କୋଣାର୍କ,୨୬।୩(ଆପ୍ର) ; ରାମଚଣ୍ଡୀ ଥାନା ଅର୍ନ୍ତଗତ ଭୁଆଁ ଗ୍ରାମରେ ନବ ବଧୂ ହତ୍ୟା ମାମଲାରେ ପୋଲିସ ୩ ଜଣଙ୍କୁ ଗିରଫ କରିଛି। ସ୍ଵାମୀ ହେମନ୍ତ କୁମାର ସେଠୀ,ଶ୍ବଶୁର ଅନନ୍ତ ସେଠୀ , ଦେଢ଼ଶୁର ସୁମନ୍ତ କୁମାର ସେଠୀଙ୍କୁ ରାମଚଣ୍ଡୀ ପୁଲିସ ଗିରଫ କରି କୋଣାର୍କ କୋର୍ଟ ଚାଲାଣ କରିଛି ।
ସତ୍ୟବାଦୀ ଥାନା ଅଧିନସ୍ଥ ନଡାଖଣ୍ଡ ଗ୍ରାମର ସନାତନ ସେଠୀଙ୍କ ଝିଅ ସୁଭଦ୍ରା ସେଠୀ (୨୩) ଗତ ୨୦୨୪ ଜୁଲାଇ ୧୪ ତାରିଖରେ ବୈଦିକ ରୀତିରେ ରାମଚଣ୍ଡୀ ଥାନା ଅଧିନସ୍ଥ ଭୂଆଁ ଗ୍ରାମର ସୁବାସ ସେଠୀଙ୍କ ପୁଅ ହେମନ୍ତ କୁମାର ସେଠୀ (୨୮) ଙ୍କୁ ବିବାହ କରିଥିଲେ। ବିବାହ ସମୟରେ ମୃତ ସୁଭଦ୍ରାଙ୍କ ପରିବାର ପକ୍ଷରୁ ଯୌତୁକ ବାବଦରେ ନଗଦ ଏକଲକ୍ଷ ଟଙ୍କା, ଡ୍ରେସ ବାବଦରେ ୨୦ ହଜାର ଟଙ୍କା ସହ ସୁନା ରୂପା ଗହଣା, ଆସବାବପତ୍ର ସମେତ ଅନ୍ୟାନ୍ୟ ସାମଗ୍ରୀ ହେମନ୍ତ କୁମାର ସେଠୀଙ୍କ ପରିବାରକୁ ପ୍ରଦାନ କରାଯାଇଥିଲା। ବିବାହର କିଛି ମାସ ପରେ ମୃତ ସୁଭଦ୍ରାଙ୍କ ସ୍ବାମୀ, ଶାଶୁ, ଶଶୁର ଓ ଦେଢଶୁର ଏକ ବୁଲେଟ ଗାଡି ସହିତ ନଗଦ ୫୦ ହଜାର ଟଙ୍କା ଯୌତୁକ ଦାବି କରିଥିଲେ। ଏହି ଘଟଣା ସମ୍ପର୍କରେ ମୃତ ସୁଭଦ୍ରା ନିଜ ବାପାଙ୍କୁ ଘଟଣା ସମ୍ପର୍କରେ ଜଣାଇଥିଲେ। ଅଧିକ ଯୌତୁକ ଦାବୀ କରି ନବବଧୂକୁ ଶାଶୁଘର ଲୋକେ ମିଶି ହତ୍ଯା କରିଥିଲେ। ଗତ ୬ ତାରିଖରେ ମୃତ ବଧୂର ବାପା ରାମଚଣ୍ଡୀ ଥାନାରେ ଲିଖିତ ଅଭିଯୋଗ କରିଥିଲେ। ଏହି ଘଟଣାକୁ ନେଇ ରାମଚଣ୍ଡୀ ଥାନା ପୋଲିସ ପକ୍ଷରୁ ୧୭/୨୫ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା।
