କଟକ,୨୫/୭ : ଏସସିବି ମେଡିକାଲରେ ଏମଆରଆଇ ମେସିନ୍ ଖରାପ ହେଇ ପଡିଛି । ଏହାକୁ ନେଇ ଆଜି କଂଗ୍ରେସ ତରଫରୁ ନିଆରା ଢଙ୍ଗରେ ପ୍ରତିବାଦ କରାଯାଇଛି । ଏସସିବି ମେଡ଼ିକାଲ ଅଧିକ୍ଷକଙ୍କୁ ଖୁଚୁରା ଗିଫ୍ଟ ଦିଆଯାଇଛି । ଶୀଘ୍ର ସଜାଡ଼ ଏମଆରଆଇ ମେସିନ । ଗଣମାଧ୍ୟମରେ ଏସସିବି ମେଡିକାଲ କଲେଜରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଧର୍ମପତ୍ନୀଙ୍କୁ ଚିକିତ୍ସା ନ ମିଳିବା ପ୍ରସଙ୍ଗ ଖବର ପ୍ରସାରଣ ପରେ ବର୍ଷିଲା କଂଗ୍ରେସ। ଏସସିବି ମେଡିକାଲରେ ପହଁଚିଲା ମାନସ ଚୌଧୁରୀ ନେତୃତ୍ୱାଧୀନ ଏକ କଂଗ୍ରେସ ପ୍ରତିନିଧି ମଣ୍ଡଳୀ ।
ଅଧିକ୍ଷକ ଡା ଗୌତମ ଶତପଥିଙ୍କୁ ଭେଟି ଖୁଚୁରା ଟଙ୍କା ଦେବା ସହ ଏମଆରଆଇ ମେସିନକୁ ଶୀଘ୍ର କାର୍ଯ୍ୟକ୍ଷମ କରିବା ପାଇଁ ଅଧିକ୍ଷକଙ୍କୁ ଦାବି କରିଛି କଂଗ୍ରେସ। ଯେଉଁଠି ମୁଖ୍ୟମନ୍ତ୍ରୀଙ୍କ ପତ୍ନୀଙ୍କୁ ଚିକିତ୍ସା ମିଳି ପାରୁନି ସେଠାରେ ସାଧାରଣ ଲୋକଙ୍କ ଚିକିତ୍ସା କିପରି ହେଉଥିବ ତାହା ଏହି ଘଟଣାରୁ ଜଣାପଡ଼ିଯାଉଛି । ଏହା ବ୍ୟତୀତ କଟକ ବାରବାଟୀ ବିଧାୟିକା ଓ ସହରବାସୀ ଟଙ୍କା ଆଦାୟ କରି ମେଡିକାଲ ଅଧିକ୍ଷକଙ୍କୁ ଦେବା ପାଇଁ ନିବେଦନ କରିଛନ୍ତି ମାନସ ଚୌଧୁରୀ। ଅନ୍ୟପଟେ ଏହି ଅଭିଯୋଗ ଭିତ୍ତିହୀନ ଓ ଭୁଲ ଖବର ପ୍ରସାରଣ ହୋଇଥିବା କହିଛନ୍ତି ଅଧିକ୍ଷକ। ମୁଖ୍ୟମନ୍ତ୍ରୀଙ୍କ ପତ୍ନୀ ବୁଧୁବାର ଆସିଥିଲେ ଏମଆରଆଇ ପାଇଁ ଏବଂ ତାଙ୍କର ସଠିକ ରୂପେ ଏମଆରଆଇ ହୋଇଥିବା କହିଛନ୍ତି ଅଧୀକ୍ଷକ ।
