ନବରଙ୍ଗପୁର/ମୈଦଲପୁର,୨୫/୦୭: ‘ଏଣିକି ଆଉ ଗାଁର ଯୁବକମାନେ ଅଭିଆଡ଼ା ରହିବେ ନାହିଁ । ସେମାନଙ୍କୁ ଠିକଣା ସମୟରେ ମିଳିଯିବେ କନିଆଁ । ଗାଁକୁ ବୋହୂ ମିଳିବାରେ ଆଉ ସମସ୍ୟା ହେବନି । ଦଶନ୍ଧି ଦଶନ୍ଧି ଧରି ଲାଗି ରହିଥିବା ସମସ୍ୟା ଟଳିଯାଇଛି । ମେଗା ପ୍ରକଳ୍ପରେ ମିଳିଛି ପାଇପ୍ ପାଣି । ଘର ଘରକୁ ସଂଯୋଗ ଦିଆଯାଇଛି । ଏଥିଲାଗି ସବୁ ଶ୍ରେୟର ହକ୍ଦାର କେବଳ ‘ପ୍ରମେୟ’ ।’ ଆନନ୍ଦରେ ବିଭୋର୍ ହୋଇ ଏହା କହିଛନ୍ତି ପାପଡ଼ାହାଣ୍ଡି ବ୍ଲକ ସାନବାର୍ଲି ପଞ୍ଚାୟତ ବଡ଼ବାର୍ଲି ଗ୍ରାମବାସୀ । ଉପରକୁ ହାତ ଟେକି କୃତଜ୍ଞତା ଜଣାଇଛନ୍ତି ।
ଗାଁରେ ନ ଥିଲା ପାଣି ସୁବିଧା । ଦୂରରେ ଥିବା ଦୂଷିତ ଝରଣା ପାଣିରେ ମେଣ୍ଟୁଥିଲା ଲୋକଙ୍କ ଶୋଷ । ଏଥିଲାଗି ଗାଁରେ କନିଆଁ ଦେବାକୁ କେହି ରାଜି ହେଉ ନ ଥିଲେ । ବନ୍ଧୁ ବାନ୍ଧିବାକୁ ମୁହଁ ଫେରାଇ ନେଉଥିଲେ । ଏହି କାରଣରୁ ଗାଁର ପ୍ରାୟ ୪୦ ଯୁବକ ଅବିବାହିତ ହୋଇ ରହିଥିଲେ । ଏହା ଜାଣିବା ପରେ ଆମେ ପହଞ୍ଚିଥିଲୁ ଗାଁରେ । ଗ୍ରାଉଣ୍ଡ୍ ଜିରୋରୁ ସଂଗ୍ରହ କରିଥିଲୁ ଟିକିନିଖି ତଥ୍ୟ । ସେସବୁକୁ ଆଧାର କରି ଗତ ଏପ୍ରିଲ୍ ୮ ତାରିଖରେ ପ୍ରକାଶ କରିଥିଲୁ ଏକ ସ୍ୱତନ୍ତ୍ର ଖବର । ଯାହାର ଶୀର୍ଷକ ଥିଲା ‘ପାଣି ନାହିଁ, ଗାଁକୁ ମିଳୁନାହାନ୍ତି ବୋହୂ’ । ଏହି ଖବର ପ୍ରକାଶ ପାଇବା ପରେ ଗମ୍ଭୀରତାକୁ ଆଖିରେ ରଖି ତତ୍ପରତା ଦେଖାଇଥିଲା ଜିଲ୍ଲା ପ୍ରଶାସନ ।
ଗତ ଜୁନ୍ ସୁଦ୍ଧା ଗାଁରେ ପାଣି ପହଞ୍ଚାଇବାକୁ ପ୍ରତିଶ୍ରୁତି ଦେଇଥିଲେ ଜିଲ୍ଲା ଗ୍ରାମ୍ୟ ଜଳଯୋଗାଣ ନିର୍ବାହୀ ଯନ୍ତ୍ରୀ ପ୍ରତୀକ କୁମାର ରାଉତ । ମାତ୍ର କେଇଦିନ ବିଳମ୍ବ ଅର୍ଥାତ୍ ଜୁଲାଇରେ ପହଞ୍ଚିଛି ପାଇପ୍ ପାଣି । ମୈଦଲପୁରରୁ ୧୭ କିମି ଦୂରରେ ଥିବା ପାହାଡ଼ ଉପର ଏହି ଗାଁକୁ ପାଇପ୍ ଲାଇନ୍ ବିଛାଯାଇଛି । ୧ ଲକ୍ଷ ୪୦ ହଜାର ଲିଟର ବିଶିଷ୍ଟ ଟାଙ୍କି ନିର୍ମାଣ କାମ ଶେଷ ହୋଇଛି । ଗାଁର ୨୧୮ ଘର ମଧ୍ୟରୁ ଏବେସୁଦ୍ଧା ୧୮୮ ଘରକୁ ଟ୍ୟାପ୍ ପାଣି ପହଞ୍ଚି ସାରିଛି । ବଳକା ୩୦ ଘରକୁ ସଂଯୋଗ କାମ ଜାରି ରହିଛି । ଅଳ୍ପଦିନ ମଧ୍ୟରେ ସମସ୍ତ ଘରକୁ ପାଣି ପହଞ୍ଚିଯିବ ବୋଲି କହିଛନ୍ତି କନିଷ୍ଠ ଯନ୍ତ୍ରୀ ଲିଙ୍ଗରାଜ ପଣ୍ଡା । କେବଳ ବଡ଼ବାର୍ଲି ନୁହେଁ, ସାନବାର୍ଲି ପଞ୍ଚାୟତର ଆଉ ୫ଟି ଗାଁ ନୂଆଗୁଡ଼ା, ଖଜୁରୀ, ମାଳିଆମ୍ବ ଓ ଜବାଗୁଡ଼ାକୁ ମଧ୍ୟ ଆଉ ମାସକ ଭିତରେ ପାଇପ୍ ପାଣି ଯୋଗାଇ ଦିଆଯିବ ବୋଲି ସେ କହିଛନ୍ତି । ‘ପ୍ରମେୟ’ରେ ଖବର ପ୍ରକାଶ ପାଇବାର ମାତ୍ର ୪ ମାସ ମଧ୍ୟରେ ମେଗା ପ୍ରକଳ୍ପ ଦ୍ୱାରା ପହଞ୍ଚିଛି ପାଇପ୍ ପାଣି । ଏଥିଲାଗି ପ୍ରଶାସନ ଏବଂ ବିଭାଗୀୟ ଅଧିକାରୀମାନଙ୍କୁ ବି ସାଧୁବାଦ ଜଣାଇଛନ୍ତି ଗ୍ରାମବାସୀ ।
ସୂଚନାଥାଉ କି, ବଡ଼ବାର୍ଲି ଗାଁର ଲୋକେ ଦଶନ୍ଧି ଦଶନ୍ଧି ଧରି ବିଶୁଦ୍ଧ ପାନୀୟ ଜଳ ଟୋପେ ଲାଗି ନାହିଁ ନ ଥିବା ଦୁର୍ଦ୍ଦଶା ଭୋଗୁଥିଲେ । ପାହାଡ଼ ଉପରେ ଥିବା ବଡ଼ବାର୍ଲି ଗାଁକୁ ବିଜୁଳି ଓ ରାସ୍ତା ପହଞ୍ଚି ଯାଇଥିଲେ ବି ପାଣି ମିଳୁ ନ ଥିଲା । ନଳକୂଅ ଖୋଳାଯାଉଥିଲେ ମଧ୍ୟ କାମରେ ଲାଗୁ ନ ଥିଲା । ଏଥିଲାଗି ଗାଁରୁ ୧ କିମି ଦୂରରେ ଥିବା ଝରଣାରୁ ଲୋକେ ବହୁ କଷ୍ଟରେ ପାଣି ସଂଗ୍ରହ କରୁଥିଲେ । ଝର ପାଖକୁ ଯିବା ଲାଗି ପ୍ରାୟ ୩୦ ଫୁଟ୍ ତଳକୁ ଓହ୍ଲାଉଥିଲେ । ସେଥିଲାଗି ପ୍ରଶାସନ ପକ୍ଷରୁ ୩୫ଟି ପାହାଚ ନିର୍ମାଣ କରାଯାଇଥିଲା । ପଥର ସନ୍ଧିରେ ୨ଟି ପାଇପ୍ ଲଗାଇ ଝରରୁ ପାଣି ସଂଗ୍ରହ କରାଯାଉଥିଲା । ଏଭଳି ସମସ୍ୟା ଲାଗି କୌଣସି ଲୋକ ଗାଁକୁ କନିଆଁ ଦେବାକୁ ରାଜି ହେଉ ନ ଥିଲେ । ପାଇପ୍ ପାଣି ପହଞ୍ଚିବା ପରେ ଏବେ ସେମାନେ ଆଶ୍ୱସ୍ତ ହୋଇଥିବା କହିଛନ୍ତି ଗାଁର ରବୀନ୍ଦ୍ର ନାଗ, ପ୍ରଫୁଲ୍ଲ ନାଗ, ଗୋବିନ୍ଦ ନାଗ, ଭାଗ୍ୟ ଜାନୀ, ଗୌରୀ ହରିଜନ, କମଳା ହରିଜନ, କୁନି ହରିଜନ ପ୍ରମୁଖ ।
