ହାଇଦ୍ରାବାଦ, ୦୧/୧୨: ପୁଣି ତେଲଙ୍ଗାନା-ଆନ୍ଧ୍ରପ୍ରଦେଶ ମୁହାଁମୁହିଁ । ଗୁରୁବାର ତେଲଙ୍ଗାନା ବିଧାନସଭା ନିର୍ବାଚନ ପାଇଁ ମତଦାନ ଚାଲିଥିବା ବେଳେ ଆନ୍ଧ୍ରପ୍ରଦେଶର ମନମାନି ଦେଖିବାକୁ ମିଳିଛି । ଆନ୍ଧ୍ରପ୍ରଦେଶର ଜଳସେଚନ ଅଧିକାରୀ ତେଲଙ୍ଗାନାରେ ବଳପୂର୍ବକ ପଶି ଯାହା କରିଛନ୍ତି, ସେଥିପାଇଁ ଏବେ ୨ ରାଜ୍ୟ ମଧ୍ୟରେ ଉତ୍ତେଜନା ବୃଦ୍ଧି ପାଇଛି ।
ଆନ୍ଧ୍ରପ୍ରଦେଶର ପାନୀୟ ଜଳ ଆବଶ୍ୟକତା ପୂରଣ କରିବା ଲାଗି ନିର୍ବାଚନ ଭିତରେ ୪୦୦ରୁ ଅଧିକ ପୋଲିସ କର୍ମଚାରୀ ତେଲଙ୍ଗାନାରେ ପଶି ନାଗାର୍ଜୁନସାଗର ଡ୍ୟାମର ଏକ ଗେଟ୍ ଖୋଲି ଦେଇଥିଲେ । ଗେଟ୍ ଖୋଲିବା ପୂର୍ବରୁ ଆନ୍ଧ୍ର ପୋଲିସ ବନ୍ଧ ଉପରେ ଅଧ ଘଣ୍ଟାରୁ ଅଧିକ ସମୟ ଧରି କବଜା କରି ରହିଥିଲା ।
Exit Polls: ତେଲେଙ୍ଗାନାରେ ବିଆରଏସ ଏବଂ କଂଗ୍ରେସ ମଧ୍ୟରେ ହୋଇପାରେ ଜୋରଦାର ଟକ୍କର
ଆନ୍ଧ୍ରପ୍ରଦେଶ ଜଳସଚେନ ବିଭାଗର ମୁଖ୍ୟ ଯନ୍ତ୍ରୀ ନାରାୟଣ ରେଡ୍ଡୀ କହିଛନ୍ତି, ରାଜ୍ୟ ପାଖରେ ୩ ହଜାର କ୍ୟୁସେକ୍ ପାଣି ଛାଡ଼ିବା ଲାଗି ଗେଟ୍ ଖୋଲିବା ଛଡ଼ା ଅନ୍ୟ କୌଣସି ବିକଳ୍ପ ନଥିଲା । ସେ କହିଛନ୍ତି ରାଜ୍ୟରେ ଏବେ ପାନୀୟ ଜଳର ଘୋର ସଂକଟ ଦେଖା ଦେଇଛି ।
ସେ ଆହୁରି କହିଛନ୍ତି, ୨ ରାଜ୍ୟ ମଧ୍ୟରେ ଉତ୍ତେଜନାରୁ ବର୍ତ୍ତିବା ଲାଗି ଅଟକି ରହିଥିଲୁ । କିନ୍ତୁ ସ୍ଥିତି ଅଣାୟତ୍ତ ହୋଇଥିଲା । ପିଇବା ପାଇଁ ପାଣି ବି ସମୟରେ ଛଡ଼ା ଯାଉ ନଥିଲା । ଫଳରେ ଡ୍ୟାମର ଗେଟ୍ ଖୋଲିବାକୁ ବାଧ୍ୟ ହେଲୁ ।
୫ ରାଜ୍ୟ ନିର୍ବାଚନ ସରୁ ସରୁ ମହଙ୍ଗା ମାଡ଼, ବଢ଼ିଲା ବ୍ୟବସାୟିକ ଏଲପିଜି ସିଲିଣ୍ଡର ଦାମ
ଜଳସେଚନ ଅଧିକାରୀଙ୍କ ଅନୁସାରେ, କୃଷ୍ଣା ନଦୀର ବାମ ପାର୍ଶ୍ୱ ତେଲଙ୍ଗାନା କ୍ଷେତ୍ରରେ ଆସୁଥିବା ବେଳେ ଡାହାଣ ପାର୍ଶ୍ୱ ଆନ୍ଧ୍ରପ୍ରଦେଶରେ ଆସୁଛି । ଆଉ ଏହି ବନ୍ଧରେ ୨୬ଟି ଗୁରୁତ୍ୱପୂର୍ଣ୍ଣ ଗେଟ୍ ରହିଛି । ଏଥିରୁ ୧୩ଟି ଗେଟ୍ ତେଲଙ୍ଗାନାରେ ଆସୁଥିବା ବେଳେ ଅନ୍ୟ ୧୩ଟି ଆନ୍ଧ୍ରପ୍ରଦେଶରେ । ଗୁରୁବାର ଆନ୍ଧ୍ରପୋଲିସ ଡ୍ୟାମର ଅଧା ଅଂଶକୁ ନିୟନ୍ତ୍ରଣକୁ ନେଇଛି । ଅନ୍ୟପଟେ ତେଲଙ୍ଗାନା ବି ଡ୍ୟାମରେ ଅତିରିକ୍ତ ପୋଲିସ ମୁତୟନ କରିଛି ।
ଏବେ ତେଲଙ୍ଗାନା ନିର୍ବାଚନ ଫଳାଫଳ ଆସିବା ପରେ ଆନ୍ଧ୍ରପ୍ରଦେଶ ସହ ତିକ୍ତତା ବୃଦ୍ଧି ପାଇପାରେ । ତେବେ ଆନ୍ଧ୍ରପୋଲିସ ଯେଉଁ ଗେଟ୍ ଖୋଲିଛି ସେଠାରେ ଅଧିକ ଆନ୍ଧ୍ର ପୋଲିସ ମୁତୟନ ହୋଇଛନ୍ତି । ଫଳରେ ଉକ୍ତ ଗେଟକୁ ବନ୍ଦ କରିବା ଲାଗି ଅଧିକ ଉତ୍ତେଜନା ସୃଷ୍ଟି ହୋଇପାରେ ।