ବାରିପଦା, ୧୧/୯ : ସ୍ଵତନ୍ତ୍ର ଉନ୍ନୟନ ପରିଷଦ ତରଫରୁ ଆୟୋଜିତ ଆଦି ମାରାଥନ ବିଜୁ ଜନତା ଦଳର ପିକନିକ୍ ବ୍ୟତୀତ ଆଉ କିଛି ନୁହେଁ ବୋଲି ବିଚ୍ଛିନ୍ନାଞ୍ଚଳ ଆଦିବାସୀ ଓ ମୂଳବାସୀ ମଞ୍ଚ ସମାଲୋଚନା କରିଛି। ସରକାରୀ ଟଙ୍କାରେ ମାରାଥନ ଦୌଡ଼ କରି ବ୍ୟାପକ ଦୁର୍ନୀତି କରାଯାଇଛି ବୋଲି ଅଭିଯୋଗ କରାଯାଇଛି। ଆଦିବାସୀଙ୍କ ସହିତ ମୂଳ ଆଦିବାସୀଙ୍କର ଯେଉଁ ଭୂମିକା ରହିଛି ଏକଥା ସ୍ଵତନ୍ତ୍ର ଉନ୍ନୟନ ପରିଷଦ ସ୍ବୀକାର ନକରି ମୂଳ ଆଦିବାସୀମାନଙ୍କୁ ସାମିଲ ନ କରିବା ନିନ୍ଦନୀୟ ନିଶ୍ଚୟ। 

ସାମାଜିକ କ୍ଷେତ୍ରରେ ଦୁର୍ବଳ ଶ୍ରେଣୀ ହିସାବରେ ଆଦିବାସୀଙ୍କ ପାଇଁ ରାଜନୀତି, ଶିକ୍ଷା ଓ ଚାକିରି କ୍ଷେତ୍ରରେ ସଂରକ୍ଷଣ ବ୍ୟବସ୍ଥା ରହିବା ପରି କ୍ରୀଡା କ୍ଷେତ୍ରରେ ସ୍ଵତନ୍ତ୍ର ସଂରକ୍ଷଣ ବ୍ୟବସ୍ଥା କରି ଆଦିବାସୀମାନଙ୍କୁ ଦୁର୍ବଳ ବୋଲି ପ୍ରମାଣିତ କରାଯାଉଛି। ଆଦିବାସୀଙ୍କ ଜାହିରା, ଦିଶାଓଲି, ସାର୍ନା, ବଡ ମଥାନ ଆଦି ନାମରେ ଥିବା ପବିତ୍ର ଉପବନର ସୁରକ୍ଷା ତଥା ସଂରକ୍ଷଣ ସାଙ୍ଗକୁ ସାଂସ୍କୃତିକ ପରିଚୟକୁ ବଞ୍ଚେଇ ରଖିବା ପାଇଁ ସୃଷ୍ଟି ହୋଇଥିବା ସ୍ଵତନ୍ତ୍ର ଉନ୍ନୟନ ପରିଷଦ ତାର ମୌଳିକ ଲକ୍ଷରୁ ବିଚ୍ୟୁତ ହୋଇଛି ବୋଲି ସମାଲୋଚନା କରାଯାଉଛି। ଓମ୍ବା ଡିସିର ୨୨ହଜାର କୋଟିରୁ ଉର୍ଦ୍ଧ୍ଵ ଟଙ୍କା ମୟୂରଭଞ୍ଜ ସମେତ ୪ଟି ଜିଲ୍ଲା ପାଇଁ ଖର୍ଚ୍ଚ ହେବା ପାଇଁ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଥିଲା। 

କ୍ରୀଡ଼ା ଓ ସଂସ୍କୃତିର ବିକାଶ ପାଇଁ ଏହି ଟଙ୍କାରେ ପ୍ରତ୍ୟେକ ପଞ୍ଚାୟତରେ ଗୋଟିଏ ଉନ୍ନତମାନର ମିନି ଷ୍ଟାଡିୟମ ଓ ପଞ୍ଚାୟତ ଭବନ ନିର୍ମାଣ କରାଯାଇ ପାରିଥାନ୍ତା ମାତ୍ର ରାଜ୍ୟ ସରକାର ସୁପ୍ରିମକୋର୍ଟର ନିର୍ଦ୍ଦେଶକୁ ଅବମାନନା କରି ଏହାକୁ ରାଜ୍ୟ ଯୋଜନାରେ ଖର୍ଚ୍ଚ କରି ଏହି ଅଞ୍ଚଳର ସ୍ଵତନ୍ତ୍ର ଅଧିକାରକୁ କ୍ଷୁର୍ଣ୍ଣ କରିଛନ୍ତି ବୋଲି ରାମଚନ୍ଦ୍ର ହାଁସଦା ବିଚ୍ଛିନ୍ନାଞ୍ଚଳ ଆଦିବାସୀ ଓ ମୁଲବାସୀ ମଞ୍ଚର ସଭାପତି ରାମଚନ୍ଦ୍ର ହେମ୍ବ୍ରମ, ସାଧାରଣ ସମ୍ପାଦକ କର୍ତ୍ତିକେଶ୍ୱର୍ ମାଝୀ ଏବଂ ପଞ୍ଚାନନ ମୁର୍ମୁ, ଗୋପାଳ ଚନ୍ଦ୍ର ମୁର୍ମୁ, ହେମନ୍ତ ମାଝୀ, ରଘୁନାଥ ଟୁଡୁ, ସୂର୍ଯ୍ୟକାନ୍ତ ମୁର୍ମୁ, ମୋହନ ମାରାଣ୍ଡି ପ୍ରମୁଖ ସମାଲୋଚନା କରିବା ସହ ଆଗାମୀ ଦିନରେ ମଞ୍ଚ ଅଦାଲତର ଆଶ୍ରୟ ନେବ ବୋଲି ସୂଚନା ଦେଇଛନ୍ତି।