୍ଚା ହେଉଥିଲା । ଏନେଇ ପୁଲିସ୍ ନିକଟରେ ମଧ୍ୟ ସୂଚନା ଥିଲା । ଶନିବାର ପ୍ରାୟ ସନ୍ଧ୍ୟା ୭ଟାରେ ସ୍ୱତନ୍ତ୍ର ପୁଲିସ୍ ଟିମ୍ ଲଜ୍ରେ ଚଢ଼ଉ କରିଥିଲା । ଚଢ଼ଉ ବେଳେ ୩ ଯୁବତୀଙ୍କୁ ଠାବ କରାଯାଇଛି । ତତ୍ସହିତ ଗ୍ରାହକ ଭାବେ ଥିବା ୨ ଯୁବକ ପୁଲିସ୍ ହାତରେ ଧରାପଡ଼ିଛନ୍ତି । ସେହିଭଳି ଲଜ୍ ମାଲିକଙ୍କୁ ମଧ୍ୟ ପୁଲିସ୍ ଥାନାକୁ ଆଣି ପଚରାଉଚରା ଆରମ୍ଭ କରିଛି । ସିଟି ଡିଏସପି ଶ୍ରୀ ଦ୍ୱିବେଦୀଙ୍କ ସମେତ କ୍ରାଇମ୍ ଡିଏସ୍ପି ପୁଷ୍ପଲତା ବାରିକ ଓ ଟାଉନ ଥାନା ଅଧିକାରୀ ବୀରେନ୍ଦ୍ର କୁମାର ସେନାପତି ଉକ୍ତ ଚଢ଼ଉର ନେତୃତ୍ୱ ନେଇଥିଲେ ।
ଆଇଆଇସି ଶ୍ରୀ ସେନାପତି କହିଛନ୍ତି, ଧରାପଡ଼ିଥିବା ଯୁବତୀଙ୍କ ସହ ଦୁଇ ଗ୍ରାହକ ଓ ମାଲିକଙ୍କୁ ପଚରାଉଚରା ଜାରି ରହିଛି । ସେମାନେ ଏଭଳି କାରବାର ପାଇଁ କାହା ସହ ଡିଲ୍ କରି ଆସିଥିଲେ³ ତା’ର ଖୋଳତାଡ଼ ଆରମ୍ଭ ହୋଇଛି । ଦୁଇ ଜଣ ଦଲାଲ ସମ୍ପୃକ୍ତି ଥିବା ନେଇ ପ୍ରମାଣ ମିଳିଛି ।
ସେମାନଙ୍କୁ ଶୀଘ୍ର ଗିରଫ କରାଯିବ ବୋଲି କହିଛନ୍ତି । ଏନେଇ କେସ ନଂ ୫୫୨/୨୩ରେ ମାମଲା ଦାୟର ହୋଇଛି । ସହରର ମିଡ୍ ପଏଣ୍ଟ୍ ବାଇପାସ୍ ଭଳି ସ୍ଥାନରେ ଦେହ କାରବାରକୁ ନେଇ ସାଧାରଣରେ ଅସନ୍ତୋଷ ଦେଖାଦେଇଛି । ଏଥିସହ ଏନ୍ଏଚ୍ ୧୬ ପାଶ୍ୱର୍ ଓ ଚରମ୍ପା ଅଞ୍ଚଳରେ ଥିବା କିଛି ହୋଟେଲ, ଲଜ୍ ଆଦିରେ ଦେହ କାରବାର ବଢୁଥିବା ଚର୍ଚ୍ଚା ହେଉଛି । ପୁଲିସ୍ ଏଥିପ୍ରତି ନଜର ଦେବାକୁ ଦାବି ହେଉଛି ।