ଡେରାଡୁନ୍, ୧୩/୧୧: ରବିବାର ସକାଳେ ଉତ୍ତରକାଶୀରେ ଟନେଲ୍ ଭୁଶୁଡ଼ିବା ଘଟଣାରେ ଉଦ୍ଧାର କାର୍ଯ୍ୟ ଜାରି ରହିଛି । ବ୍ରହ୍ମାଖୋଲ-ଯମୁନୋତ୍ରୀ ଜାତୀୟ ରାଜପଥର ସିଲକ୍ୟାରାରୁ ଡଣ୍ଡାଳଗାଓଁ ମଧ୍ୟରେ ନିର୍ମାଣାଧୀନ ସୁଡ଼ଙ୍ଗର ୫୦ ମିଟର ଅଚାନକ ଭୁଶୁଡ଼ି ପଡ଼ିଥିଲା । ଫଳରେ ଭଗ୍ନାଂଶ ଭିତରେ ୪୦ ଶ୍ରମିକ ଫସି ରହିଛନ୍ତି । ଟନେଲରେ ଫସିଥିବା ଶ୍ରମିକଙ୍କୁ ଉଦ୍ଧାର ପାଇଁ ଭଗ୍ନାଂବଶେଷକୁ ହଟାଇବା ଜାରି ରହିଛି ।

ଉଦ୍ଧାର କାର୍ଯ୍ୟରେ ଏନଡିଆରଏଫ୍, ଏସଡିଆରଏଫ୍, ପୋଲିସ ସହ ସ୍ଥାନୀୟ ପ୍ରଶାସନ ନିୟୋଜିତ ରହିଛି । ୱାକିଟକି ସାହାଯ୍ୟରେ ଶ୍ରମିକଙ୍କ ସହ ଯୋଗାଯୋଗ କରାଯାଉଛି । ଏବେ ସମସ୍ତ ଶ୍ରମିକ ସୁରକ୍ଷିତ ଥିବା ଜଣାପଡ଼ିଛି । ଟନେଲରେ ପାଣି ପାଇଁ ପଡ଼ିଥିବା ପାଇପ୍ ମାଧ୍ୟମରେ ଅକ୍ସିଜେନ୍ ଯୋଗାଣ ହେଉଛି । ଉକ୍ତ ପାଇପରେ ଚାପ ପ୍ରୟୋଗ କରାଯାଇ ଶ୍ରମିକଙ୍କ ପାଖକୁ ରାତିରେ ଶୁଖିଲା ଖାଦ୍ୟ ପଠା ଯାଇଥିଲା ।

ଉତ୍ତରକାଶୀ NHରେ ଭୁଶୁଡ଼ିଲା ନିର୍ମାଣାଧୀନ ଟନେଲର ୫୦ ମିଟର, ଫସିଛନ୍ତି ୩୬ ଶ୍ରମିକ

ସୁଡ଼ଙ୍ଗ ଭିତରେ ବିହାରର ୪ ଜଣ ଶ୍ରମିକ, ଉତ୍ତରାଖଣ୍ଡର ୨ ଜଣ, ପଶ୍ଚିମବଙ୍ଗର ୩ ଜଣ, ଉତ୍ତରପ୍ରଦେଶର ୮ ଜଣ, ଓଡ଼ିଶାର ୫ ଜଣ, ଝାଡ଼ଖଣ୍ଡର ୧୫ ଜଣ, ଆସାମର ୨ ଜଣ ଓ ହିମାଚଳ ପ୍ରଦେଶର ଜଣେ ଶ୍ରମିକ ଫସିଥିବା ଜଣାପଡ଼ିଛି । ଏବେ ଉଦ୍ଧାରକାରୀ ଦଳ ଫସିଥିବା ଶ୍ରମିକଙ୍କ ଠାରୁ ୬୦ ମିଟର ଦୂରରେ ରହିଥିବା କହିଛି ପ୍ରଶାସନ ।

ଉତ୍ତରାକାଶୀରେ ଏହି ସୁଡ଼ଙ୍ଗ ଅଲ୍ ୱେଦର୍ ରୋଡ୍ ପ୍ରକଳ୍ପର ଅଂଶ । ଫସିଥିବା ଶ୍ରମିକଙ୍କୁ ଉଦ୍ଧାର ପାଇଁ ପ୍ରାୟ ୧୫୦ ଜଣ ଲାଗିଛନ୍ତି । ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଉଦ୍ଧାର କାର୍ଯ୍ୟ ଉପରେ ନଜର ରଖିଛନ୍ତି । ଉଦ୍ଧାର କାର୍ଯ୍ୟରେ ନିୟୋଜିତ ବିଭାଗର ଦୀପାବଳି ଛୁଟି ବାତିଲ୍ କରି ଦିଆଯାଇଛି । 

ମହିଳାଙ୍କ ସମେତ ୩ ପୁଅଙ୍କୁ ଛୁରୀ ଭୁସି ହତ୍ୟା, ଖେଳୁଥିବା ବେଳେ ୧୨ ବର୍ଷର ବାଳକକୁ ବି ମାରିଦେଲେ

ସବୁ ପାଗ ପାଇଁ ଅନୁକୂଳ ଚାରି ଧାମ ସଡ଼କ ଯୋଜନାରେ ନିର୍ମାଣ ହେଉଥିବା ଏହି ସୁଡ଼ଙ୍ଗ ନିର୍ମିତ ହେଲେ ଉତ୍ତରକାଶୀରୁ ଯମୁନୋତ୍ରୀ ଦୂରତା ମାତ୍ର ୨୬ କିଲୋମିଟର ରହିବ । ଏହି ଟନେଲର ଲମ୍ବ ୪.୫ କିଲୋମିଟର ହୋଇଥିବା ବେଳେ ୪ କିଲୋମିଟର ନିର୍ମାଣ ସରିଛି । ୨୦୨୪ ମାର୍ଚ୍ଚ ସୁଦ୍ଧା ସୁଡ଼ଙ୍ଗ ନିର୍ମାଣ ସାରିବାକୁ ଲକ୍ଷ୍ୟ ରଖା ଯାଇଛି ।