ଜୟପୁର, ୧୦/୧୧: ଜଣେ ଅନ୍ୟ ଜଣଙ୍କୁ ବଞ୍ଚାଇବାକୁ ଯାଇ ପୂରା ପରିବାର ଶେଷ ହୋଇ ଯାଇଛି । ଏଭଳି ଅଭାବନୀୟ ଘଟଣା ଘଟିଛି ରାଜସ୍ଥାନର ସଲୁମ୍ବର ଜିଲ୍ଲାରେ । ବିଦ୍ୟୁତ୍ ଆଘାତରୁ ଜଣେ ଅନ୍ୟ ଜଣଙ୍କୁ ବଞ୍ଚାଇବାକୁ ପ୍ରୟାସ କଲା ବେଳେ ଗୋଟିଏ ପରିବାରର ୪ ଜଣ ଆଖି ବୁଜିଛନ୍ତି ।
ପ୍ରଥମେ ପରିବାରର ମୁଖିଆ ବିଦ୍ୟୁତ୍ ସଂସ୍ପର୍ଶରେ ଆସିଥିଲେ । ସ୍ୱାମୀଙ୍କୁ ବିଦ୍ୟୁତ୍ ଆଘାତରୁ ବଞ୍ଚାଇବାକୁ ଦୌଡ଼ି ଆସିଥିଲେ ପତ୍ନୀ । କିନ୍ତୁ ସେ ବିଦ୍ୟୁତ୍ ଝଟକା ଖାଇଥିଲେ । ଏହା ପରେ ବାପାମାଆଙ୍କୁ ବଞ୍ଚାଇବା ଲାଗି ଦୌଡ଼ି ଆସିଥିଲେ ୨ ଛୁଆ । କିନ୍ତୁ ୨ ଛୁଆ ବି ବାପାମାଆଙ୍କ ସହ ବିଦ୍ୟୁତ୍ ସଂସ୍ପର୍ଶରେ ଆସି ଯାଇଥିଲେ । ୪ ଜଣଙ୍କ ମୃତ୍ୟୁ ହୋଇଛି ।
ବର୍ଷା ପରେ ଦୀପାବଳିରେ ଦିଲ୍ଲୀବାସୀଙ୍କୁ ଆଶ୍ୱସ୍ତି, ୪୦୦ରୁ ୧୦୦କୁ ଖସିଲା ଏୟାର କ୍ୱାଲିଟି ଇଣ୍ଡେକ୍ସ
ସଲୁମ୍ବର ଜିଲ୍ଲାର ଢିକିୟା ଗାଁରେ ଏହି ଅଘଟଣ ଘଟିଛି । ୬୮ ବର୍ଷୀୟ ଓମକାର୍ ମୀନାଙ୍କ ଘର ଆଗରେ ଲୁହା ଗେଟ୍ ରହିଛି । ଗୁରୁବାର ଅଚାନକ ଲୁହା ଗେଟରେ ବିଦ୍ୟୁତ୍ ପ୍ରବାହିତ ହୋଇଥିଲା । ଫଳରେ ଓମକାର୍ ଗେଟରେ ଥିବା ବିଦ୍ୟୁତ୍ ସଂସ୍ପର୍ଶରେ ଆସି ଯାଇଥିଲେ । ଓମକାରଙ୍କ ଚିତ୍କାର ଶୁଣି ପତ୍ନୀ ଭମ୍ବରୀ ମୀନା ବଞ୍ଚାଇବାକୁ ଆସି ସେ ବି ବିଦ୍ୟୁତ୍ ସଂସ୍ପର୍ଶରେ ଆସିଥିଲେ ।
ବାପାମାଆଙ୍କୁ ବିଦ୍ୟୁତ୍ ଝଟକା ଲାଗିଥିବା ଦେଖି ପୁଅ ଦେବୀଲାଲ୍ ଓ ଝିଅ ମଙ୍ଗି ବଞ୍ଚାଇବାକୁ ଦୌଡ଼ି ଆସିଥିଲେ । ହେଲେ ସେମାନେ ବି ବାପାମାଆଙ୍କ ସହ ବିଦ୍ୟୁତ୍ ସଂସ୍ପର୍ଶରେ ଆସି ଘଟଣାସ୍ଥଳରେ ହିଁ ୪ ଜଣ ପ୍ରାଣ ହରାଇଛନ୍ତି । ସୂଚନା ପାଇ ପୋଲିସ ୪ ଜଣଙ୍କ ମୃତଦେହ ଉଦ୍ଧାର କରି ବ୍ୟବଚ୍ଛେଦ ଲାଗି ପଠାଇଛି ।
