କଟକ,୨୭/୧୧: ବାଲିଯାତ୍ରାରେ ଆଇନଶୃଙ୍ଖଳା ଡ୍ୟୁଟି ଆମର ନୁହେଁ । ଯାତ୍ରାକୁ ତଦାରଖ କରିବା ଓ ଦେଖଣାହାରୀଙ୍କୁ ସହଯୋଗ କରିବା ଆମର ଡ୍ୟୁଟି । ସୁରୁଖୁରୁରେ ଦେଖଣାହାରୀଙ୍କୁ ଯାତ୍ରା ପଡ଼ିଆରେ ବୁଲାଇବାରେ ସହଯୋଗ କରିବା ଆମର କର୍ତ୍ତବ୍ୟ । ତେଣୁ ଏହାକୁ ଅନ୍ୟ ପୂଜା ଡ୍ୟୁଟି ଭଳି ଭାବିବା ନାହିଁ । କାହା ଉପରେ ରାଗିବାନି । ଉତ୍ତମ ବ୍ୟବହାର ଦେଖାଇବା । ଆବଶ୍ୟକ ହେଲେ ବରିଷ୍ଠ ନାଗରିକଙ୍କୁ ସାଙ୍ଗରେ ନେଇ ଯାତ୍ରା ବୁଲାଇ ଦେଖାଇବା ।-ବାଲିଯାତ୍ରାରେ ନିୟୋଜିତ ହେବାକୁ ଥିବା ପୁଲିସ କର୍ମଚାରୀ ଓ ଅଧିକାରୀଙ୍କୁ ଆଜି ଡ୍ୟୁଟି ବୁଝାଇବା ବେଳେ ଏଭଳି କିଛି ପରାମର୍ଶ ଦେଇଛନ୍ତି ଡିସିପି ପିନାକ ମିଶ୍ର ।
‘କଟକ ଇନ୍ କଟକ’ରେ ବାଲିଡଙ୍ଗା, ଏଲ୍ଇଡିରେ ଝଲସିବ ୩୫ ଫୁଟ ଉଚ୍ଚ ବାଲୁକା କଳା
ତେବେ ପଡ଼ିଆରେ ଦେଖଣହାରୀଙ୍କ ସୁରକ୍ଷା ସହିତ ଟ୍ରାଫିକ୍ ପରିଚାଳନା ଏକ ବଡ଼ ଦାୟିତ୍ୱ । ଦିନକୁ ଦିନ ଗାଡ଼ି ବଢ଼ିବା ଓ ରାସ୍ତାରେ ଜାମ୍ ଲାଗିବା ଏକ ବଡ଼ ସମସ୍ୟା ପାଲଟିଛି । ତେଣୁ ଏହାକୁ ଉତ୍ତମଢଙ୍ଗରେ ପରିଚଳାନା କରିବା ଏକ ଚାଲେଞ୍ଜ । ସବୁ କର୍ମଚାରୀ ଧୈର୍ଯ୍ୟର ସହ ରାସ୍ତାରେ ରହି ଟ୍ରାଫିକ୍ ପରିଚାଳନା କରିବାକୁ ଡିସିପି ଅନୁରୋଧ କରିଛନ୍ତି । ସେହିପରି ବିଭିନ୍ନ ଛକରେ ଟ୍ରାଫିକ୍ କଟକଣା, ଯାତ୍ରୀଙ୍କୁ ଦୂର ପାର୍କିଂ ସ୍ଥଳରୁ ପଡ଼ିଆ ପର୍ଯ୍ୟନ୍ତ ଆଣିବା ବେଳେ ସହଯୋଗ ଓ କୌଣସି ଅଘଟଣ ହେଲେ ତତ୍ପରତା ଦେଖାଇବାକୁ ଆଜି ଡିସିପି ନିର୍ଦ୍ଦେଶ ଦେଇଛନ୍ତି । ସେହିପରି ରିଂ ବନ୍ଧରେ ରହିଥିବା ବିଚାରପତିଙ୍କ କ୍ୱାର୍ଟର୍ସ ନିକଟରେ ସୁରକ୍ଷା ଓ ଗହଳି ରୋକିବାକୁ ଅଧିକ ଧ୍ୟାନ ଦେବାକୁ କୁହାଯାଇଛି ।
ଚଳିତ ମୋଟ୍ ୨୧୦ ସେକ୍ସନ୍ ଫୋର୍ସ ବା ୭୦ ପ୍ଲାଟୁନ୍ ଫୋର୍ସ ଯାତ୍ରା ପାଇଁ ମୁତୟନ ହେବ । ସେହିପରି ମୋଟ୍ ୨୫୦ରୁ ଅଧିକ ଅଫିସରଙ୍କୁ ସୁରକ୍ଷା ଦାୟିତ୍ୱ ତଦାରଖ ପାଇଁ ନିୟୋଜିତ କରାଯିବ । ୪ ଜଣ ଏଏସ୍ପି ବା ଏଡିସିପି, ୧୭ ଜଣ ଡିଏସ୍ପି ବା ଏସିପି, ୪୪ ଜଣ ଇନ୍ସପେକ୍ଟର ବା ସର୍ଜେଣ୍ଟ୍, ୨୧୦ ଜଣ ଏସ୍ଆଇ-ଏଏସ୍ଆଇ, ୨୨୦ କନ୍ଷ୍ଟେବଳ ଓ ଗୋଟିଏ ପ୍ଲାଟୁନ୍ ଏସ୍ଓଜି ମୁତୟନ ହେବେ । ପୂରା ଯାତ୍ରା ଉପରେ ନଜର ରଖିବା ପାଇଁ ପଡ଼ିଆରେ ୫ଟି ୱାଚ୍ ଟାୱାର ନିର୍ମାଣ ହୋଇଛି ।
ଏଥର ବାଲିଯାତ୍ରାରେ ‘ଡିଜିଟାଲ୍ ଏସି ହ୍ୟାଙ୍ଗର୍’ ଆକର୍ଷଣ, ମଜା ଦେବ ହୋଲୋଗ୍ରାଫିକ୍ ଓ ଆନାମରଫିକ୍ ସୋ'
ସେହିପରି କୌଣସି ଅପରାଧିକ ଅଘଟଣ ଏଡାଇବା ପାଇଁ ବିଭିନ୍ନ ପ୍ରବେଶ ଓ ପ୍ରସ୍ଥାନ ପଥରେ ୧୦ଟି ମୋର୍ଚ୍ଚା ଗଠନ ହୋଇଛି । ଏଠାରେ ବନ୍ଧୁକଧାରୀ ପୁଲିସ ମୁୟତନ ହେବେ । ଦୁଇ ପଡ଼ିଆରେ ପୁଲିସ ବ୍ୟବସ୍ଥା ନିୟନ୍ତ୍ରଣ କରିବାକୁ ୨୬ଟି ଏଡ୍ ପୋଷ୍ଟ୍ ଗଠନ କରାଯାଇଛି । ଉପର ପଡ଼ିଆରେ ୫ଟି ଓ ତଳ ପଡ଼ିଆରେ ୨୧ଟି । ତନ୍ମଧ୍ୟରୁ ୪ଟିରେ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ଏଠାରେ ଦେଖଣାହାରୀଙ୍କ ସହାୟତା ପାଇଁ ୪ ପ୍ରକାର ଟିମ୍ ରହିବେ । ମହିଳା, ଦିବ୍ୟାଙ୍ଗ, ବରିଷ୍ଠ ନାଗରିକ ଓ ଜିନିଷପତ୍ର ହଜିବା ବିଷୟ ପାଇଁ ଏହି ୪ଟି ଟିମ୍ କାମ କରିବ । ସେଠାରେ ହୁଇଲ୍ ଚେୟାର ରହିବ । ଚୋରି, ଛିନ୍ତାଇ ବିଷୟରେ ମଧ୍ୟ ସେଠାରେ ଅଭିଯୋଗ କରିହେବ । ଭିଡ଼ ଭିତରେ ଅସାଧୁ ବ୍ୟକ୍ତିଙ୍କୁ ଜଗିବା ପାଇଁ ପ୍ରତି ଧାଡ଼ିରେ ସାଦା ପୋଷାକରେ ପୁଲିସ ମୁତୟନ ହେବେ ।