ଆଠଗଡ଼/ଖୁଣ୍ଟୁଣୀ,୨୯/୩: କଟକ ଜିଲ୍ଲା ଖୁଣ୍ଟୁଣୀ ଥାନା ପୁଲିସକୁ ମିଳିଛି ବଡ଼ ସଫଳତା । ଥାନା ସମ୍ମୁଖ ୫୫ ନମ୍ବର ଜାତୀୟ ରାଜପଥ ଦେଇ ଯାଉଥିବା ଏକ ଗାଡ଼ିରୁ ୩୭ ବସ୍ତା ନକଲି ଜର୍ଦ୍ଦା ସହ ୨୨ଲକ୍ଷ ୩୯ ହଜାର ୭ଶହ ଟଙ୍କା ଜବତ କରିଛି ପୁଲିସ । ଏହି ଘଟଣାରେ ପୁଲିସ ମୁଖ୍ୟ ଅଭିଯୁକ୍ତ ଓ ତା’ର ସହଯୋଗୀକୁ ଅଟକ ରଖି ପଚରାଉଚରା କରୁଛି । ଅଟକ ଦୁଇ ଅଭିଯୁକ୍ତ ହେଲେ ଟାଙ୍ଗୀ ଥାନା ଅଧୀନ ଚଢ଼େଇପଦାର ସୁଶାନ୍ତ ସାହୁ(୪୫) ଓ ଯାଜପୁର ଜିଲ୍ଲା ବଡ଼ଚଣା ଅଞ୍ଚଳର ଶିବ ପ୍ରସାଦ ବେହେରା(୪୦) । ଅଭିଯୁକ୍ତଙ୍କ ସୂଚନା କ୍ରମେ ପୁଲିସ ଟାଙ୍ଗୀ ଥାନା ଅଧୀନ ଏକାଧିକ ସ୍ଥାନରେ ଚଢ଼ଉ କରି ବିପୁଳ ନକଲି ଜର୍ଦ୍ଦା ପ୍ରସ୍ତୁତିରେ ବ୍ୟବହୃତ ସାମଗ୍ରୀ ସମେତ ନକଲି ଜର୍ଦ୍ଦା ଜବତ କରିଥିବା ଜଣାପଡ଼ିଛି । ଏହି ବେପାର ସମଗ୍ର ରାଜ୍ୟକୁ ବ୍ୟାପୀ ଥିବା ପ୍ରାଥମିକ ତଦନ୍ତରୁ ପୁଲିସ ଜାଣିପାରିଛି ।
ପୁଲିସ ସୂଚନା ମୁତାବକ, କୌଣସି ସୂତ୍ରରୁ ଖବର ପାଇ ଗୁରୁବାର ଖୁଣ୍ଟୁଣୀ ଥାନା ଅଧିକାରୀ ରଞ୍ଜନ କୁମାର ପ୍ରଧାନଙ୍କ ନେତୃତ୍ୱରେ ଏସଆଇ ପ୍ରିୟଦର୍ଶୀ ସେଠୀ ଓ ସସ୍ମିତା ପରିଡ଼ାଙ୍କ ସମେତ ଅନ୍ୟ ପୁଲିସ କର୍ମଚାରୀ ୫୫ ନମ୍ବର ଜାତୀୟ ରାଜପଥ ଉପରେ କଡ଼ା ନଜର ରଖିଥିଲେ । ଢେଙ୍କାନାଳ ପଟୁ ଆସୁଥିବା ଏକ ବୋଲେରୋ (ଓଡି-୦୫-ବିଏଲ-୪୦୭୭) କୁ ଥାନା ନିକଟରେ ଅଟକାଇ ଯାଞ୍ଚ୍ କରିଥିଲେ । ଛାନ୍ଭିନ୍ ବେଳେ ଗାଡ଼ିରେ ଜର୍ଦ୍ଦା ଚାଲାଣ ହେଉଥିବା ଜଣାପଡ଼ିଥିଲା । ହେଲେ ଏ ସମ୍ପର୍କିତ କୌଣସି କାଗଜପତ୍ର ଚାଲାଣକାରୀଙ୍କ ନିକଟରେ ନଥିଲା । ପୁଲିସ ଗାଡ଼ିରୁ ୩୭ ବସ୍ତା ଜର୍ଦ୍ଦା ଜବତ କରିଥିଲା । ଏହା ସହିତ ଗାଡ଼ିର ସିଟ୍ ତଳୁ ୨୨ ଲକ୍ଷ ୩୯ ହଜାର ୭ଶହ ଟଙ୍କା ଜବତ କରଥିଲା । ଏହି ଘଟଣାରେ ସମ୍ପୃକ୍ତ ଥିବା ଅଭିଯୋଗରେ ପୁଲିସ ଦୁଇଜଣଙ୍କୁ ଅଟକ ରଖି ପଚରା ଉଚରା କରିବାରୁ ଜବତ ୩୭ଟି ବସ୍ତାରେ ନକଲି ଜର୍ଦ୍ଦା ଥିବା ଜାଣିବାକୁ ପାଇଥିଲା । ପରେ ଅଟକ ଦୁଇ ଅଭିଯୁକ୍ତଙ୍କ ସୂଚନା କ୍ରମେ ପୁଲିସ ଟାଙ୍ଗୀ ଥାନା ଅଧୀନ ଏକାଧିକ ସ୍ଥାନରେ ଚଢ଼ଉ କରି ବିପୁଳ ପରିମାଣର ନକଲି ଜର୍ଦ୍ଦା ପ୍ରସ୍ତୁତିରେ ବ୍ୟବହୃତ ସାମଗ୍ରୀ ଓ ନକଲି ଜର୍ଦ୍ଦା ଜବତ କରିଥିବା ପୁଲସ ସୂତ୍ରରୁ ଜଣାପଡ଼ିଛି । ଘଟଣାର ତଦନ୍ତ ଚାଲିଥିବା ଯୋଗୁଁ ଏ ସମ୍ପର୍କିତ ସବିଶେଷ ତଥ୍ୟ ପୁଲିସ ପ୍ରକାଶ କରିନାହିଁ । ଏହି କାରବାର କଟକ, ଢେଙ୍କାନାଳ ସମେତ ସମଗ୍ର ରାଜ୍ୟକୁ ବ୍ୟାପୀ ଥିବା ପୁଲିସ ପ୍ରାଥମିକ ତଦନ୍ତରୁ ଜାଣିପାରିଛି ।
