ନୂଆଦିଲ୍ଲୀ, ୧୬/୦୨: ଭାରତୀୟ ରିଜର୍ଭ ବ୍ୟାଙ୍କ (RBI) ବଡ଼ ଆଶ୍ୱସ୍ତି ଦେଇଛି । ପେଟିଏମ୍ ଉପରେ ୨୦୨୪ ଫେବ୍ରୁଆରୀ ୨୯ରୁ ଲାଗିବାକୁ ଥିବା ପ୍ରତିବନ୍ଧକ ଅବଧିକୁ ୨୦୨୪ ମାର୍ଚ୍ଚ ୧୫ ପର୍ଯ୍ୟନ୍ତ ବଢ଼ାଇ ଦେଇଛନ୍ତି ରିଜର୍ଭ ବ୍ୟାଙ୍କ । ଅର୍ଥାତ୍ ମାର୍ଚ୍ଚ ୧୫ରୁ ପେଟିଏମ୍ ପେମେଣ୍ଟ ବ୍ୟାଙ୍କ ଉପରେ ପ୍ରତିବନ୍ଧକ ଲାଗୁ କରାଯିବ ।
୨୦୨୪ ଜାନୁଆରୀ ୩୧ରେ ଜାରି ନିର୍ଦ୍ଦେଶନାମାରେ ଆରିବିଆଇ, ପେଟିଏମ୍ ପେମେଣ୍ଟ ବ୍ୟାଙ୍କକୁ ନୂଆ ଗ୍ରାହକ ଯୋଡ଼ିବା ଉପରେ ରୋକ୍ ଲଗାଇଥିଲେ । ପେଟିଏମ୍ ପେମେଣ୍ଟ ବ୍ୟାଙ୍କ ବିପକ୍ଷରେ ଅନିୟମିତତା ମିଳିବା ପରେ ଆରବିଆଇ ଜାରି କରିଥିଲେ ନିର୍ଦ୍ଦେଶନାମା ।
ଶୁକ୍ରବାର ଆରବିଆଇ ପକ୍ଷରୁ ଜାରି ପ୍ରେସ୍ ଇସ୍ତାହାରରେ କୁହା ଯାଇଛି, ଜାନୁଆରୀ ୩୧ରେ ପେଟିଏମ୍ ପେମେଣ୍ଟ ବ୍ୟାଙ୍କ ଉପରେ ଅନେକ ପ୍ରତିବନ୍ଧକ ଲଗା ଯାଇଥିଲା । ଗ୍ରାହକ ଓ ଦୋକାନୀମାନଙ୍କ ସ୍ୱାର୍ଥକୁ ଦୃଷ୍ଟିରେ ରଖି ପେଟିଏମ୍ ପେମେଣ୍ଟ ବ୍ୟାଙ୍କ ବିକଳ୍ପ ବ୍ୟବସ୍ଥା କରିବା ଲାଗି ପୂର୍ବରୁ ଜାରି କରାଯାଇଥିବା ନିର୍ଦ୍ଦେଶନାମାରେ କିଛି ସଂଶୋଧନ କରାଯାଇଛି ।
ମାର୍ଚ୍ଚ ୧୫ ପରେ ଟପ୍ଅପ୍ ମନା
ପୂର୍ବରୁ ଆରବିଆଇ କହିଥିଲା, ୨୦୨୪ ଫେବ୍ରୁଆରୀ ୨୯ ପରେ ଗ୍ରାହକଙ୍କ ଖାତା, ପ୍ରିପେଡ୍ ଖାତା, ୱାଲେଟ୍, ଫାସଟାଗ୍ ଆଦିରେ କୌଣସି ଜମା କରାଯାଇ ପାରିବ ନାହିଁ । ଏପରିକି କୌଣସି କ୍ରେଡିଟ୍ ଓ ଟପଅପ୍ କରାଯାଇ ପାରିବ ନାହିଁ । ଏବେ ଏହି ଆଦେଶ ମାର୍ଚ୍ଚ ୧୫ରୁ ଲାଗୁ କରାଯିବ । ଏହା ପରେ ବି ଆକାଉଣ୍ଟରେ ବଳକା ଥିବା ରାଶିକୁ ଗ୍ରାହକ ବ୍ୟବହାର କରି ପାରିବେ । ସେନେଇ ଆରବିଆଇ କୌଣସି ନିର୍ଦ୍ଦିଷ୍ଟ ତାରିଖ ସ୍ଥିର କରି ନାହାନ୍ତି ।