ରାଉରକେଲା,୧୪/୬: ଓଡ଼ିଶା -ଝାଡ଼ଖଣ୍ଡ ସୀମାନ୍ତ ସରଣ୍ଡା ଜଙ୍ଗଲରେ ଆଇଇଡି ବିସ୍ଫୋରଣ। ଏଥିରେ ଗୁରୁତର ହୋଇଛନ୍ତି ଜଣେ ସିଆରପିଏଫ୍ ଯବାନ । ତାଙ୍କୁ ଉଦ୍ଧାର କରାଯାଇ ଚିକିତ୍ସା ଲାଗି ଅଣାଯାଇଛି ରାଉରକେଲା।
ସୂଚନା ମୁତାବକ, ଯବାନମାନେ କମ୍ବିଂ ଅପରେସନ ଚଳାଇଥିବା ବେଳେ ଶନିବାର ଭୋର ସମୟରେ ମାଓବାଦୀଙ୍କ ପକ୍ଷରୁ ଆଇଇଡି ବିସ୍ଫୋରଣ ହୋଇଥିଲା। ଏହି ବିସ୍ଫୋରଣରେ ସିଆରପିଏଫର ଜଣେ ଯବାନ ଗୁରୁତର ହୋଇଥିବା ବେଳେ ତାଙ୍କୁ ଉଦ୍ଧାର କରାଯାଇ ଚିକିତ୍ସା ଲାଗି ରାଉରକେଲା ଅଣାଯାଇଛି। ଗତ ମାସ ୨୭ ତାରିଖରେ କେ. ବରାଙ୍ଗ ଥାନା ଅନ୍ତର୍ଗତ ବାଙ୍କୋ ପଥର ଖାଦାନରୁ ମାଓବାଦୀମାନେ ୫ ଟନ ବିସ୍ଫୋରକ ଲୁଟି ନେଇଥିଲେ। ଏହାପରେ ଉଭୟ ରାଜ୍ୟର ପୁଲିସ୍ ଏବଂ ସୁରକ୍ଷବାହିନୀ ସରଣ୍ଡା ଜଙ୍ଗଲରେ ସର୍ଚ୍ଚ ଅପରେସନ ଜାରି ରଖିଛନ୍ତି। ଶୁକ୍ରବାର ରାତିରୁ ସରଣ୍ଡା ଜଙ୍ଗଲର ବାଙ୍କୋ ଓ ଏହାର ଆଖପାଖ ଜଙ୍ଗଲରେ ସିଆରପିଏଫ, କୋବ୍ରା, ଏସଓଜି, ଡିଭିଏଫ, ଜାଗୁଆର ବାହିନୀର ଯବାନମାନେ ଅପରେସନ ଚଳାଇ ଥିଲେ । ଶନିବାର ଭୋର ସମୟରେ ମାଓବାଦୀମାନେ ଯବାନଙ୍କୁ ଟାର୍ଗେଟ କରି ଆଇଇଡି ବିସ୍ଫୋରଣ କରିଛନ୍ତି । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ କମ୍ବିଂ ଅପରେସନକୁ ଜୋରଦାର କରାଯାଇଛି ।
