ଭୁବନେଶ୍ୱର, ୦୬/୧୧ : ଓଡିଆଙ୍କୁ ଆଳୁ ଶରଧା । ଓଡିଶାର ଜଣେ ବ୍ୟକ୍ତି ବର୍ଷକୁ ପ୍ରାୟ ୨୫ କେଜି ଆଳୁ ଖାଇଯାଉଛନ୍ତି । ‘ବ୍ଲୁ ପ୍ରିଣ୍ଟ୍ ଅଫ୍ ପଟାଟୋ କଲଟିଭେସନ୍ ଅଫ୍ ଓଡିଶା’ ନାମକ ଏକ ସର୍ଭେ ରିପୋର୍ଟରେ ଏହି ତଥ୍ୟ ପ୍ରକାଶ ପାଇଛି । ଓୟୁଏଟି, ଉଦ୍ୟାନ କୃଷି ବିଭାଗର ଅବସରପ୍ରାପ୍ତ ପ୍ରଫେସର ଡ. ପ୍ରଭୁଚରଣ ଲେଙ୍କାଙ୍କ ନେତୃତ୍ୱରେ କୃଷି ବିଭାଗର ଅବସରପ୍ରାପ୍ତ ଯୁଗ୍ମ ନିର୍ଦ୍ଦେଶକ ଅମରେଶ୍ୱର ମିଶ୍ର, କୃଷି ବିଶେଷଜ୍ଞ ଅବିନାଶ ମହାନ୍ତି ଏବଂ ଅଭିଜିତ ଭଟ୍ଟାଚାର୍ଜି ମିଳିତ ଉଦ୍ୟମରେ ଏହି ସର୍ଭେ ହୋଇଛି ।
ଓଡିଶାରେ ମୁଣ୍ଡପିଛା ୨୫.୪ କେଜି ଆଳୁ ଖାଦ୍ୟ ଭାବେ ବ୍ୟବହାର ହେଉଛି । ତଦାନୁସାରେ ଓଡିଶାର ୪.୨ କୋଟି ଲୋକଙ୍କୁ ବାର୍ଷିକ ୧୦.୬୬ ଲକ୍ଷ ମେଟ୍ରିକ୍ ଟନ୍ ଆଳୁ ଆବଶ୍ୟକ । ତେବେ ଓଡିଶା ନିଜର ବାର୍ଷିକ ଆଳୁ ଆବଶ୍ୟକତାର ପ୍ରାୟ ୨୦ ପ୍ରତିଶତ ଆଳୁ ଉତ୍ପାଦନ କରିଥାଏ । ଆଉ ନିଅଣ୍ଟ ଆଳୁ ପଶ୍ଚିମବଙ୍ଗ ଭଳି ପଡୋଶୀ ରାଜ୍ୟରୁ ଆମଦାନୀ କରିଥାଏ । ଆମ ରାଜ୍ୟରେ ଉତ୍ପାଦିତ ପ୍ରମୁଖ ପନିପରିବା ଭିତରେ ଆଳୁ ଅନ୍ୟତମ । ରାଜ୍ୟର ପ୍ରାୟ ୧୫ ହଜାର ହେକ୍ଟରରୁ ଅଧିକ ଜମିରେ ଆଳୁ ଚାଷ ହେଉଥିବା ବେଳେ ବାର୍ଷିକ ପ୍ରାୟ ୨.୫ ଲକ୍ଷ ମେଟ୍ରିକ୍ ଟନ୍ ଆଳୁ ଉତ୍ପାଦନ ହୋଇଥାଏ । ତେବେ ରାଜ୍ୟର କେତେକ ଜିଲ୍ଲାରେ ପାଣିପାଗ ଏବଂ ମୃତ୍ତିକା ଆଳୁ ଚାଷ ଲାଗି ବେଶ୍ ଉପଯୋଗୀ ବୋଲି ରିପୋର୍ଟରେ ଦର୍ଶାଯାଇଛି । ରାଜ୍ୟର ପ୍ରମୁଖ ଆଳୁ ଉତ୍ପାଦନକାରୀ ଜିଲ୍ଲାଗୁଡିକ ହେଲା- ପୁରୀ, କଟକ, କନ୍ଧମାଳ, ମୟୂରଭଞ୍ଜ, ବାଲେଶ୍ୱର, ସମ୍ବଲପୁର, ସୁନ୍ଦରଗଡ଼, କେନ୍ଦ୍ରାପଡ଼ା ଏବଂ କୋରାପୁଟ । ସେହିପରି ଜୁଲାଇ-ନଭେମ୍ବର ଏବଂ ନଭେମ୍ବର-ମାର୍ଚ୍ଚ ମାସଗୁଡ଼ିକ ହେଉଛି ଆଳୁ ଉତ୍ପାଦନ ଲାଗି ଉପଯୁକ୍ତ ସମୟ ।
ଓଡିଶାରେ ସାଧାରଣତଃ ରବି ଫସଲ ବେଳେ ଆଳୁ ଚାଷ ହୋଇଥାଏ । କିନ୍ତୁ ଗତ କିଛି ବର୍ଷ ହେଲା ଖରିଫ୍ ଋତୁରେ କୋରାପୁଟ ଭଳି ପାହାଡ଼ିଆ ଅଞ୍ଚଳରେ ଆଳୁ ଚାଷରେ ବଡ ସଫଳତା ମିଳିଛି । ଆମ ରାଜ୍ୟରେ ‘କୁଫ୍ରି ଜ୍ୟୋତି’ ପ୍ରଜାତିର ଆଳୁ ବେଶୀ ଉତ୍ପାଦିତ ହୋଇଥାଏ ବୋଲି ରିପୋର୍ଟରୁ ଜଣାପଡିଛି । ଏହା ପ୍ରତି ହେକ୍ଟର ପିଛା ପ୍ରାୟ ୧୨ ଟନ୍ ଉତ୍ପାଦନ ହେଉଛି । ବିଗତ କିଛି ବର୍ଷ ହେଲା, ଆଳୁ ଯୋଗାଣରେ ଅଭାବ ଦେଖାଦେବା ସହ ଖୁଚୁରା ବଜାରରେ ଆଳୁ କେଜି ୫୦-୬୦ ଟଙ୍କାରେ ବିକ୍ରି ହେଲା । ଏଣୁ ଓଡ଼ିଶାବାସୀଙ୍କ ଆଳୁ ଆବଶ୍ୟକତାକୁ ଦୃଷ୍ଟିରେ ରଖି ବ୍ଲକ ଏବଂ ପଞ୍ଚାୟତ ସ୍ତରରେ ସରକାର ଆଳୁ ଚାଷ ଲାଗି ଅଧିକ ପ୍ରୋତ୍ସାହିତ କରିବାକୁ ରିପୋର୍ଟରେ ପରାମର୍ଶ ଦିଆଯାଇଛି । ହେକ୍ଟର ପିଛା ୧ ଲକ୍ଷ ୪୦ ହଜାରରୁ ୧ ଲକ୍ଷ ୫୦ ହଜାର ଟଙ୍କା ଖର୍ଚ୍ଚରେ ଜଣେ ବ୍ୟକ୍ତି ଆଳୁ ଚାଷ କରିପାରିବେ । ଜୁନ-ଜୁଲାଇରେ ରାଜ୍ୟର ୧୦ଟି ଆଗ୍ରୋ କ୍ଲାଇମେଟିକ୍ ଜୋନ୍ଗୁଡିକରେ ଏହି ସର୍ଭେ ହୋଇଥିଲା । ଆଳୁ ଉତ୍ପାଦନରେ ରାଜ୍ୟକୁ କେଉଁ ଦିଗରେ ଆତ୍ମନିର୍ଭରଶୀଳ କରାଯାଇପାରିବ ଏହି ସର୍ଭେର ଉଦ୍ଦେଶ୍ୟ ଥିଲା । ରାଜ୍ୟରେ ଆଳୁର ଆବଶ୍ୟକତା, ଉତ୍ପାଦନ, ସଂରକ୍ଷଣ ଏବଂ ଅନ୍ୟାନ୍ୟ ଦିଗକୁ ନେଇ ପ୍ରସ୍ତୁତ ଏହି ସବିଶେଷ ରିପୋର୍ଟକୁ କୃଷି ଓ ଉଦ୍ୟାନ କୃଷି ବିଭାଗକୁ ଦିଆଯାଇଛି ।
