ଭୁବନେଶ୍ୱର,୨୬/୦୭: ମେଟ୍ରୋ ରେଳ ପ୍ରକଳ୍ପ ପାଇଁ ୨୦୨୪ ଜାନୁଆରୀ ପହିଲାରେ ଭିତ୍ତିପ୍ରସ୍ତର ପଡ଼ିଥିଲା । ଏବେ ସୁଦ୍ଧା କାମ ଶୂନ । ଏଯାଏ ଚୂଡ଼ାନ୍ତ ହୋଇପାରିନି ମେଟ୍ରୋ ରେଳ ଉପରେ ଯିବ ନା ମାଟି ତଳେ ଯିବ । ମଝିରେ ମଝିରେ ଭିନ୍ନ ଭିନ୍ନ କଥା, ବୟାନାବାଜି ଆସୁଛି। କେବେ ଆରମ୍ଭ ହେବ, କେବେ ସୁଦ୍ଧା ସରିବ, ଜଣାନାହିଁ । ଏ ପ୍ରକଳ୍ପ ନେଇ ସଭିଙ୍କ ମନରେ ପ୍ରଶ୍ନ-ମେଟ୍ରୋ ପ୍ରକଳ୍ପ ହେବ ତ? ଭୁବନେଶ୍ୱରରେ ମେଟ୍ରୋ ରେଳ କେବେ ଗଡ଼ିବ? ଏସବୁ ପ୍ରଶ୍ନ ଭିତରେ ପ୍ରସ୍ତାବିତ ପ୍ରକଳ୍ପର ଭାଗ୍ୟ ଅନିଶ୍ଚିତତା ଭିତରକୁ ଠେଲି ହୋଇଗଲାଣି । ‘ଦାସେ ଆଇଲେ ମୂଳରୁ ଗାଅ’ ନୀତିରେ ଏ ପ୍ରକଳ୍ପ ନେଇ ଯେତେ ବୈଠକ ବସୁଛି, ପ୍ରତି ଥର ଭିନ୍ନ କଥା ସାମ୍ନାକୁ ଆସୁଛି। ଏଭଳି ଅନିଶ୍ଚିତତା ଭିତରେ କେନ୍ଦ୍ର ସହରାଞ୍ଚଳ ବିକାଶ ମନ୍ତ୍ରୀ ଯେଉଁ ତଥ୍ୟ ଦେଇଛନ୍ତି, ତାହା ମେଟ୍ରୋ ପ୍ରକଳ୍ପ ନେଇ ସନ୍ଦେହ ବଢ଼ାଇଛି ।
ଟିଡିପି ସାଂସଦ ପଚାରିଥିବା ଏକ ପ୍ରଶ୍ନର ଉତ୍ତରରେ କେନ୍ଦ୍ର ସହରାଞ୍ଚଳ ବିକାଶ ମନ୍ତ୍ରୀ ତୋଖାନ ସାହୁ ସଂସଦରେ ସୂଚନା ଦେଇଛନ୍ତି, ବିଭିନ୍ନ ରାଜ୍ୟରୁ ଆସିଥିବା ୧୭ଟି ମେଟ୍ରୋ ପ୍ରକଳ୍ପକୁ କେନ୍ଦ୍ର ମଞ୍ଜୁରୀ ଦେଇଛି । ମାତ୍ର ଏହା ଭିତରେ ଓଡ଼ିଶାର ନାମ ନାହିଁ । ଭୁବନେଶ୍ୱର ମେଟ୍ରୋ ପ୍ରକଳ୍ପ ନେଇ ଓଡ଼ିଶା ସରକାର କୌଣସି ପ୍ରସ୍ତାବ କେନ୍ଦ୍ରକୁ ପଠାଇନାହାନ୍ତି । ଯେଉଁ ସବୁ ମେଟ୍ରୋ ପ୍ରକଳ୍ପକୁ କେନ୍ଦ୍ର ଅନୁମୋଦନ ମିଳିଛି, ସେଥିପାଇଁ କେନ୍ଦ୍ରରୁ ସହାୟତା ଯାଇଛି । ଆର୍ଥିକ ଅନୁଦାନ ସହ ବୈଷୟିକ ସହାୟତା ଦେଇଥାଏ କେନ୍ଦ୍ର । ମାତ୍ର ଭୁବନେଶ୍ୱର ମେଟ୍ରୋ ପ୍ରକଳ୍ପ ପାଇଁ ନା ପୂର୍ବ ସରକାର ପ୍ରସ୍ତାବ ପଠାଇଥିଲେ ନା ବର୍ତ୍ତମାନର ସରକାର ପଠାଉଛନ୍ତି ।
୨୦୨୪ ନିର୍ବାଚନ ପୂର୍ବରୁ ପୂର୍ବ ସରକାର ମେଟ୍ରୋ ପ୍ରକଳ୍ପର ନିଅଁ ଦେଇଥିଲେ । ୨୦୨୪-୨୫ ବଜେଟରେ ଏ ପ୍ରକଳ୍ପ ପାଇଁ ଅର୍ଥ ବରାଦ ହେଲା । ଆରମ୍ଭରୁ କୁହାଗଲା, ସହର ଉପରେ ଏଲିଭେଟେଡ୍ କରିଡରରେ ମେଟ୍ରୋ ରେଳ ପଥ ନିର୍ମାଣ ହେବ । କିଛି ମାସ ପାଇଁ ସହରରେ ମାଟି ପରୀକ୍ଷା ପାଇଁ ଖୋଳାତଡ଼ା ଆରମ୍ଭ ହେଲା । ପୁଣି କ’ଣ ହେଲା କେଜାଣି ସବୁ କାମ ବନ୍ଦ, ନିର୍ମାଣ ସାମଗ୍ରୀ ଉଠାଇ ନିଆଗଲା । ବର୍ତ୍ତମାନ ସରକାର କହୁଛନ୍ତି, ମାଟି ତଳେ ମେଟ୍ରୋ ଚାଲିବ । ମେଟ୍ରୋ ରେଳ ପାଇଁ କମିଟି ଗଠନ କରାଯାଇଛି । ଗତ ୧୬ ତାରିଖରେ ଏ ନେଇ ବୈଠକ ବସିଥିଲା । ମେଟ୍ରୋ ପ୍ରକଳ୍ପକୁ ନେଇ ବାରମ୍ବାର ଭିନ୍ନ କଥା, ଭିନ୍ନ ଢାଞ୍ଚା, ନୂଆ ବୟାନବାଜି ନେଇ ମେଟ୍ରୋ ପ୍ରକଳ୍ପକୁ ନେଇ ଲୋକଙ୍କ ମନରେ ଦ୍ୱନ୍ଦ୍ୱ ସୃଷ୍ଟି ହେଲାଣି ।
ମେଟ୍ରୋ ପ୍ରକଳ୍ପ ନେଇ ରାଜ୍ୟର ବିଜେପି ସରକାରଙ୍କ ଆଭିମୁଖ୍ୟ ସ୍ପଷ୍ଟ ନାହିଁ ବୋଲି ବିଜେଡି କହିଛି । ଦଳର ମୁଖପାତ୍ର ଲେନିନ ମହାନ୍ତି କହିଛନ୍ତି, ବିଜେଡି ସରକାର ସମୟରେ ମେଟ୍ରା ପ୍ରକଳ୍ପ ପାଇଁ ଡିପିଆର ପ୍ରସ୍ତୁତ ସହ ଟେଣ୍ଡର କରାଯାଇଥିଲା । ପ୍ରକଳ୍ପର ଭିତ୍ତିପ୍ରସ୍ତର ହୋଇଥିଲା । ମାତ୍ର ବିଜେପି ସରକାର କ୍ଷମତାକୁ ଆସିବାର ଦୀର୍ଘ ୧୩ ମାସ ବିତି ଯାଇଥିଲେ ସୁଦ୍ଧା ପ୍ରକଳ୍ପକୁ ନେଇ ଅନିଶ୍ଚିତତା ଲାଗି ରହିଛି । ମେଟ୍ରା ପ୍ରକଳ୍ପ ରାଜ୍ୟ ସରକାରଙ୍କ ନିଜସ୍ୱ ପାଣ୍ଠିରୁ ନିର୍ମାଣ ହେବ ବୋଲି ବିଜେଡି ସରକାର ସମୟରେ ସ୍ପଷ୍ଟ କୁହାଯାଇଥିଲା । ତେଣୁ କେନ୍ଦ୍ର ସରକାରଙ୍କ ଅନୁମୋଦନର ଆବଶ୍ୟକ ନାହିଁ । ଦୁଃଖ ଓ ପରିତାପର ବିଷୟ ରାଜ୍ୟ ସରକାର ମେଟ୍ରା ପ୍ରକଳ୍ପକୁ ଅନିଶ୍ଚିତତା ଭିତରକୁ ଠେଲି ଦେଉଛନ୍ତି ।
ରାଜ୍ୟ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର କହିଛନ୍ତି, ମେଟ୍ରୋ ନେଇ କମିଟି ଗଠନ ହୋଇଛି । ଏହି କମିଟି ଥରେ ବୈଠକ କରିଛି । ଆଗକୁ ପୁଣି ବୈଠକ ବସି ଆଲୋଚନା ହେବ । ନୂଆ ଡିପିଆର୍ ପ୍ରସ୍ତୁତ ପରେ କେନ୍ଦ୍ରକୁ ପ୍ରସ୍ତାବ ପଠାଯିବ । କେନ୍ଦ୍ରର ସହଯୋଗରେ ପ୍ରକଳ୍ପ ହେବ । ନୂଆ ଢାଞ୍ଚାରେ ଏହି ପ୍ରକଳ୍ପ କାର୍ଯ୍ୟକ୍ଷମ ହେବ ।
