ନୂଆଦିଲ୍ଲୀ, ୨୪/୦୭ : ମୋଦି ସରକାରଙ୍କ ତୃତୀୟ କାର୍ଯ୍ୟକାଳର ପ୍ରଥମ ବଜେଟ୍ରେ ମହିଳାଙ୍କୁ ମିଳିଛି ସ୍ୱତନ୍ତ୍ର ପ୍ରାଥମିକତା। ଅର୍ଥମନ୍ତ୍ରୀ ନିର୍ମଳା ସୀତାରମଣ ମହିଳାଙ୍କ ବିକାଶ ସହ ଜଡି଼ତ ଯୋଜନା ଲାଗି ୩ ଲକ୍ଷ କୋଟିରୁ ଅଧିକ ଅର୍ଥ ଆବଣ୍ଟନ କରିଛନ୍ତି । ଏହି ପଦକ୍ଷେପ ଶ୍ରମଶକ୍ତିରେ ମହିଳାଙ୍କ ଯୋଗଦାନ ବଢ଼ାଇବ । ଏହା ସରକାରଙ୍କ ପ୍ରତିବଦ୍ଧତାର ସଙ୍କେତ ବୋଲି ସେ କହିଛନ୍ତି । ନିଜ ବଜେଟ୍ ଅଭିଭାଷଣରେ ସୀତାରମଣ ୧୩ ଥର ‘ମହିଳା’ ଶବ୍ଦ ଉଚ୍ଚାରଣ କରିଥିଲେ । ଅର୍ଥମନ୍ତ୍ରୀ ଅନେକପ୍ରକାର ମହିଳା କୈନ୍ଦ୍ରିକ ଯୋଜନା ଆରମ୍ଭ କରିବାକୁ ମଧ୍ୟ ଘୋଷଣା କରିଛନ୍ତି । ସେ ଅନୁସାରେ ମହିଳାଙ୍କୁ ଦକ୍ଷତା ତାଲିମ ପ୍ରଦାନର ଲକ୍ଷ୍ୟ ନିର୍ଦ୍ଧାରିତ ହୋଇଛି ।
ବର୍ତ୍ତମାନ ସମୟରେ ବହୁ ମହିଳା ଉପଯୁକ୍ତ ଦକ୍ଷତା ଅଭାବରୁ ନିଜର ପସନ୍ଦ ଅନୁସାରେ ଚାକିରି ପାଉନାହାନ୍ତି । ଯେଉଁମାନେ ଚାକିରି ପାଉଛନ୍ତି ସେମାନଙ୍କୁ ମନ ମୁତାବକ ଦରମା ମିଳୁନାହିଁ । ଏହାକୁ ଧ୍ୟାନରେ ରଖି କେନ୍ଦ୍ର ସରକାର ଏଥରକ ଅନେକ ସଂଖ୍ୟାରେ ମହିଳାଙ୍କୁ ଦକ୍ଷତା ବିକାଶ ତାଲିମ ଦେବାକୁ ଘୋଷଣା କରିଛନ୍ତି । ଯେପରିକି ସେମାନେ ଦେଶର ଅର୍ଥବ୍ୟବସ୍ଥାକୁ ବିକଶିତ କରିବା ଦିଗରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇପାରିବେ । ବଜେଟ୍ରେ କର୍ମଜୀବି ମହିଳାଙ୍କ ସୁବିଧା ଉପରେ ମଧ୍ୟରେ ଦୃଷ୍ଟି ଦିଆଯାଇଛି । କାର୍ଯ୍ୟକ୍ଷେତ୍ରରେ ମହିଳାଙ୍କ ଭାଗିଦାରୀକୁ ସୁନିଶ୍ଚିତ କରିବା ଲାଗି ବିଭିନ୍ନ ପଦକ୍ଷେପ ଘୋଷିତ ହୋଇଛି ।
ସାରା ଦେଶରେ କର୍ମଜୀବି ମହିଳାଙ୍କ ସହାୟତା ଲାଗି ସରକାର ୱାର୍କିଂ ୱିମେନ୍ସ ହଷ୍ଟେଲ ବା ଛାତ୍ରାବାସ ଚଳାଇଥାନ୍ତି । ସେହି ଛାତ୍ରାବାସର ସଂଖ୍ୟା ବଢ଼ାଯିବାକୁ ଅର୍ଥମନ୍ତ୍ରୀ ଘୋଷଣା କରିଛନ୍ତି । ସେ ଅନୁସାରେ, ଶିଳ୍ପସଂସ୍ଥା ସହିତ ମିଶି କର୍ମଜୀବି ମହିଳାମାନଙ୍କ ଲାଗି ହଷ୍ଟେଲ ନିର୍ମାଣ କରାଯିବ । କର୍ମଜୀବିମାନଙ୍କୁ ଚାକିରି ସମୟରେ କୌଣସି ପ୍ରକାର ସମସ୍ୟା ନ ହେବା ଲାଗି କେନ୍ଦ୍ର ସରକାର କାର୍ଯ୍ୟସ୍ଥଳରେ ଛୋଟ ପିଲାଙ୍କ ଦେଖାଶୁଣା ଲାଗି କ୍ରେଚ୍(ଶିଶୁ ଗୃହ) ତିଆରି କରିବାକୁ ମଧ୍ୟ ଘୋଷଣା କରିଛନ୍ତି । ସାଧାରଣତଃ ଛୋଟ ପିଲାଙ୍କ ଲାଗି ମହିଳାମାନେ ଅନେକ ସମୟରେ ଚାକିରି ଛାଡ଼ି ଦେଇଥାନ୍ତି । ତାକୁ ଧ୍ୟାନରେ ରଖି ଏହି ଘୋଷଣା କରାଯାଇଛି । ଅନ୍ୟପଟେ ମହିଳାଙ୍କ ନାମରେ ସମ୍ପତ୍ତି କିଣିବାବେଳେ ରେଜିଷ୍ଟ୍ରି ସମୟରେ ଲାଗିବାକୁ ଥିବା ଷ୍ଟାମ୍ପ ଡ୍ୟୁଟିରେ ଆଶ୍ୱସ୍ତି ଦେବାକୁ ଘୋଷଣା କରିଛନ୍ତି ସରକାର । ଏହାଦ୍ୱାରା ଗରିବ ମହିଳା ଘର କିଣିବା ସମୟରେ ଷ୍ଟାମ୍ପ ଡ୍ୟୁଟିରେ ରିହାତି ପାଇବେ । ଏହାଛଡ଼ା ମହିଳା ସ୍ୱୟଂ ସହାୟକ ଗୋଷ୍ଠୀ ଯେପରି ସହଜରେ ବଜାର ଯାଏ ପହଞ୍ଚିପାରିବେ ତାକୁ ପ୍ରୋତ୍ସାହିତ କରାଯିବ ।