ନୂଆଦିଲ୍ଲୀ,୬।୨: ଆଗାମୀ ଲୋକସଭା ନିର୍ବାଚନ ପୂର୍ବରୁ ନିର୍ବାଚନ କମିଶନ୍ ୧.୬୬ କୋଟିରୁ ଅଧିକ ଭୋଟରଙ୍କ ନାଁ ଲିଷ୍ଟରୁ ହଟାଇ ଦେଇଛନ୍ତି। ସେଭଳି ରିଭାଇଜ୍ ଲିଷ୍ଟରେ ୨.୬୮ କୋଟିରୁ ଅଧିକ ଲୋକଙ୍କ ନାଁ ସାମିଲ କରାଯାଇଛି। ଏହା ସହିତ ୨୦୨୪ ରେ ହେବାକୁ ଥିବା ସାଧାରଣ ନିର୍ବାଚନରେ ଭୋଟ ଦେବା ପାଇଁ ଯୋଗ୍ୟ ମତଦାତାଙ୍କ ସଂଖ୍ୟା ୯୭ କୋଟି ହୋଇଯାଇଛି। ନିର୍ବାଚନ କମିଶନ୍ ସୁପ୍ରିମକୋର୍ଟଙ୍କୁ କହିଛନ୍ତି, ୬କୁ ଛାଡି ବାକି ରାଜ୍ୟରେ ମତଦାତାଙ୍କ ରିଭିଜନ୍ କରାଯାଇଛି। ଆସମ, ମଧ୍ୟ ପ୍ରଦେଶ, ଛତିଶଗଡ, ରାଜସ୍ଥାନ, ମିଜୋରାମ ଓ ତେଲେଙ୍ଗାନାକୁ ଏହାଠାରୁ ଅଲଗା ରଖାଯାଇଛି।
ସମ୍ବିଧାନ ବଞ୍ଚାଅ ଟ୍ରଷ୍ଟ ପକ୍ଷରୁ ଦାଖଲ କରାଯାଇଥିବା ଆବେଦନ ଉପରେ ସୁପ୍ରିମକୋର୍ଟ ଶୁଣାଣି କରୁଥିଲେ। ଏହି ଆବେଦରେ ଦାବି କରାଯାଇଥିଲା ଯେ, ଭୋଟର ଲିଷ୍ଟରୁ ଡୁପ୍ଲିକେଟ୍ ନାଁକୁ କାଟି ଦିଆଯାଇ ଏହାର ସୂଚନା ଉପଲବ୍ଧ କରାଯାଉ। ପିଆଇଏଲ ଉପରେ ଶୁଣାଣି କରୁଥିବା ସିଜେଆଇ ଚନ୍ଦ୍ରଚୂଡଙ୍କ ଖଣ୍ଡପୀଟ ନିର୍ବାଚନ କମିଶନଙ୍କୁ ଏହାର ତଥ୍ୟ ମାଗିଛନ୍ତି। ନିର୍ବାଚନ କମିଶର ସେହି ଲୋକଙ୍କ ସଂଖ୍ୟା ଆଗତ କରିଛନ୍ତି, ଯାହାଙ୍କର ମୃତ୍ୟୁ କିମ୍ବା ନାଁ ରିପିଟ୍ ଥିବା କାରଣରୁ ଭୋଟର ଲିଷ୍ଟରୁ ହଟାଇ ଦିଆଯାଇଛି। ଖଣ୍ଡପୀଠ ମାମଲାର ଆଗାମୀ ଶୁଣାଣି ୧୨ ଫେବୃଆରୀରେ କରିବେ।
ଆଡଭୋକେଟ୍ ଅମିତ ଶର୍ମା ନିର୍ବାଚନ କମିଶନଙ୍କ ସତ୍ୟପାଠ କୋର୍ଟରେ ଆଗତ କରିଛନ୍ତି। ଏଥିରେ କୁହାଯାଇଛି ୧ ଜାନୁଆରୀ ୨୦୨୪ ପର୍ଯ୍ୟନ୍ତ ମୋଟ ୨,୬୮,୮୬,୧୦୬ ନୂଆ ଭୋଟରଙ୍କୁ ଯୋଡି ଦିଆଯାଇଛି। ସେଭଳି ମୃତ୍ୟୁ, ଡୁପ୍ଲିକେସନ୍ କିମ୍ବା ପୁଣିଥରେ ଲୋକଙ୍କୁ ଆଉ କେଉଁଠିକୁ ସିଫ୍ଟ ହେବା କାରଣରୁ ୧,୬୬,୬୧,୪୧୩ ନାଁ ହଟାଇ ଦିଆଯାଇଛି। କମିଶନଙ୍କ ପ୍ୟାନେଲ ତରଫରୁ କୁହାଯାଇଛି ବର୍ତ୍ତମାନ ଦେଶରେ ୯୬,୮୨,୫୪,୫୬୦ ମତଦାତା ଲିଷ୍ଟେଡ୍ ଅଛନ୍ତି। ତାଙ୍କ ଭିତରୁ ୧.୮୩ ଲୋକ ୧୮ ବର୍ଷରୁ ୧୯ ବର୍ଷ ଭିତରେ ଅଛନ୍ତି, ଯେଉଁମାନେ କି ପ୍ରଥମ ଥର ଭୋଟ ଦେବେ।
ଉଲ୍ଲେଖନୀୟ ଯେ, ବର୍ଷକରେ ଥରେ ନିର୍ବାଚନ କମିଶନ୍ ଏସଏସ୍ଆର(ସ୍ପେଶାଲ ସମରି ରିଭିଜନ୍) କରିଥାନ୍ତି। ଆସାମରେ ପରମିସନ୍ କାରଣରୁ ଏସ୍ଏସ୍ଆର କରାଯାଇନଥିଲା। ସେଭଳି ଅନ୍ୟ ୫ଟି ରାଜ୍ୟରେ ନିକଟରେ ବିଧାନସଭା ନିର୍ବାଚନ କରାଯାଇଛି, ତେଣୁ ବାକି ରାଜ୍ୟରେ ଏସଏସଆର କରାଯାଇଛି। ସତ୍ୟପାଠରେ କୁହାଯାଇଛି ଯେ, ଲୋକସଭା ନିର୍ବାଚନ ପୂର୍ବରୁ ଏହା ଶେଷ ଏସଏସଆର ଅଟେ।