ଭୁବନେଶ୍ୱର,୨୨/୦୬: ଆରମ୍ଭ ହୋଇଛି ଦଶମ ପର୍ଯ୍ୟାୟ ବାଣିଜ୍ୟକ କୋଇଲା ଖଣି ନିଲାମ ପ୍ରକ୍ରିୟା । ଏଥିରେ ଦେଶର ୬୧ଟି ଖଣି ବିକ୍ରି ନିମନ୍ତେ ରଖାଯାଇଥିବାବେଳେ ଓଡ଼ିଶାରୁ ସ୍ଥାନ ପାଇଛି ସର୍ବାଧିକ ୧୭ଟି କୋଇଲା ଖଣି । ଶୁକ୍ରବାର ହାଇଦ୍ରାବାଦରେ ଆୟୋଜିତ ଏକ କାର୍ଯ୍ୟକ୍ରମରେ କେନ୍ଦ୍ର କୋଇଲା ଏବଂ ଖଣି ମନ୍ତ୍ରୀ ଜି.କିଶନ ରେଡ୍ଡି ଏହାର ଶୁଭାରମ୍ଭ କରିଥିଲେ । ନିଲାମ ପାଇଁ ରଖାଯାଇଥିବା ଖଣିଗୁଡ଼ିକ ଉଭୟ କୋକିଂ ଏବଂ ନନ୍-କୋକିଂ କୋଇଲା ଖଣି । ଘରୋଇ କୋଇଲା ଉତ୍ପାଦନକୁ ବଢ଼ାଇବା ସହିତ ଦେଶରେ ଶକ୍ତି ସୁରକ୍ଷା ସୁନିଶ୍ଚିତ କରିବା ଏହି ନିଲାମର ଲକ୍ଷ୍ୟ ।
ଅନ୍ୟାନ୍ୟ ରାଜ୍ୟଗୁଡ଼ିକ ମଧ୍ୟରେ ବିହାରର ୩ଟି, ଛତିଶଗଡର ୧୫, ଝାଡଖଣ୍ଡର ୬, ମଧ୍ୟପ୍ରଦେଶର ୧୫, ତେଲେଙ୍ଗାନାର ଗୋଟିଏ, ମହାରାଷ୍ଟ୍ରର ଗୋଟିଏ ଏବଂ ପଶ୍ଚିମବଙ୍ଗର ୩ଟି ଖଣି ସ୍ଥାନିତ ହୋଇଛି ।
ଓଡ଼ିଶାରୁ ସ୍ଥାନ ପାଇଥିବା ଖଣିଗୁଡ଼ିକ ମଧ୍ୟରେ ରହିଛି ଅନୁଗୋଳ ସ୍ଥିତ ନ୍ୟୁ ପାତ୍ରପଡ଼ା ନର୍ଥ, ନ୍ୟୁ ପାତ୍ରପଡ଼ା ସାଉଥ୍, ମହାନଦୀ, ମନ୍ଦାକିନି-ବି, ନର୍ଥ ଅଫ୍ ଅର୍ଖପାଳ ଶ୍ରୀରାମପୁର, ସୁନ୍ଦରଗଡ଼ ସ୍ଥିତ ଟାଙ୍ଗରଡିହ ନର୍ଥ, ଟାଙ୍ଗରଡିହ ସାଉଥ୍ । ଆହୁରି ମଧ୍ୟ ଉସ୍ତାଳି ସେଣ୍ଟ୍ରାଲ, ଉସ୍ତାଳି ନର୍ଥ, ଉସ୍ତାଳି ସାଉଥ୍, ସୁନ୍ଦରଗଡସ୍ଥିତ ବଡ଼ିବାହଲ କୋଇଲା ଖଣି ରହିଛି । ସେହିଭଳି କଣ୍ଟାଇକୋଲିଆ, କର୍ଦବାହାଲ-ବ୍ରାହ୍ମଣବିଲ, କୋଶଳା ପୂର୍ବ, କୋଶଳା ପଶ୍ଚିମ, ଫୁଲଝରି ପୂର୍ବ ଓ ପଶ୍ଚିମ ଏବଂ ବରତାପ କୋଇଲା ଖଣି ସ୍ଥାନିତ ହୋଇଛି । ନିଲାମ ପ୍ରକ୍ରିୟାର ଶୁଭାରମ୍ଭ ଅବସରରେ କୋଇଲା ଏବଂ ଖଣି ରାଷ୍ଟ୍ରମନ୍ତ୍ରୀ ସତୀଶ ଚନ୍ଦ୍ର ଦୁବେ, ତେଲଙ୍ଗାନାର ଉପ-ମୁଖ୍ୟମନ୍ତ୍ରୀ ମାଲୁ ଭଟ୍ଟି ବିକ୍ରମାର୍କ ଏବଂ କେନ୍ଦ୍ର କୋଇଲା ସଚିବ ଅମ୍ରିତ ଲାଲ ମୀନା ପ୍ରମୁଖ ଉପସ୍ଥିତ ଥିଲେ ।
ଏ ଅବସରରେ କେନ୍ଦ୍ର କୋଇଲା ଏବଂ ଖଣି ମନ୍ତ୍ରୀ ଶ୍ରୀ କିଶନ ରେଡ୍ଡି କହିଲେ ଯେ, ଶକ୍ତି ସୁରକ୍ଷା, ଅର୍ଥନୈତିକ ଅଭିବୃଦ୍ଧି ବଢ଼ାଇବା ସହ ବ୍ୟାପକ ନିଯୁକ୍ତି ସୃଷ୍ଟି କରିବା ଦିଗରେ ଏହା ଏକ ପ୍ରମୁଖ ପଦକ୍ଷେପ । କୋଇଲା ଖଣିଗୁଡ଼ିକ ପାଇଁ ମଞ୍ଜୁରି ପ୍ରଦାନ ପ୍ରକ୍ରିୟାକୁ ତ୍ୱରାନ୍ୱିତ କରିବା ଲାଗି କୋଇଲା ମନ୍ତ୍ରାଳୟ ଏକ ସିଙ୍ଗିଲ୍ ୱିଣ୍ଡୋ କ୍ଲିୟରାନ୍ସ ସିଷ୍ଟମ୍ ତିଆରି କରିଛି । ଏକକ ଗେଟ୍ୱେ ଦ୍ୱାରା କୋଇଲା ଉତ୍ପାଦନ ବୃଦ୍ଧି ପାଇବ । ଏହା ଶିଳ୍ପର ପ୍ରଗତିରେ ସହାୟକ ହେବ ବୋଲି କେନ୍ଦ୍ରମନ୍ତ୍ରୀ କହିଛନ୍ତି । କେନ୍ଦ୍ରମନ୍ତ୍ରୀ କହିଲେ ଯେ, ନବମ ପର୍ଯ୍ୟାୟରେ ଏଯାବତ୍ ୧୦୭ କୋଇଲା ଖଣି ସଫଳତାର ସହ ନିଲାମ ହୋଇଛି । ଏହା ମାଧ୍ୟମରେ ୩୮,୪୦୦ କୋଟିର ନିବେଶ ଆସିଛି । ୩ ଲକ୍ଷ ଲୋକଙ୍କ ପାଇଁ ଏହା ପ୍ରତ୍ୟକ୍ଷ ଏବଂ ପରୋକ୍ଷ ନିଯୁକ୍ତି ସୁଯୋଗ ଆଣିବ ।