ନୂଆଦିଲ୍ଲୀ ୧୦/୦୯: ଅଙ୍ଗ ପ୍ରତିରୋପଣକୁ ଅପେକ୍ଷା କରିଥିବା ଲକ୍ଷାଧିକ ରୋଗୀଙ୍କ ପାଇଁ ଭଲ ଖବର । ବୈଜ୍ଞାନିକମାନେ ପ୍ରଥମ ଥର ଘୁଷୁରିଠାରେ ମାନବ ବୃକ୍କ ବିକଶିତ କରିଛନ୍ତି । ଅଙ୍ଗ ପ୍ରତିରୋପଣ ଅପେକ୍ଷାରେ ପ୍ରାଣ ହରାଉଥିବା ହଜାର ହଜାର ଲୋକଙ୍କୁ ଏହି ପ୍ରୟାସ ବଞ୍ଚାଇ ପାରିବ । ଏହା ଜରିଆରେ ଜନ୍ତୁଙ୍କଠାରେ ମାନବ ଅଙ୍ଗର ବିକାଶ ହୋଇପାରିବ । ଫଳରେ ମାନବ ଅଙ୍ଗ ଦାତାଙ୍କ ପାଇଁ ଅପେକ୍ଷା କରିବା ପରିବର୍ତ୍ତେ ଅସୀମିତ ଅଙ୍ଗ ଯୋଗାଣର ମାର୍ଗ ଖୋଲିବ ।
ବୈଜ୍ଞାନିକମାନେ ଘୁଷୁରିଠାରେ ମଣିଷ କିଡ୍ନୀ ବା ବୃକ୍କ ସ୍ଥାପନ କରିପାରିବେ ନାହିଁ, କାରଣ ଜନ୍ତୁଙ୍କ ପ୍ରତିରକ୍ଷା ପ୍ରଣାଳୀ ଏହାକୁ ଗ୍ରହଣ କରିବ ନାହିଁ । ଏବେ କିନ୍ତୁ ଗବେଷକମାନେ ଏକ ମାଈ ଗର୍ଭବତୀ ଘୁଷୁରିର ପ୍ରାରମ୍ଭିକ ବିକାଶ ପର୍ଯ୍ୟାୟରେ ଥିବା ଭ୍ରୂଣଠାରେ ମାନବ କିଡ୍ନୀ ବୃଦ୍ଧି କରିବାରେ ସକ୍ଷମ ହୋଇଛନ୍ତି । ଠିକ୍ ଆଇଭିଏଫ୍ ଭଳି, ଶୂକ୍ରାଣୁ ଜରିଆରେ ଡିମ୍ବାଣୁକୁ ପ୍ରଜନନକ୍ଷମ କରି ଏହି ଘୁଷୁରି ଭ୍ରୂଣ ପ୍ରୟେଗଶାଳାରେ ବିକଶିତ ହୋଇଥିଲା । କିନ୍ତୁ ମାନବ କୋଷିକାଗୁଡ଼ିକ ପାଇଁ ଏହାକୁ ଅଧିକ ଗ୍ରହଣଶୀଳ କରିବା ଲାଗି ବଂଶାନୁକ୍ରମିକ ରୂପେ ଇଞ୍ଜିନିୟର୍ କରାଯାଇଥିଲା ।
ତା’ପରେ ବୈଜ୍ଞାନିକମାନେ ସେଥିରେ ମାନବ ‘ପ୍ଲୁରିପୋଟେଣ୍ଟ୍’ ଷ୍ଟେମ୍ କୋଷିକା ମିଶାଇଲେ, ଯାହା ଶରୀରରେ ଯେକୌଣସି ପ୍ରକାର ଷ୍ଟେମ୍ ସେଲ୍ ହୋଇ ପାରିବ । ଏକ ସ୍ୱତନ୍ତ୍ର ରାସାୟନିକ ପ୍ରକ୍ରିୟା ଜରିଆରେ ସେଗୁଡ଼ିକୁ ବଢ଼ାଇଲେ, ଫଳରେ ସେଗୁଡ଼ିକ ଯେମିତି କ୍ଷୁଦ୍ର କିଡ୍ନୀରେ ବିକଶିତ ହୋଇପାରିବ । ଆଇଭିଏଫ୍ ପ୍ରକ୍ରିୟା ଭଳି ଗର୍ଭଧାରଣ ଲାଗି ଘୁଷୁରି ଭ୍ରୂଣଗୁଡ଼ିକୁ ସରୋଗେଟ୍ ମାଈ ଘୁଷୁରିଙ୍କଠାରେ ଛଡ଼ାଗଲା । ଗର୍ଭରେ ପ୍ରାୟ ଗୋଟିଏ ମାସ ପରେ ଘୁଷୁରି ଭ୍ରୂଣ ଭିତରେ କିଡ୍ନୀଗୁଡ଼ିକର ସ୍ୱାଭାବିକ ଢାଞ୍ଚା ସୃଷ୍ଟି ହୋଇଥିଲା । ସେମାନେ କୋଷିକାଗୁଡ଼ିକର ଏକ ବଣ୍ଡଲ୍ ବିକଶିତ କରିଥିଲେ, ଯାହା ପରେ ଶରୀରର ବର୍ଜ୍ୟ ଉତ୍ପାଦ ନିଷ୍କାସନ ଲାଗି କିଡ୍ନୀକୁ ବ୍ଲାଡର୍ ସହ ସଂଯୋଗ କରିଥିଲା । ଗୁରୁତ୍ୱପୂର୍ଣ୍ଣ କଥା ହେଉଛି ଘୁଷୁରି ଭ୍ରୂଣ ଭିତରେ ବଢ଼ିବା ସତ୍ତେ୍ୱ ତାହା ଅଧାରୁ ଅଧିକ ମଣିଷର ଥିଲା । ଏହି କିଡ୍ନୀରେ ୬୦ ଭାଗ ମାନବ କୋଷିକା ଥିବାବେଳେ ୪୦ ଭାଗ ଘୁଷୁରି କୋଷିକା ରହିଛି । ଏହି ଅଭିନବ ବିକାଶକୁ ଯଦି ଅନୁମତି ପ୍ରଦାନ କରାଯାଏ, ତେବେ ମାନବ ପ୍ରତିରୋପଣ ନିମନ୍ତେ ସେଗୁଡ଼ିକ କାର୍ଯ୍ୟକ୍ଷମ କିଡ୍ନୀ ହୋଇପାରିବ । କିନ୍ତୁ ବିଶେଷଜ୍ଞଙ୍କ ଅନୁସାରେ, ଘୁଷୁରିଙ୍କଠାରେ ମାନବ ଅଙ୍ଗ ବିକଶିତ କରିବାକୁ ଆହୁରି ଅନେକ ବର୍ଷ ଲାଗିବ । କାରଣ ସଦ୍ୟ ଅଧ୍ୟୟନରେ ବିକଶିତ କିଡ୍ନୀଗୁଡ଼ିକର ମାନବ ରକ୍ତ ବାହିକା ଥିଲା, ଯାହାକୁ ଗର୍ଭବତୀ ଘୁଷୁରିର ପ୍ରତିରକ୍ଷା ପ୍ରଣାଳୀ ପ୍ରତ୍ୟାଖ୍ୟାନ କରିବ ।
ଏହି ସମସ୍ୟା ସମାଧାନ ଲାଗି ଏହା ଆହୁରି ଅଧିକ ଜଟିଳ ଜିନ୍ଗତ ଇଞ୍ଜିନିୟରିଙ୍ଗ ଆବଶ୍ୟକ କରିବ, ଯାହା ଫଳରେ ମଣିଷଠାରେ ପ୍ରତିରୋପଣ ଲାଗି କିଡ୍ନୀ ଉପଯୁକ୍ତ ହୋଇପାରିବ । ସଦ୍ୟ ଅଧ୍ୟୟନରୁ ଆହୁରି ଜଣାପଡ଼ିଲା ଯେ ସୂକ୍ଷ୍ମ ସଂଖ୍ୟକ ମାନବ କୋଷିକା ଘୁଷୁରି ଭ୍ରୂଣର ମସ୍ତିଷ୍କ ଓ ମେରୁଦଣ୍ଡକୁ ଯାଇଥିଲା ବୋଲି ଅଧ୍ୟୟନର ବରିଷ୍ଠ ଲେଖକ ଗୁଆଙ୍ଗଝୋଉ ଇନ୍ଷ୍ଟିଚ୍ୟୁଟ୍ ଅଫ୍ ବାୟୋମେଡିସିନ୍ ଆଣ୍ଡ ହେଲ୍ଥର ଡା. ଲାଇ ଲିଆଙ୍ଗସୁ କହିଛନ୍ତି । ଘୁଷୁରିଙ୍କଠାରେ ମାନବ ଅଙ୍ଗ ବିକଶିତ କରିବାର ପୂର୍ବ ପ୍ରୟାସ ବିଫଳ ହୋଇଥିଲା ବୋଲି ସେ କହିଛନ୍ତି । ସେଲ୍ ଷ୍ଟେମ୍ ସେଲ୍ ନାମକ ପତ୍ରିକାରେ ଅଧ୍ୟୟନର ଫଳ ପ୍ରକାଶ ପାଇଛି ।
ଘୁଷୁରି ଭ୍ରୂଣରେ ଆପାତତଃ ମାନବ କିଡ୍ନୀ ବିକଶିତ କରିବାର ପ୍ରକ୍ରିୟାରେ ବୈଜ୍ଞାନିକମାନେ ମାନବ ଷ୍ଟେମ୍ କୋଷିକାଗୁଡ଼ିକୁ ଘୁଷୁରି କୋଷିକା ସହିତ ଉତ୍ତମ ରୂପେ ଏକୀକୃତ କରିବା ଲାଗି ଜିନ୍ଗତଭାବେ ଇଞ୍ଜିନିୟର୍ କରିଥିଲେ । ମାନବ କୋଷିକା କିଡ୍ନୀ ବିକଶିତ କରିବା ଲାଗି ସେମାନେ ଘୁଷୁରି ଭ୍ରୂଣରୁ କିଡ୍ନୀ ବିକାଶ ନିମନ୍ତେ ଜରୁରି ଦୁଇଟି ଗୁରୁତ୍ୱପୂର୍ଣ୍ଣ ଜିନ୍କୁ ହଟାଇ ଦେଇଥିଲେ । ଗବେଷକମାନେ ମୋଟ୍ ୧୩ ମାଈ ଘୁଷୁରିଙ୍କଠାରେ ୧,୮୨୦ ଭ୍ରୂଣ ସ୍ଥାନାନ୍ତର କରିଥିଲେ । ୨୮ ଦିନ ପରେ ୫ ଭ୍ରୂଣଙ୍କଠାରେ ସ୍ୱାଭାବିକ ରୂପେ କିଡ୍ନୀର ବିକାଶ ୨ୟ ପର୍ଯ୍ୟାୟରେ ପ୍ରବେଶ କରିଥିଲା ।
