ବଡ଼ବିଲ,୦୬/୦୯: ବୈତରଣୀ ନଦୀରେ ଗାଧୋଇବାବେଳେ ପାଣିରେ ବୁଡ଼ି ନିଖୋଜ ହୋଇଥିଲେ ଯୁବକ । ନିଖୋଜ ହେବାର ଦୁଇ ଦିନ ପରେ ଉଦ୍ଧାର ହେଲା ଯୁବକଙ୍କ ମୃତଦେହ ଉଦ୍ଧାର । ମୃତକ ଜଣକ ସଞ୍ଜିତ ନାଏକ ବୋଲି ଜଣାପଡ଼ିଛି । କେନ୍ଦୁଝର ଜିଲ୍ଲା ଯୋଡ଼ା ଥାନା ଅନ୍ତର୍ଗତ କଣ୍ଡରା ଗାଁରେ ଏଭଳି ଅଭାବନୀୟ ଘଟଣା ଘଟିଛି । 

ସୂଚନା ଅନୁଯାୟୀ, ସେପ୍ଟେମ୍ବର ୪ ତାରିଖ ଅର୍ଥାତ ବୁଧବାର ପ୍ରାୟ ୧ଟା ସମୟରେ ନିଜର ସାନ ଭାଇ ଚନ୍ଦନ ଓ ଗ୍ରାମର ଅନ୍ୟ କିଛି ଯୁବକଙ୍କ ସହିତ ବୈତରଣୀ ନଦୀକୁ ଗାଧୋଇବାକୁ ଯାଇଥିଲେ ସଞ୍ଜିତ । ସେଠାରେ ଗାଧୋଇବା ସମୟରେ ତାଙ୍କର ଗୋଡ଼ ଖସିଯାଇଥିଲା । ଫଳରେ ଗଭୀର ପାଣିରେ ବୁଡ଼ି ନିଖାଜ ହୋଇଯାଇଥିଲେ ସଞ୍ଜିତ । ଏହା ଦେଖି ତାଙ୍କ ସାନ ଭାଇ ଏବଂ ଅନ୍ୟ ଯୁବକ ଜଣକ ତୁରନ୍ତ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବାହିନୀର ଏକ ଟିମ୍‌ ଘଟଣା ସ୍ଥଳରେ ପହଞ୍ଚିଥିଲା । ସେଠାରେ ପହଞ୍ଚି ସର୍ଚ୍ଚ ଅପେରେସନ ଆରମ୍ଭ କରିଥିଲା । ଦୀର୍ଘ ଦୁଇ ଦିନ ଧରି ଖୋଜାଖୋଜି କରିବା ପରେ ମଧ୍ୟ ସଞ୍ଜିତଙ୍କ ସନ୍ଧାନ ମିଳି ନଥିଲା । ତେବେ ଶୁକ୍ରବାର ଭୋର ସମୟରେ ସଞ୍ଜିତଙ୍କ ମୃତଦେହ ପାଣି ଉପରକୁ ଉଠି ଭାସି ଆସି କୂଳରେ ଲାଗିଥିଲା । ଏହା ଦେଖି ସ୍ଥାନୀୟଲୋକେ ଅଗ୍ନିଶମ ବାହିନୀ ଏବଂ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରିଛି ଅଗ୍ନିଶମ ବାହିନୀ । ଯୋଡ଼ା ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏଥି ସହିତ ଘଟଣାର ତଦନ୍ତ ଆରମ୍ଭ କରିଛି ପୋଲିସ ।