ବୈପାରୀଗୁଡ଼ା, ୨୪/୦୭ : ମାଓ ଯୋଜନା ପଣ୍ଡ। ବିଏସଏଫ୍ ଯବାନଙ୍କୁ ଟାର୍ଗେଟ୍ କରି ଖଞ୍ଜା ଯାଇଥିବା ବିସ୍ଫୋରକ କମ୍ଵିଂ ଅପରେସନ ବେଳେ ଜବତ। କୋରାପୁଟ ଜିଲ୍ଲା ବୈପାରୀଗୁଡ଼ା ଥାନା ଅନ୍ତର୍ଗତ ଗୁପ୍ତେଶ୍ଵର ପଞ୍ଚାୟତ ଘୋଡ଼ାଘାଟ ସାବେରୀ ନଦୀ କୂଳରୁ ଜିଲୋଟିନ୍ ଷ୍ଟିକ୍ ଜବତ ହୋଇଛି।
ମାଓ ଗତିବିଧି ନେଇ ବିଶେଷ ସୂତ୍ରରୁ ଖବର ପାଇ ରାମଗିରି ୧୮୦ ବିଏସଏଫ ଯବାନ ଉକ୍ତ ଅଞ୍ଚଳରେ ଜୋରଦାର କମ୍ଵିଂ ଅପରେସନ ଆରମ୍ଭ କରିଥିଲେ। ଏହି ସମୟରେ ସାବେରୀ ନଦୀ କୂଳ ଘୋଡାଘାଟ ପାହାଡ଼ର ଏକ ପଥର ତଳେ ଜିଲୋଟିନ ଷ୍ଟିକ୍ ଥିବା ଜଣାପଡିଥିଲା। ଅତି ସତର୍କତାର ସହ ସମସ୍ତ ଜିଲୋଟିନ ଷ୍ଟିକ୍ ବାହାର କରାଯାଇଥିଲା। ବିଏସଏଫ୍ କ୍ୟାମ୍ପକୁ ଆଣିବା ପରେ ଜବତ କରାଯାଇଥିବା ଜିଲୋଟିନ ଷ୍ଟିକ୍ ଗଣିବାରୁ ସେଥିରେ ୨୭ଟି ଷ୍ଟିକ୍ ରହିଥିବା ଜଣାପଡିଛି। ଏସବୁ ବିସ୍ଫୋରକ ସାମଗ୍ରୀକୁ ବୈପାରୀଗୁଡ଼ା ଥାନାକୁ ହସ୍ତାନ୍ତର କରାଯିବ ବୋଲି ସୂଚନା ମିଳିଛି।
