ନୂଆଦିଲ୍ଲୀ, ୦୧/୦୯: ଭାରତ ପରେ ଏବି ଫିଲିପାଇନ୍ସ, ଭିଏତନାମ, ମାଲେସିଆ ଓ ତାଇୱାନ୍ ଚୀନକୁ ବିରୋଧ କରିଛନ୍ତି । ବିବାଦୀୟ ମାନଚିତ୍ରରେ ଦକ୍ଷିଣ ଚୀନ ସାଗର ଉପରେ ଡ୍ରାଗନ କରିଥିବା ଦାବିକୁ ଫିଲିପାଇନ୍ସ ଓ ମାଲେସିଆ ଅଗ୍ରାହ୍ୟ କରିଛନ୍ତି । ଚୀନ ଅନ୍ତର୍ଜାତୀୟ ଆଇନର ପାଳନ କରୁ ବୋଲି ଫିଲିପାଇନ୍ସ କହିଥିବା ବେଳେ ମାନଚିତ୍ରକୁ ନେଇ କୂଟନୈତିକ ସ୍ତରରେ ପ୍ରତିବାଦ କରିଛି ମାଲେସିଆ ।
ମାନଚିତ୍ରରେ ଚୀନ ହୈନାନ୍ ଦ୍ୱୀପର ଦକ୍ଷିଣରେ ୧୫୦୦ କିଲୋମିଟର ପର୍ଯ୍ୟନ୍ତ ଏକ ୟୁ ସେପ୍ ଲାଇନ୍ ଦେଖା ଯାଉଛି । ଯାହାକି ଭିଏତନାମ, ଫିଲିପାଇନ୍ସ, ବ୍ରୁନେଈ ଓ ଇଣ୍ଡୋନେସିଆ ଏକ୍ସକ୍ଲୁସିଭ୍ ଇକୋନୋମିକ୍ ଜୋନ୍ ଦେଇ ଯାଉଛି । ଚୀନର ଏହି ନୂଆ ମ୍ୟାପରେ ଅଧିକ ଭୌଗଳିକ ଅଞ୍ଚଳକୁ ଦର୍ଶା ଯାଇଛି । ଯେଉଁଥିରେ ତାଇୱାନକୁ ନିଜର ବୋଲି ଚୀନ ଦାବି କରିଛି । ଏହି ମ୍ୟାପ୍ ୧୯୪୮ ଜାରି ନକ୍ସା ଭଳି ।
ଇନଷ୍ଟାଗ୍ରାମରେ ଶେଷ ପୋଷ୍ଟ କରି ଘରେ ଝୁଲି ପଡ଼ିଲେ ଅଭିନେତ୍ରୀ ଅପର୍ଣ୍ଣା ନାୟର
ନୂଆ ମ୍ୟାପକୁ ନେଇ ତାଇୱାନ ବିଦେଶ ମନ୍ତ୍ରୀ କହିଛନ୍ତି, ଆମେ ଚୀନର ଅଂଶ ନୁହଁ । ଚୀନ ଯେତେ ଯାହା ପକ୍ଷ ରଖିଲେ ବି ଆମ ଦେଶର ଅସ୍ତିତ୍ୱକୁ ମାଟିରେ ମିଶାଇ ପାରିବ ନାହିଁ । ସେହିଭଳି ଭିଏତନାମ କହିଛି, ଚୀନ ଜାରି କରିଥିବା ନୂଆ ନକ୍ସାର କିଛି ମହତ୍ତ୍ୱ ନାହିଁ । ଏହା ଭିଏତନାମ ସୀମା ଓ ଅନ୍ତର୍ଜାତୀୟ ଆଇନର ଉଲ୍ଲଂଘନ କରୁଛି ।
ଚୀନର ସେଣ୍ଟ୍ରାଲ୍ ଟେଲିଭିଜନ୍ ଅନୁସାରେ, ଦେଶରେ ଏବେ ଜାତୀୟ ମ୍ୟାପକୁ ନେଇ ସଚେତନତା ସପ୍ତାହ ପାଳନ ହେଉଛି । ୧୦ ଡ୍ୟାସ୍ ବିଶିଷ୍ଟ ମ୍ୟାପ୍ ସହ ଜଡ଼ିତ ପ୍ରଶ୍ନରେ ଚୀନ ବିଦେଶ ମନ୍ତ୍ରଣାଳୟ କହିଛି, ଆମେ ସର୍ବଦା ଆମ କ୍ଷେତ୍ରକୁ ନେଇ ସ୍ପଷ୍ଟ ରହିଛୁ । ଦକ୍ଷିଣ ଚୀନ ସାଗରକୁ ନେଇ ଆମ ଆଭିମୁଖ୍ୟ ସ୍ପଷ୍ଟ ।
ଅଗଷ୍ଟ ୨୯ରେ ଚୀନ୍ ଜାରି କରିଥିବା ମ୍ୟାପରେ ଅରୁଣାଚଳ ପ୍ରଦେଶ ଓ ଅକ୍ସାଇ ଚୀନକୁ ନିଜ ଅଞ୍ଚଳ ବୋଲି ଦର୍ଶାଇଥିଲା । ଏଥିସହ ଚୀନ- ତାଇୱାନ ଓ ଦକ୍ଷିଣ ଚୀନ ସମୁଦ୍ରକୁ ନିଜ ଅଞ୍ଚଳ ବୋଲି ଦାବି କରିଥିଲା । ଚୀନର ମ୍ୟାପକୁ ନେଇ ଭାରତର ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର କହିଥିଲେ, ଏହା ଚୀନର ପୁରୁଣା ଅଭ୍ୟାସ । ଅକ୍ସାଇ ଚୀନ ଓ ଲଦାଖ ଭାରତର ଅଭିନ୍ନ ଅଙ୍ଗ ।
ଏହା ପୂର୍ବରୁ ଚୀନ ୨୦୨୩ ଏପ୍ରିଲରେ ଅରୁଣାଚଳ ପ୍ରଦେଶର ୧୧ଟି ସ୍ଥାନର ନାଁ ପରିବର୍ତ୍ତନ କରିଥିଲା । ଚୀନ ଗତ ୫ ବର୍ଷରେ ତୃତୀୟ ଥର ପାଇଁ ଏଭଳି କରିଥିଲା । ଏହା ପୂର୍ବରୁ ୨୦୨୧ରେ ଚୀନ ୧୫ଟି ସ୍ଥାନ ଓ ୨୦୧୭ରେ ୬ ସ୍ଥାନର ନାଁ ବଦଳାଇଥିଲା ।