ନୂଆଦିଲ୍ଲୀ: ସରକାରୀ ପରୀକ୍ଷାରେ ପ୍ରଶ୍ନ ପତ୍ର ଲିକ୍ ହେଉ ଅବା ଅନ୍ୟ କୌଣସି ପ୍ରକାର ଅନିୟମିତତା ରୋକିବା ଲାଗି ପେପର ଲିକ୍ ବିଲ୍-୨୦୨୪ ଆଣିଛନ୍ତି କେନ୍ଦ୍ର ସରକାର । ଏହି ବିଲ୍ରେ ୟୁପିଏସ୍ସି, ଏସଏସ୍ସି, ବ୍ୟାଙ୍କିଂ, ରେଲଓ୍ବେ, ଜେଇଇ, ନିଟ୍, ସିୟୁଇଟି ସମେତ ବିଭିନ୍ନ ସରକାରୀ ଚାକିରି ଲାଗି ଆୟୋଜିତ ହେଉଥିବା ପରୀକ୍ଷାକୁ ସାମିଲ କରିବାକୁ ପ୍ରସ୍ତାବ ଦିଆଯାଇଛି ।
ବିଧେୟକରେ କଣ ରହିଛି ?
ଘର କିଣିବା ତ ଦୂରର କଥା, ଭଡ଼ା ଦେବାକୁ ଅସମର୍ଥ ଆମେରିକୀୟ: ରିପୋର୍ଟ
୧. ନିୟମ ଉଲ୍ଲଂଘନ କଲେ ଦୋଷୀଙ୍କୁ ଅତିକମରେ ୩ରୁ ୫ ବର୍ଷ ଜେଲ ଦଣ୍ଡ ଏବଂ ୧୦ ଲକ୍ଷ ଟଙ୍କା ଯାଏଁ ଜରିମାନା ଦେବାକୁ ପଡ଼ିବ ।
୨. ସଂଘବଦ୍ଧ ଭାବେ ଅପରାଧ କରିଥିଲେ ଦୋଷୀଙ୍କୁ ୫-୧୦ ବର୍ଷ ଜେଲ ଦଣ୍ଡ ମିଳିବ । ଏହା ସହ ଅତିକମରେ ଏକ କୋଟି ଟଙ୍କା ଜରିମାନା ଦେବେ ଅପରାଧୀ ।
୩. ସେବା ଯୋଗାଉଥିବା ସଂସ୍ଥାର ଭୁଲ ଥିଲେ ଏକ କୋଟି ଟଙ୍କା ଜରିମାନା ଲାଗିବ । ଏହା ସହ ପରୀକ୍ଷା ଆୟୋଜନ ଲାଗି ହୋଇଥିବା ଖର୍ଚ୍ଚ ଫେରାଇବ ସଂସ୍ଥା ।
ଏହି ବିଧେୟକ ଅନୁସାରେ, ପେପର ଲିକ୍ ନେଇ ସମସ୍ତ ଅପରାଧ ଜାମିନ୍ ବିହୀନ ଏବଂ ସମନ ବିହୀନ । ଏହାର ଅର୍ଥ ପୋଲିସ ନିଜ ଆଡ଼ୁ ମାମଲା କରିବା ସହ ଅପରାଧୀକୁ ବିନା ସମନରେ ଗିରଫ କରିପାରିବ । ସେପଟେ ଅଭିଯୁକ୍ତକୁ ଜାମିନ ମିଳିବନି ଏବଂ ସେ କୌଣସି ବୁଝମଣା କରି ମାମଲାକୁ ରଫାଦଫା କରିପାରିବ ନାହିଁ ।
ଏବେ ଦେଶରେ ପ୍ରଶ୍ନ ପତ୍ର ପ୍ରଘଟ ମାମଲା ବୃଦ୍ଧି ପାଇବାରେ ଲାଗିଛି । ରାଜସ୍ଥାନର ନୂଆ ମୁଖ୍ୟମନ୍ତ୍ରୀ ଭଜନଲାଲ ଶର୍ମା ବଡ଼ ନିଷ୍ପତ୍ତି ନେବା ସହ ପ୍ରଶ୍ନ ପତ୍ର ଲିକ୍ ମାମଲାର ଯାଞ୍ଚ ଲାଗି ଏସଆଇଟି ଗଠନ କରିଛନ୍ତି । ତେବେ ଦେଶରେ ପ୍ରଶ୍ନ ପତ୍ର ମାମଲା ଉପରେ ରୋକ ଲଗାଇବା ଲାଗି କେନ୍ଦ୍ର ସରକାରଙ୍କ ଏହି ପେପର ଲିକ୍ ବିଲ୍ ଗୁରୁତ୍ବପୂର୍ଣ୍ଣ ସାବ୍ୟସ୍ତ ହେବ ବୋଲି କୁହାଯାଉଛି ।
