କୋରାପୁଟ,୧୬/୫(ଆପ୍ର): ଆଜି ଦିନ ଦୁଇଟା ସମୟରେ କାଳବୈଶାଖୀ ପ୍ରଭାବରେ ବଜ୍ରାଘାତ ଘଟି ସୁନାବେଡ଼ା ଥାନା ଅଞ୍ଚଳ ସେମିଳିଗୁଡା ବ୍ଲକର ଚାରାଙ୍ଗୁଲ ଗ୍ରାମ ପଞ୍ଚାୟତର ଖାଲପାଡ଼ିର ଜଣେ ବ୍ୟକ୍ତିଙ୍କର ଶୋଚନୀୟ ମୃତ୍ୟୁ ଘଟିଛି।
ଘଟଣାରୁ ଜଣା ପଡ଼ିଛି ଯେ ଖାଲପାଡ଼ି ଗ୍ରାମର ଦାସ ଜାନି (୩୨) ନିଜ ପୁଅ ଓ ଗ୍ରାମର ଜଣେ ଯୁବକଙ୍କ ସହ ନିକଟସ୍ଥ ଲେଞ୍ଜିଗୁଡା ଗ୍ରାମର କେରାଣ୍ଡି ନଦୀକୁ ମାଛ ଧରିବାକୁ ଯାଇଥିଲେ। ଏହି ସମୟରେ ବର୍ଷା ଉଠାଇବାରୁ ପୁଅ ଯୁବକଙ୍କୁ ପଠାଇ ପଛରେ ଯାଉଚି ବୋଲି କହିଥିଲେ। ସେମାନେ ଚାଲିଯିବା ପରେ ପଛେପଛେ ଯାଉଥିବା ସମୟରେ ହଠାତ୍ ବଜ୍ରପାତ ହୋଇଥିଲା। ଏହି ବଜ୍ରାଘାତରେ ଘଟଣାସ୍ଥଳରେ ହିଁ ଦାସ ଟଳି ପଡ଼ିଥିଲେ।
ଖବର ପାଇ ସୁନାବେଡ଼ା ଥାନାରୁ ଏସଆଇ ଚରଣ ସିଂ ମାଝୀ ଘଟଣା ସ୍ଥଳରେ ପହଞ୍ଚି ଶବକୁ ବ୍ୟବଚ୍ଛେଦ ପାଇଁ ପଠାଇଥିବା ବେଳେ ଅପମୃତ୍ୟୁ ମାମଲା ରୁଜ୍ଜୁ କରି ତଦନ୍ତ କରୁଥିବା ଜଣା ଯାଇଛି। ମୃତକଙ୍କ ପରିବାରଙ୍କୁ ରେଡକ୍ରସ ପକ୍ଷରୁ ୧୦,୦୦୦ ଟଙ୍କା ପ୍ରଦାନ କରାଯିବାକୁ ବ୍ୟବସ୍ଥା କରାଯାଉଥିବା ବେଳେ ରିପୋର୍ଟ ଆସିବା ପରେ ସରକାରଙ୍କ ଅନୁକମ୍ପାମୂଳକ ସହାୟତା ରାଶି ଦିଆଯିବ ବୋଲି ଜଣା ପଡିଛି। ଏହି ଘଟଣାରେ ଉକ୍ତ ଦୁଇ ଗ୍ରାମରେ ଶୋକାକୁଳ ପରିସ୍ଥିତି ସୃଷ୍ଟି ହୋଇଛି।
