କେନ୍ଦୁଝର : ଜରୁରୀ ସେବା ୧୦୮ ସରକାରଙ୍କ ଏକ ଯୁଗାନ୍ତକାରୀ ପଦକ୍ଷେପ। ଏହା ସହିତ କେନ୍ଦୁଝରରେ ଖଣିଜ ପ୍ରତିଷ୍ଠାନ ସହାୟତାରେ ଆମ୍ବୁଲାନ୍ସ ମଧ୍ୟ ସରକାର ଯୋଗାଇ ଦେଇଛନ୍ତି। ଏହି ସେବା କାର୍ଯ୍ୟକାରୀ ହେବା ପର ଠାରୁ ସବୁ ବର୍ଗର ଲୋକଙ୍କୁ ଉନ୍ନତ ସ୍ୱାସ୍ଥ୍ୟସେବା ମିଳି ପାରୁଛି। ସରକାର ମାଗଣାରେ ଏହି ସେବା ଯୋଗାଉ ଥିବାରୁ ରୋଗୀମାନେ ଉପକୃତ ହେଉଛନ୍ତି।ତତ୍କ୍ଷଣାତ ଏହି ସେବା ମିଳୁ ଥିବାରୁ ରୋଗୀମାନେ ଡାକ୍ତରଖାନା ପହଞ୍ଚିବାକୁ ସୁବିଧା ହୋଇଛି।
ମାତ୍ର କେନ୍ଦୁଝର ଜିଲ୍ଲାରେ ଏହି ସେବା ବିପର୍ଯ୍ୟସ୍ତ ହୋଇପଡିଛି। ପ୍ରଥମ ପର୍ଯ୍ୟାୟରେ ମିଳିଥିବା ଗାଡ଼ି ଗୁଡିକ ୫ ଲକ୍ଷରୁ ଅଧିକ କିମି ଚାଲିବା ପରେ ଆଉ ପୂର୍ବଭଳି ସେବା ଯୋଗାଇବାରେ ଅସମର୍ଥ ହେଉଛି। ନିୟମ ଅନୁଯାୟୀ ୫ ବର୍ଷ ପରେ ଗାଡି ବଦଳ ହେବା ସ୍ଥାନରେ ୬ ବର୍ଷ ପରେ ମଧ୍ୟ ଆମ୍ବୁଲାନ୍ସ ଗୁଡିକ ସେବା ଯୋଗାଇବାକୁ ବାଧ୍ୟ ହେଉଛି। ଗାଡ଼ି ଗୁଡିକ ବ୍ୟବହାର ଅନୁପୋଯୁକ୍ତ ହୋଇ ପଡିଥିବା ବେଳେ ଭଙ୍ଗା ଦଦରା ଆମ୍ବୁଲାନ୍ସ ଗୁଡିକରେ ଶୀତତାପ ନିୟନ୍ତ୍ରିତ ଯନ୍ତ୍ର ଅଚଳ ହୋଇ ପଡି ଥିବାରୁ ରୋଗୀମାନେ ହନ୍ତସନ୍ତ ହେଉଛନ୍ତି।
ରାଜ୍ୟରେ ଅନ୍ୟତମ ଦୁର୍ଘଟଣା ପ୍ରବଣ ଜିଲ୍ଳା ଭାବେ କେନ୍ଦୁଝର ପରିଗଣିତ।ଖଣି, ଖାଦାନ ଜିଲ୍ଲା ଯୋଗୁ ରାଜପଥ ଗୁଡିକରେ ଭାରୀଯାନ ଚଳାଚଳ ୨୪ ଘଣ୍ଟା ରହିଥାଏ। ପ୍ରତିଦିନ ଦୁର୍ଘଟଣାରେ ଜୀବନହାନୀ ଘଟୁଥିବା ଉଦ୍ବେଗର ବିଷୟ। ତେବେ ସରକାରଙ୍କ ୧୦୮ ଆମ୍ବୁଲାନ୍ସ ସେବା ଆରମ୍ଭ ହେବା ପରେ ଅନେକ ଲୋକେ ଡାକ୍ତରଖାନାରେ ପହଞ୍ଚି ପାରୁଛନ୍ତି। ଆଦିବାସୀ ଅଧ୍ୟୁଷିତ କେନ୍ଦୁଝର ଜିଲ୍ଲାରେ ସ୍ୱାସ୍ଥ୍ୟସେବା ବିପର୍ଯ୍ୟସ୍ତ ହୋଇ ପଡିଥିବା ବେଳେ ସରକାରଙ୍କ ଏହି ଲୋକାଭିମୁଖୀ କାର୍ଯ୍ୟକ୍ରମ ଜିଲ୍ଲାବାସୀଙ୍କ ପାଇଁ ନୂଆ ଆଶାର ସଞ୍ଚାର ହୋଇଥିଲା।
୧୦୮ ଆମ୍ବୁଲାନ୍ସ ସେବାକୁ ଓଡ଼ିଶାର ତତ୍କାଳନୀ ମୁଖ୍ୟମନ୍ତ୍ରୀ ଗତ ୨୦୧୩ ମସିହା ଜୁଲାଇ ୧୭ ତାରିଖରେ କେନ୍ଦୁଝର ଠାରେ ଶୁଭାରମ୍ଭ କରିଥିଲେ। କେନ୍ଦୁଝର ଜିଲ୍ଲାକୁ ୪୫ଟି ଗାଡି ଦିଆ ଯାଇଛି। କେନ୍ଦୁଝରରେ ବିଶ୍ୱପ୍ରସିଦ୍ଧ ତାରିଣୀ ଠାକୁରାଣୀ ସହିତ ପ୍ରମୁଖ ପର୍ଯ୍ୟଟନସ୍ଥଳୀ ଥିବା ବେଳେ ପ୍ରତିଦିନ ହଜାର ହଜାର ଲୋକେ ଏହି ଜିଲ୍ଲାକୁ ଆସିଥାନ୍ତି। ଜିଲ୍ଲାକୁ ମିଳିଥିବା ପୁରୁଣା ୪୫ଟି ଆମ୍ବୁଲାନ୍ସ ଏବେ ମରାମତି ଅଭାବରୁ ଯାତାୟାତରେ ସମସ୍ୟା ରହୁଥିବା ବେଳେ ୩୦ରୁ ଉର୍ଦ୍ଧ୍ୱ ଗାଡ଼ିରେ ଶୀତାତାପ ନିୟନ୍ତ୍ରିତ ଯନ୍ତ୍ର ଅଚଳ ହୋଇପଡିଛି ବୋଲି ଅଭିଯୋଗ ହୋଇଛି। ଫଳରେ ଦୁର୍ଘଟଣାରେ ଶିକାର ହେଉଥିବା ରୋଗୀଙ୍କ ପାଇଁ ୧୦୮ ଗାଡି କଷ୍ଟଦାୟକ ହୋଇପଡିଛି ।
ସେହିପରି ଡିଏମ୍ଏଫ୍ ଦ୍ୱାରା ପରିଚାଳିତ ଆମ୍ବୁଲାନ୍ସରେ ମଧ୍ୟ କେତେକ ଗାଡିରେ ଏସି ଅଚଳ ହୋଇପଡିଥିବା ବେଳେ ମରାମତି ଦିଗରେ ପଦକ୍ଷେପ ଗ୍ରହଣ କରାଯାଉନି । କଟକ ବଡଡାକ୍ତରଖାନାକୁ ବିନା ଏସିରେ ଯାଉଥିବା ରୋଗୀମାନେ ଡହଳବିକଳ ହେଉଛନ୍ତି । ସରକାରଙ୍କୁ ଆମ୍ବୁଲାନ୍ସ ଯୋଗାଇଥିବା ସଂସ୍ଥା ଏସି ବ୍ୟବହାର ହାରରେ ନିଜର ପ୍ରାପ୍ୟ ସରକାରଙ୍କ ଠାରୁ ନେଉଥିବା ବେଳେ ରୋଗୀମାନେ ଉପଯୁକ୍ତ ସେବାରୁ ବଞ୍ଚିତ ରହୁଛନ୍ତି । କେତେକ ଗାଡିରେ ଟାୟାର, ବ୍ୟାଟେରୀ ଏବଂ ରୋଗୀଙ୍କ ପାଇଁ ସର୍ବନିମ୍ନ ସୁବିଧା ନଥିବାରୁ ୧୦୮ ସେବା ପ୍ରତି ଲୋକଙ୍କ ଭରସା ତୁଟିବାରେ ଲାଗିଛି । ଏ ସମ୍ପର୍କରେ ୧୦୮ ଆମ୍ବୁଲାନ୍ସର ଜିଲ୍ଲା ପରିଚାଳକ ସୁବ୍ରତ ବାବୁଙ୍କୁ ପଚାରିବାରୁ କେତେକ ଆମ୍ବୁଲାନ୍ସରେ ଏସି ପାଇଁ ଆବଶ୍ୟକ ଗ୍ୟାସ୍ ଭର୍ତ୍ତି କରାଯିବାକୁ ଥିବାରୁ ତାହା ହୋଇ ପାରିନି । ଏବେ ଭେଣ୍ଡର ଜରିଆରେ ମରାମତି କାର୍ଯ୍ୟ ହେଉଛି। ତେଣୁ ଭେଣ୍ଡର ସମସ୍ୟା ଯୋଗୁ ବିଳମ୍ବ ହେଉଛି ମରାମତି। ୭ ଦିନ ମଧ୍ୟରେ ସମସ୍ତ ଗାଡିରେ ଏସି ସଚଳ କରାଯିବା ପାଇଁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
