ବାସୁଦେବପୁର, ୨୫/୦୭ : ଭଦ୍ରକ ଜିଲ୍ଲା ବାସୁଦେବପୁର କଂଗ୍ରେସ ପକ୍ଷରୁ ବିଭିନ୍ନ ଦାବି ନେଇ ଅହୋରାତ୍ର ଧାରଣା। ପ୍ରେସ୍ କ୍ଲବ ସମ୍ମୁଖରେ କଂଗ୍ରେସ ନେତା ଏବଂ କର୍ମୀ ଧାରଣାରେ ବସିଛନ୍ତି। ବାସୁଦେବପୁର ବିଧାୟକଙ୍କ ସମେତ ଯୁବ କଂଗ୍ରେସ, ନଗର କଂଗ୍ରେସ ଏବଂ ସାଧାରଣ ଲୋକମାନେ ଏହି ଧାରଣାରେ ସାମିଲ ହୋଇଛନ୍ତି। ଜାମୁଝାଡିରୁ ଧାମରା ରାସ୍ତାର ପ୍ରଶସ୍ତିକରଣ, ବେତଡ଼ା, ବାସୁଦେବପୁର, ବିଦେଇପୁରରେ ବାଇପାସ୍ ରାସ୍ତା ନିର୍ମାଣ, ବେକାରୀ ଯୁବକ ଯୁବତୀଙ୍କୁ ନିଯୁକ୍ତି, ଧାମରା ବନ୍ଦର ଦ୍ୱାରା ବାସୁଦେବପୁରକୁ ଉନ୍ନତି କରିବା ଆଦି ବିଭିନ୍ନ ଦାବି ଉପସ୍ଥାପନ କରିଛନ୍ତି। 

କଂଗ୍ରେସ ଅଭିଯୋଗ ଆଣିଛି ଯେ, ଧାମରା ବନ୍ଦର ହେବା ଦିନ ଠାରୁ ଜାମୁଝଡ଼ିରୁ ଧାମରା ମଧ୍ୟରେ ବହୁ ଜନ ଜୀବନ ହାନି ଘଟିଲାଣି। ଆଉ ସହି ହେବ ନାହିଁ। ତେଣୁ ଯେତେ ପର୍ଯ୍ୟନ୍ତ ଧାମରା କର୍ତ୍ତୃପକ୍ଷ ଆସି ଲିଖିତ ପ୍ରତିଶୃତି ନଦେବେ ସେପର୍ଯ୍ୟନ୍ତ ଆମେ ଧାରଣାରୁ ହଟିବେ ନାହିଁ ବୋଲି ବିଧାୟକ ଚେତାବନୀ ଦେଇଛନ୍ତି। ଖବର ପାଇ ସ୍ଥାନୀୟ ତହସିଲଦାର ପ୍ରିୟବ୍ରତ ଦାସ, ଏସଡିପିଓ ବିଚିତ୍ରାନନ୍ଦ ସେଠି, ଥାନାଧିକାରିଣୀ ଲୋପାମୁଦ୍ରା ନାୟକ ପହଞ୍ଚି ବୁଝାସୁଝା କରିଛନ୍ତି। ଅନ୍ୟପଟେ ଧାମରା ବନ୍ଦରକୁ ଆସୁଥିବା ଲୁହା ପଥର ଗୁଣ୍ଡ ଗାଡିକୁ ଅଟକ ରଖି ପୁଣି ଜାମୁଝାଡି ଅଭିମୁଖେ ଫେରାଇ ଦିଆଯାଉଛି। ସମାଧାନ ନହେବା ଯାଏ ଧାମରାରୁ ବାଣିଜ୍ୟ ମଧ୍ୟ ବନ୍ଦ କରିଛି କଂଗ୍ରେସ।