ଉଦଳା ୦୩/୦୯: ରାତିରେ ପେଟ୍ରୋଲିଂ ଚାଲିଥିବା ସମୟରେ ପୋଲିସ ଗାଡିକୁ ଧକା ଦେଲା ୧୦୮ ଆମ୍ବୁଲାନ୍ସ। ପୋଲିସ ଗାଡିକୁ ଆମ୍ବୁଲାନ୍ସ ଧକା ଦେଇ ୩୦ ଫୁଟ ଦୂରକୁ ପେଲି ନେଇଥିଲା ।  ଘଟଣା ସ୍ଥଳରେ ଜଣେ ପୋଲିସ କନେଷ୍ଟବଳ ଗାଡିତଳେ ଚାପି ମୃତ୍ୟୁ ହୋଇଥିବା ବେଳେ ୨ ଜଣ ଗୁରୁତର ଆହତ ହୋଇଛନ୍ତି । ଏମିତି ଏକ ଭୟଙ୍କର ଦୁର୍ଘଟଣା ଘଟିଛି  ଉଦଳା ମାର୍କେଟ ଇଣ୍ଡିଆନ ପେଟ୍ରୋଲ ଟାଙ୍କି ସାମ୍ନାରେ।

ସୂଚନା ଅନୁଯାୟୀ, ଉଦଳା ଥାନା ଅଧିକାରୀ ବନମାଳୀ ବାରିକ ୫ ଜଣ ଷ୍ଟାଫଙ୍କୁ ନେଇ ରାତି ପେଟ୍ରୋଲିଂ କରୁଥିଲେ। ଇଣ୍ଡିଆନ ପେଟ୍ରୋଲ ଟାଙ୍କି ସାମ୍ନାରେ ରାସ୍ତା କଡ଼ରେ ବୋଲେରକୁ ଛିଡା କରି ଏତେ ରାତିରେ ଟାଙ୍କିକୁ ପେଟ୍ରୋଲ ପକାଇବାକୁ ଆସିଥିବା ଏକ ମୋଟର ସାଇକେଲକୁ ଅଟକାଇ ଥାନାର ମୁଖ୍ୟ କନେଷ୍ଟବଳ ମୁକୁନ୍ଦ ଚରଣ ମଲ୍ଲିକ  ଗାଡ଼ିରୁ ଓହ୍ଲାଇ ପଚାର ଉଚରା କରୁଥିଲେ । ଏହି ସମୟରେ ଖୁଣ୍ଟା ପଟୁ ଆସୁଥିବା (ଓଡି ୦୨ସିପି ୦୪୧୯) ୧୦୮ ଆମ୍ବୁଲାନ୍ସଟି ଦ୍ରୁତ ଗତିରେ ଆସି ପୋଲିସ ଗାଡିକୁ ସାମ୍ନାପଟୁ ଜୋରରେ ଧକ୍କା ଦେଇଥିଲା । ଫଳରେ ପୋଲିସ ବୋଲେର ଟି ୩ ରାଉଣ୍ଡ ପଲଟି ୩୦ ଫୁଟ ଦୂରରେ ପଡିଥିଲା। 

ଦୁର୍ଘଟଣାଟି ଏତେ ଭୟଙ୍କର ଥିଲା ଯେ କନେଷ୍ଟବଳ ଲକ୍ଷ୍ମୀଧର ମହାନ୍ତ ବୋଲେରରୁ ବାହାରି ବୋଲେରତଳେ ଚାପି ହୋଇ ଯାଇଥିଲେ। ଫଳରେ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଯାଇଥିଲା। ଥାନା ଅଧିକାରୀ ବନମାଳୀ ବାରିକ ଓ ଡ୍ରାଇଭର ସଦାନନ୍ଦ ସିଂ ଗୁରୁତର ଥିବା ବେଳେ ଜି.ଆର ସୁଦର୍ଶନ ପାତ୍ର ସୁସ୍ଥ ଥିବାର ସୂଚନା ମିଳିଛି। ଅନ୍ୟ ପକ୍ଷରେ ଆମ୍ବୁଲାନ୍ସରେ ଥିବା ୩ ଜଣଙ୍କ ମଧ୍ୟରେ ଡ୍ରାଇଭର ଓ ହେଲ୍ପର ଗୁରୁତର ଥିବା ବେଳେ ତାଙ୍କୁ ବାରିପଦା ସ୍ଥାନାନ୍ତର କରାଯାଇଛି। ଫାର୍ମାସିଷ୍ଟ ସାମାନ୍ୟ ଆହତ ହୋଇ ଉଦଳା ଡାକ୍ତରଖାନାରେ ଚିକିତ୍ସିତ ହେଉଥିବାର ସୂଚନା ମିଳିଛି।