ବେଜିଂ,୧୭/୧୧: ଚୀନ୍ ଭାରତ-ଭୁଟାନ ସୀମା ନିକଟ ତିବ୍ଦତରେ ଥିବା ଏକ ଗାଁକୁ ସହର ଭାବେ ବିକଶିତ କରୁଛି । ଏହି ନୂଆ ସହର ଚୀନ୍ ସମେତ ସମଗ୍ର ବିଶ୍ୱର ନଜର ଟାଣୁଛି । ପଶ୍ଚିମରେ ଭୁଟାନ ଓ ଦକ୍ଷିଣରେ ଭାରତ ସୀମାକୁ ଲାଗିଥିବା ଏହି ମହତ୍ତ୍ୱପୂର୍ଣ୍ଣ ସହର ୧୯୬୨ ଯୁଦ୍ଧରେ ମଧ୍ୟ ଚର୍ଚ୍ଚାରେ ରହିଥିଲା । ସେହି ସମୟରେ ଏଠାରେ ଥିବା ଗାଁରେ ଚୀନ୍ ପକ୍ଷରୁ ବହୁସଂଖ୍ୟକ ସୈନ୍ୟ ଓ ସାମରିକ ଉପକରଣ ଠୁଳ କରାଯାଇଥିଲା । ନିକଟରେ ଚୀନ୍ର ସରକାରୀ ମିଡିଆ ଗ୍ଲୋବାଲ ଟାଇମ୍ସରେ ଏହି ସହରର ଏକ ଫଟୋ ସେୟାର କରାଯାଇଛି । ସେହି ଫଟୋରେ ଧାଡିଧାଡି ହୋଇ ଘରଗୁଡିକ ଦେଖିବାକୁ ମିଳୁଛି । ସେଥିରେ ଚୀନ୍ ଦର୍ଶାଇଛି ଯେ ଏଠାରେ ରହିଥିବା ପ୍ରାଚୀନ ଗ୍ରାମର ବିକାଶ କରାଯାଉଛି । ବାସ୍ତବରେ ଏଭଳି କହି ଚୀନ୍ ସେଠାରେ ସହର ପ୍ରତିଷ୍ଠା କରିଛି । ସୀମାରେ ଭିତ୍ତିଭୂମି ବିକାଶ କରିବା ହେଉଛି ଚୀନ୍ର ପ୍ରକୃତ ଉଦ୍ଦେଶ୍ୟ ।
ଚୀନ୍ ଦେଖାଇବାକୁ ଚାହୁଁଛି କି ସୀମାକୁ ଲାଗିଥିବା କ୍ଷେତ୍ରର ବିକାଶ ଲାଗି ନିଜର ପ୍ରତିଦ୍ୱନ୍ଦ୍ୱୀଙ୍କ ଠାରୁ ଅଧିକ ଶକ୍ତିଶାଳୀ । ଚୀନ୍ ଯେଉଁ ଗାଁର ବିକାଶ କରି ତାକୁ ସହରରେ ପରିଣତ କରିଛି ତାର ନାଁ ହେଉଛି ଲେବୁଗୌ । ଏହା ଭାରତ-ଭୁଟାନ ସୀମାର ଦକ୍ଷିଣ କୋଣରେ ଅବସ୍ଥିତ ଏକ ସ୍ଥାନ । ଏଠାରେ ମୋନପା ଜାତୀୟ ଲୋକମାନେ ବସବାସ କରି ଆସୁଛନ୍ତି । ଗ୍ଲୋବାଲ ଟାଇମ୍ସ ରିପୋର୍ଟ ଅନୁସାରେ ୧୯୬୨ ଭାରତ-ଚୀନ ଯୁଦ୍ଧ ବେଳେ ଏହି ସ୍ଥାନ ଏକ ପ୍ରମୁଖ ଯୁଦ୍ଧକ୍ଷେତ୍ର ଥିଲା । ତିବ୍ଦତ ସୈନ୍ୟ କମାଣ୍ଡ୍ର ତତ୍କାଳୀନ କମାଣ୍ଡର ଜେନେରାଲ ଝାଙ୍ଗ ଗୁଓହୁଆଙ୍କ ଫ୍ରଣ୍ଟ ଲାଇନ କମାଣ୍ଡ ପୋଷ୍ଟ୍ର ସାଇଟ୍ ବର୍ତ୍ତମାନ ମଧ୍ୟ ସେଠାରେ ରହିଛି । ଲେବୁଗୌର ଜନସଂଖ୍ୟା ହେଉଛି ୧୫୦୦ । ୨୦୨୦ରେ ପୂର୍ବ ଲଦାଖର ଗଲୱାନ ଘାଟିରେ ଦୁଇଦେଶର ସୈନ୍ୟଙ୍କ ମଧ୍ୟରେ ରକ୍ତକ୍ତ ସଂଘର୍ଷ ପରେ ଏଲଏସି (ପ୍ରକୃତ ନିୟନ୍ତ୍ରଣ ରେଖା)ରେ ସୃଷ୍ଟି ହୋଇଥିବା ଉତ୍ତେଜନା ପରିପ୍ରେକ୍ଷୀରେ ଚୀନ୍ ଏହି ଅଞ୍ଚଳକୁ ନ୍ୟାସନାଲ ରେଡ୍ ଟୁରିଜିମ ରୁଟ୍ରେ ସାମିଲ କରିଥିଲା । ଯାହା ଫଳରେ କି ଚୀନ ନାଗରିକଙ୍କ ମଧ୍ୟରେ ଦେଶଭକ୍ତିର ଭାବନା ଜାଗ୍ରତ ହୋଇପାରିବ ।
ଚୀନ୍ରେ ଏକଦଳୀୟ ସରକାର ଚାଲିଥିବା ପରିପ୍ରେକ୍ଷୀରେ ଏଠାରେ ଚୀନୀ ପିପୁଲ୍ସ କଂଗ୍ରେସର ପ୍ରଭାବ ରହିଛି । କୋଲ୍ଜ୍ୟାଙ୍ଗ ତେନ୍ଜିନ ସ୍ଥାନୀୟ ଚୀନୀ ପିପୁଲ୍ସ କଂଗ୍ରେସ ଅଧ୍ୟକ୍ଷ ତଥା ମୋନପା ଜାତୀୟ ଟାଉନସିପ ପାର୍ଟି କମିଟିର ଉପସଚିବ ଭାବେ କାର୍ଯ୍ୟ କରୁଛନ୍ତି । ତାଙ୍କର କହିବାନୁଯାୟୀ ସୀମାରେ କୌଣସି ତାରବାଡ ନଥିବାରୁ ଏଠାରେ ବାହାର ଲୋକଙ୍କ ଅନୁପ୍ରବେଶ ଘଟୁଛି । ତେଣୁ ଏହି ଅଞ୍ଚଳର ସୀମାରେ ଚୀନ୍ ଲାଲ ପତାକା ରଙ୍ଗ ଲଗାଇ ତାକୁ ନିଜ ସୀମା ଅଞ୍ଚଳ ଭାବେ ଚିହ୍ନଟ କରୁଛି । ଲେବୁଗୌରେ ପ୍ରତିଷ୍ଠା ହୋଇଥିବା ନୂଆ ସହରରେ ହସ୍ପିଟାଲ, ସ୍କୁଲ, କିଣ୍ଡରଗାର୍ଟେନ ଓ ଅନ୍ୟାନ୍ୟ ଭିତ୍ତିଭୂମିର ବିକାଶ କରାଯାଇଛି । ଏହାର ମୁଖ୍ୟ ଉଦ୍ଦେଶ୍ୟ ହେଉଛି ସୀମାନ୍ତବର୍ତ୍ତୀ ଅଞ୍ଚଳରେ ଲୋକମାନଙ୍କୁ ବସବାସ କରିବାକୁ ପ୍ରୋତ୍ସାହିତ କରିବା ।
ଚୀନର ଏହି ସହରକୁ ତିବ୍ଦତର ମୁଖ୍ୟ ବିଦ୍ୟୁତ ଗ୍ରୀଡ୍ ସହିତ ସଂଯୋଗ କରାଯାଇଛି । ଯାହାଫଳରେ ଏଠାକୁ ୨୪ ଘଣ୍ଟିଆ ବିଜୁଳି ସେବା ଯୋଗାଇ ଦିଆଯାଉଛି । ଏଠାରେ ଦୀର୍ଘ ବର୍ଷ ଧରି ଲାଗି ରହିଥିବା ବିଦ୍ୟୁତ ସମସ୍ୟା ଏବେ ଦୂର ହୋଇଛି । ଟେଲି ଯୋଗାଯୋଗ ବ୍ୟବସ୍ଥାକୁ ସୁଦୃଢ଼ କରାଯାଇଛି । ଫଳରେ ଏଠାକାର ଦୂରଦୁରାନ୍ତ ଅଞ୍ଚଳକୁ ଟେଲିକମ୍ ନେଟୱାର୍କ ସୁବିଧା ମିଳିପାରୁଛି । ଏଠାରେ ପିଲାଙ୍କ ପଢ଼ିବା ପାଇଁ ଉନ୍ନତ ସ୍କୁଲ ପ୍ରତିଷ୍ଠା କରାଯାଇଛି ଏବଂ ଲୋକମାନଙ୍କୁ ସରକାର ରିହାତି ମୂଲ୍ୟରେ ଅନେକ ସାମଗ୍ରୀ ଯୋଗାଉଛନ୍ତି ।