ନୂଆଦିଲ୍ଲୀ, ୬।୧୦: ବର୍ତ୍ତମାନ ରିଲ୍ ଓ ସର୍ଟ୍ସର ଯୁଗ । ପ୍ରାୟ ଅଧିକାଂଶ ଯୁବପିଢ଼ି ଏଥିସହ ଜଡ଼ିତ । ୟୁଟ୍ୟୁବ୍ ସର୍ଟ୍ସରେ ମାତ୍ର, ଗୋଟିଏ ମିନିଟ୍ରେ କରିହେଉଥିଲା ଭିଡିଓ । ଏଣିକି ୟୁଟ୍ୟବ୍ରୁ ଉଠିଗଲା ୬୦ ସେକେଣ୍ଡର ସର୍ଟ୍ସ । ଆଉ କରିହେବନି ୧ ମିନିଟ୍ର ସର୍ଟ୍ସ ଭିଡିଓ । ଅକ୍ଟୋବର ୧୫ରୁ ଲାଗୁ ହେବ ଏହି ନିୟମ । ଜାଣନ୍ତୁ ଏବେ କେତେ ମିନଟ୍ରେ କରିପାରିବେ ଭିଡିଓ ?
ଗୁଗୁଲର ଏକ ପପୁଲାର ଫିଚର ୟୁଟ୍ୟୁବ୍ ସର୍ଟ୍ସ । ଏହି ସର୍ଟ୍ସ ଭିଡିଓ ଫିଚର ଆଣିବା ଫଳରେ ଟିକଟକ୍, ଇନଷ୍ଟାଗ୍ରାମ ରିଲ୍ସ ଓ ଅନ୍ୟ ସୋସିଆଲ ମିଡିଆ ପ୍ଲାଟଫର୍ମକୁ ୟୁଟ୍ୟୁବ୍ ଟକ୍କର ଦେବାରେ ସକ୍ଷମ ହୋଇପାରିଥିଲା । ୟୁଟ୍ୟୁବ୍ ସର୍ବଦା ତା’ର ୟୁଜର୍ସଙ୍କ ପାଇଁ ନୂଆ ନୂଆ ଫିଚର୍ସ ଆଣିଥାଏ । ତେବେ ସର୍ଟ୍ସ କରୁଥିବା କ୍ରିଏଟର୍ସଙ୍କ ପାଇଁ ଏହା ମଧ୍ୟରେ ୟୁଟ୍ୟୁବ୍ ଏକ ନୂଆ ଫିଚର ଆଣିଛି । ପୂର୍ବରୁ ୟୁଟ୍ୟୁବ ସର୍ଟ୍ସରେ ୬୦ ସେକେଣ୍ଡ ପର୍ଯ୍ୟନ୍ତ ଭିଡିଓ ଅପଲୋଡ୍ କରିବା ନେଇ ବ୍ୟବସ୍ଥା ରହିଥିବା ବେଳେ ଏବେ ତାହାକୁ ବଦଳାଇଛି ୟୁଟ୍ୟୁବ୍ । ଗୁଗୁଲ ଏହି ଲିମିଟ୍କୁ ବଢ଼ାଇ ଦେଇଛି । ବର୍ତ୍ତମାନ ୟୁଟ୍ୟବ୍ ସର୍ଟ୍ସରେ ୧ମିନିଟ୍ରୁ ଅଧିକ ସମୟ ପର୍ଯ୍ୟନ୍ତ ଭିଡିଓ ଅପଲୋଡ୍ କରିହେବ । ଏଣିକି ୩ ମିନିଟ୍ ପର୍ଯ୍ୟନ୍ତ ସର୍ଟ୍ସ ଭିଡିଓ ଅପଲୋଡ୍ କରିହେବ । ଗୁଗୁଲର କହିବାନୁସାରେ, କ୍ରିଏଟର୍ସମାନେ ଅକ୍ଟୋବର ୧୫ରୁ ୟୁଟ୍ୟବ୍ ସର୍ଟ୍ସରେ ୩ ମିନଟ୍ର ଭିଡିଓ ଅପଲୋଡ୍ ବା ସେୟାର କରିପାରିବେ । ବର୍ତ୍ତମାନ ପର୍ଯ୍ୟନ୍ତ ୟୁଟ୍ୟୁବରେ ଅପଲୋଡ୍ ହେଉଥିବା ସର୍ଟ୍ସ ୧ ମିନିଟ୍ ଅବଧି ବିଶିଷ୍ଟ ରହିଥିଲା । ଏଣିକି ଲମ୍ୱା ଭିଡିଓକୁ ଦୃଷ୍ଟିରେ ରଖି ୟୁଟ୍ୟୁବ୍ କ୍ରିଏଟର୍ସଙ୍କୁ ନିଜର କଣ୍ଟେଣ୍ଟ ପାଇଁ ଅଧିକ ସ୍ଥାନ ମିଳିପାରିବ । ୟୁଟ୍ୟୁବର ଏହି ଫିଚର ପରିବର୍ତ୍ତନ ଫଳରେ ପୂର୍ବରୁ ଅପଲୋଡ୍ ହୋଇଥିବା ଭିଡିଓ ଉପରେ କୌଣସି ପ୍ରଭାବ ପଡ଼ିବ ନାହିଁ ।
ୟୁଟ୍ୟୁବରେ ଏକ ମଜାଦାର ଟୁଲ୍ ହେଉଛି ଟେମ୍ପଲେଟ୍ସ । ଏହି ଫିଚର ଜରିଆରେ କ୍ରିଏଟର୍ସ କୌଣସି ସର୍ଟ୍ସରେ ଦିଆଯାଇଥିବା ରିମିକ୍ସ ବଟନରେ ଟ୍ୟାପ୍ କରି ସହଜରେ ଟ୍ରେଣ୍ଡିଂ ଭିଡିଓକୁ ରିମିକ୍ସ ଓ ରିକ୍ରିଏଟ କରିପାରିବେ । ରିମିକ୍ସ ବଟନରେ ଟ୍ୟାପ୍ କରିବା ପରେ ‘ୟୁଜ୍ ଦିସ୍ ଟେମ୍ପଲେଟ୍’ ଅପ୍ସନକୁ ସିଲେକ୍ଟ କରିବାକୁ ପଡ଼ିବ । ଏଥିସହିତ ୟୁଟ୍ୟୁବ୍ ଆଗାମୀ ଦିନରେ ସର୍ଟ୍ସରେ ଅଧିକ ୟୁଟ୍ୟୁବ୍ କଣ୍ଟେଟକୁ ଉନ୍ନତ କରିବା ପାଇଁ ନୂଆ ଅପଡେଟ୍ ଆଣିବ । କ୍ରିଏଟର୍ସ ନିଜର ସର୍ଟ୍ସ ପାଇଁ ଅନ୍ୟ ୟୁଟ୍ୟୁବ ଭିଡିଓ ଓ ମ୍ୟୁଜିକ୍ ଭିଡିଓର କ୍ଲିପ୍ ବ୍ୟବହାର କରିପାରିବେ । ଏହାଛଡ଼ା କ୍ରିଏଟର୍ସଙ୍କ ସହାୟତା ପାଇଁ ୟୁଟ୍ୟୁବ୍ ଏକ ନୂଆ ‘ସର୍ଟ୍ସ ଟ୍ରେଣ୍ଡସ’ ପେଜ ମଧ୍ୟ ଲଞ୍ଚ କରୁଛି, ଯାହାର ସହାୟତାରେ ୟୁଜର୍ସ ଲାଟେଷ୍ଟ ଭାଇରଲ କଣ୍ଟେଣ୍ଟକୁ ୟୁଜର୍ସଙ୍କ ପାଖରେ ସହଜରେ ପହଞ୍ଚାଇପାରିବେ ।
