ଭୁବନେଶ୍ୱର,୨୫/୦୪: ରାଜ୍ୟର ୨୦୧୬ରୁ ୨୦୨୦ ମଧ୍ୟରେ ମ୍ୟାଲେରିଆ ସ୍ଥିତି ଉଦ୍ବେଗଜନକ ଥିଲା । ହେଲେ କରୋନା ପରେ ଏହା ତଳମୁହାଁ ହେବାରେ ଲାଗିଥିଲା । ୨୦୨୧ରେ ୨୫ ହଜାର ୫୨୫ ଜଣ ମ୍ୟାଲେରିଆରେ ଆକ୍ରାନ୍ତ ହୋଇଥିଲେ । ୨୦୨୨ରେ ଏହି ସଂଖ୍ୟା ଥିଲା ୨୩ ହଜାର ୭୭୦ । ମାତ୍ର ୨୦୨୩ରେ ୪୧ ହଜାର ୯୭୩ ରୋଗୀ ଚିହ୍ନଟ ହୋଇଥିବା ବେଳେ ୨୦୨୪ରେ ଏହି ସଂଖ୍ୟା ବଢ଼ି ୬୮ ହଜାର ୬୯୩ରେ ପହଞ୍ଚିଛି । ଆଜି ବିଶ୍ୱ ମ୍ୟାଲେରିଆ ଦିବସ ପାଳନ ହେଉଥିବାବେଳେ ରାଜ୍ୟରେ ମ୍ୟାଲେରିଆ ରୋଗୀଙ୍କ ସଂଖ୍ୟା ବଢ଼ିବାକୁ ନେଇ ଚିନ୍ତାପ୍ରକାଶ ପାଇଛି ।
ରିପୋର୍ଟ ଅନୁସାରେ, ମୋଟ ୨୩ଟି ଜିଲ୍ଲାରେ ଏବେ ମ୍ୟାଲେରିଆ ସକ୍ରିୟ ରହିଛି । ଗତ ୨ବର୍ଷ ହେବ ଆକ୍ରାନ୍ତଙ୍କ ସଂଖ୍ୟା ବଢ଼ିଚାଲିଛି ଯାହାକୁ ନେଇ ଚିନ୍ତା ପ୍ରକଟ କରିଛି ସ୍ୱାସ୍ଥ୍ୟ ବିଭାଗ । ଗତ ୯ ବର୍ଷରେ ରାଜ୍ୟରେ ୧୫୨ ଜଣଙ୍କର ମ୍ୟାଲେରିଆରେ ମୃତ୍ୟୁ ଘଟିଛି । ୨୦୧୬ରୁ ୨୦୨୪ ମସିହା ଡିସେମ୍ବର ପର୍ଯ୍ୟନ୍ତ ମୋଟ ୧୧ ଲକ୍ଷ ୨୬୯ ଜଣ ମ୍ୟାଲେରିଆରେ ପୀଡ଼ିତ ହୋଇଛନ୍ତି । ୨୦୧୬ରେ ରାଜ୍ୟରେ ରେକର୍ଡ ସଂଖ୍ୟକ ୪ଲକ୍ଷ ୪୪ ହଜାର ୮୪୨ ରୋଗୀଙ୍କୁ ସ୍ୱାସ୍ଥ୍ୟ ବିଭାଗ ଚିହ୍ନଟ କରିଥିଲା । ୨୦୧୭ରେ ୩ ଲକ୍ଷ ୪୭ ହଜାର ୮୬୦, ୨୦୧୮ରେ ୬୬ ହଜାର ୩୧୧, ୨୦୧୯ରେ ୩୯ ହଜାର ୫୫୬ ଓ ୨୦୨୦ରେ ୪୧ ହଜାର ୭୩୯ ଜଣ ରୋଗୀ ଚିହ୍ନଟ ହୋଇଥିଲେ ।
ତେବେ ୨୦୨୪-୨୫ରେ ବୌଦ୍ଧ, ଗଜପତି, କନ୍ଧମାଳ, କୋରାପୁଟ, କଳାହାଣ୍ଡି ଓ ରାୟଗଡ଼ାକୁ ଅଧିକ ମ୍ୟାଲେରିଆ ପ୍ରବଣ ଜିଲ୍ଲା ଭାବେ ଦର୍ଶାଯାଇଛି । ଗଲା ଦୁଇ ବର୍ଷ ହେବ ରାୟଗଡ଼ା ଓ ଗତବର୍ଷ କଳାହାଣ୍ଡି ଜିଲ୍ଲାରେ ମ୍ୟାଲେରିଆ କାୟା ବିସ୍ତାର କରିଛି । ୨୦୨୨ରେ ରାୟଗଡାରେ ସର୍ବାଧିକ ୪ହଜାର ୯୯୮ ମ୍ୟାଲେରିଆ ରୋଗୀ ଓ ୨୦୨୩ରେ ସର୍ବାଧିକ ୯ ହଜାର ୯୨୫ ରୋଗୀ ଚିହ୍ନଟ ହୋଇଥିଲେ। ଅନ୍ୟପକ୍ଷରେ ୨୦୨୪ରେ କଳାହାଣ୍ଡିରେ ସର୍ବାଧିକ ୧୪ ହଜାର ୩୯୯ ରୋଗୀ ଚିହ୍ନଟ କରିଥିଲା ସ୍ୱାସ୍ଥ୍ୟ ବିଭାଗ । ତେବେ ଆସନ୍ତା ୨୦୩୦ ସୁଦ୍ଧା ମ୍ୟାଲେରିଆ ମୁକ୍ତ ଓଡ଼ିଶା ପାଇଁ ଲକ୍ଷ୍ୟ ରଖାଯାଇଛି । ଏଥିପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ପଦକ୍ଷେପ ଗ୍ରହଣ କରୁଛନ୍ତି ।
ସେଥିପାଇଁ ଜାତୀୟ ମ୍ୟାଲେରିଆ ଦୂରୀକରଣ ଓ ଜାତୀୟ ପରିସଂଖ୍ୟାନ ଯୋଜନା(୨୦୨୩-୨୦୨୭) ଜାରି ରହିଛି । ଉପକୂଳର କେନ୍ଦ୍ରାପଡ଼ା, ଜଗତସିଂହପୁର, ଭଦ୍ରକ, ବାଲେଶ୍ୱର, ଖୋର୍ଦ୍ଧା, ପୁରୀ, କଟକ ଓ ଯାଜପୁର ଭଳି ୮ଟି ଜିଲ୍ଲାରେ ଏହି କାର୍ଯ୍ୟକ୍ରମ ଜାରିରହିଛି ।
ସ୍ୱାସ୍ଥ୍ୟ ବିଭାଗର ସୂଚନା ଅନୁଯାୟୀ, ୨୦୨୪- ୨୫ ମସିହାରେ ବୌଦ୍ଧ, ଗଜପତି, କନ୍ଧମାଳ, କୋରାପୁଟ, କଳାହାଣ୍ଡି ଓ ରାୟଗଡ଼ା ଜିଲ୍ଲାକୁ ୪୦ ଲକ୍ଷ ଔଷଧୀୟ ମଶାରି ପ୍ରଦାନ କରାଯାଇଛି । ସେହିପରି ବିଭାଗ ପକ୍ଷରୁ ମୋଟ ୪୮୯୦୫ ଆଶା, ୮୫୩ ତାଲିମପ୍ରାପ୍ତ ସ୍ୱେଚ୍ଛାସେବୀ ମ୍ୟାଲେରିଆ ଚିହ୍ନଟ ପାଇଁ ତୃଣମୂଳସ୍ତରରେ କାମ କରୁଛନ୍ତି । ସେହିପରି ମେଡିକାଲ କଲେଜ, ସମସ୍ତ ଜିଲ୍ଲା ହସ୍ପିଟାଲ, ଉପଖଣ୍ଡ ହସ୍ପିଟାଲ, ସିଏଚ୍ସିରେ ୬୬ଟି ମ୍ୟାଲେରିଆ ସେଣ୍ଟିନେଲ୍ ସାଇଟ୍ସ (ମ୍ୟାଲେରିଆ ନିରାକରଣ ପାଇଁ ସ୍ୱତନ୍ତ୍ର ସ୍ୱାସ୍ଥ୍ୟ ପ୍ରତିଷ୍ଠାନ) ପ୍ରତିଷ୍ଠା କରାଯାଇଛି । ପାଣିରେ ମଶାବଂଶ ରୋକିବାକୁ ରାଜ୍ୟରେ ମୋଟ ଲାର୍ଭା ଖାଉଥିବା ମାଛଙ୍କ ପାଇଁ ୧୯୩ଟି ଜଳାଶୟ ରହିଛି । ସେହିପରି ଆଦିବାସୀ ଜିଲ୍ଲାରେ ‘ଦୁର୍ଗମ ଅଞ୍ଚଳରେ ମ୍ୟାଲେରିଆ ନିରାକରଣ’ ଦମନ୍ କାର୍ଯ୍ୟକ୍ରମ ଚାଲୁଛି ।
