ମୁମ୍ବାଇ: ଦିଲ୍ଲୀ ଏନସିଆରରେ ବାୟୁ ପ୍ରଦୂଷଣର ମାତ୍ରା କେତେ ଅଧିକ ତାହା ସମସ୍ତଙ୍କୁ ଜଣା । ହେଲେ ଏବେ ମିଳିଥିବା ରିପୋର୍ଟ ଚିନ୍ତାର କାରଣ ପାଲଟିଛି । କାରଣ ଦେଶର ଆର୍ଥିକ ରାଜଧାନୀ ମୁମ୍ବାଇର ସ୍ଥିତି ବି କିଛି କମ୍ ନାହିଁ । ବିଶେଷଜ୍ଞଙ୍କ ମତରେ ଦିଲ୍ଲୀ ଏନସିଆର ଠାରୁ ମୁମ୍ବାଇର ବାୟୁ ପ୍ରଦୂଷଣ ବହୁତ ଅଧିକ । କାରଣ ମୁମ୍ବାଇର ବାୟୁରେ ଥିବା ପାର୍ଟିକିଲ୍ (ବିଷାକ୍ତ ଧୂଳିକଣା) ମଣିଷ ପ୍ରତି ବହୁତ କ୍ଷିତିକାରକ ବୋଲି କୁହାଯାଉଛି । କେନ୍ଦ୍ରୀୟ ପ୍ରଦୂଷଣ ବୋର୍ଡ ପକ୍ଷରୁ ମଧ୍ୟ ମୁମ୍ବାଇ ପାଇଁ ଚେତାବନୀ ଜାରି କରାଯାଇଛି ।
କେବଳ ଦିଲ୍ଲୀ ନୁହେଁ, ପଞ୍ଜାବରୁ ବଙ୍ଗୋପସାଗର ଯାଏଁ ଆକାଶ ଧୂଆଁମୟ
ମୁମ୍ବାଇରେ ଚାଲୁ ରହିଥିବା ନିର୍ମାଣ କାର୍ଯ୍ୟ ଲାଗି ବାୟୁର ମାନ ଖରାପ ହେଉଛି । ବିଭିନ୍ନ ଏଜେନ୍ସି ପକ୍ଷରୁ ନିର୍ମାଣ କାର୍ଯ୍ୟ ଉପରେ ରୋକ ଲଗାଇବାକୁ ଦାବି ହୋଇଥିବା ବେଳେ ଖୁବଶୀଘ୍ର କଟକଣା ଜାରି ହୋଇପାରେ । କେନ୍ଦ୍ରୀୟ ପ୍ରଦୂଷଣ ବୋର୍ଡ ପକ୍ଷରୁ ଜାରି ହୋଇଥିବା ଡାଟା ଅନୁସାରେ, ଦିଲ୍ଲୀ ଭଳି ଚେନ୍ନାଇ ଏବଂ ମୁମ୍ବାଇରେ ବାୟୁର ମାନ ଖରାପ ହେବାରେ ଲାଗିଛି । ମୁମ୍ବାଇରେ ଏୟାର କ୍ବାଲିଟି ଇଣ୍ଡେକ୍ସ (ଏକ୍ୟୁଆଇ) ୩୫୦ ପର୍ଯ୍ୟନ୍ତ ପହଞ୍ଚିଯାଇଛି ।
କୁହାଯାଏ ମୁମ୍ବାଇ ଭଳି ସହରରେ ସମୁଦ୍ରରୁ ଆସୁଥିବା ବାୟୁର ପ୍ରବାହ ଯୋଗୁଁ ବାୟୁ ପ୍ରଦୂଷଣ କମ ହୋଇଥାଏ । କିନ୍ତୁ ଲଗାତାର ବଢ଼ୁଥିବା ନିର୍ମାଣ କାର୍ଯ୍ୟ ଯୋଗୁଁ ବଢ଼ୁଥିବା ବାୟୁ ପ୍ରଦୂଷଣ ଏବେ ସମୁଦ୍ରରୁ ଆସୁଥିବା ବାୟୁ ଦ୍ବାରା କମ୍ ହୋଇପାରୁନାହିଁ ବୋଲି ବିଶେଷଜ୍ଞମାନେ ମତ ଦେଇଛନ୍ତି ।
ଅନ୍ୟ ଏକ ରିପୋର୍ଟରୁ ଜଣାପଡ଼ିଛି ଯେ, ଦିଲ୍ଲୀରେ ମିଳୁଥିବା ବିଷାକ୍ତ ପାର୍ଟିକିଲ ତୁଳନାରେ ମୁମ୍ବାଇରେ ଅଧିକ ମାତ୍ରାରେ ପିଏମ-୧ ପାର୍ଟିକିଲ୍ ମିଳିଛି । କେବଳ ଯେ ଚେନ୍ନାଇ ଏବଂ ମୁମ୍ବାଇରେ ପ୍ରଦୂଷଣ ବଢ଼ୁଛି ତା ନୁହେଁ ସମୁଦ୍ର କୂଳରେ ଥିବା ସହରଗୁଡ଼ିକ ପ୍ରତି ବାୟୁ ପ୍ରଦୂଷଣର ଭୟ ବୃଦ୍ଧି ପାଉଛି ବୋଲି କେନ୍ଦ୍ରୀୟ ପ୍ରଦୂଷଣ ବୋର୍ଡ ପକ୍ଷରୁ କୁହାଯାଇଛି ।