ନୂଆଦିଲ୍ଲୀ: ବିନା ଅନୁମତିରେ ରାଲି କରିବାକୁ ଚେଷ୍ଟା କରିଥିବାରୁ ଚେନ୍ନାଇରେ ଥିବା ସାମସଙ୍ଗ ଇଲେକଟ୍ରୋନିକ ଫ୍ୟାକ୍ଟ୍ରିର ୧୦୦ରୁ ଅଧିକ କର୍ମଚାରୀଙ୍କୁ ଅଟକ ରଖିଛି ପୋଲିସ । ଗତ ସପ୍ତାହରେ କାଞ୍ଚିପୁରମ ପ୍ଲାଣ୍ଟରେ ବିଭିନ୍ନ ଦାବି ନେଇ ଆନ୍ଦୋଳନ କରିଥିଲେ କର୍ମଚାରୀ । ଦରମା ବୃଦ୍ଧି ଏବଂ ଭଲ କାର୍ଯ୍ୟ ପରିବେଶ ଦାବି କରି ଏହି ଆନ୍ଦୋଳନ ହୋଇଥିଲା । ଏହା ସହ ସେମାନଙ୍କ ସଂଘକୁ ପଞ୍ଜିକୃତ କରିବା ଲାଗି ମଧ୍ୟ କର୍ମଚାରୀମାନେ ଦାବି କରିଥିଲେ ।
ସେପଟେ ଇଣ୍ଡିଆନ୍ ଟ୍ରେଡ୍ ୟୁନିୟନ୍ (ସିଆଇଟିୟୁ) ଅଧୀନରେ ଆସୁଥିବା କୌଣସି କର୍ମଚାରୀ ସଂଘକୁ ସ୍ବୀକୃତି ଦେବାକୁ ମନା କରିଦେଇଛି ସାମସଙ୍ଗ । କାର୍ଯ୍ୟରତ ୧୮୦୦ କର୍ମଚାରୀଙ୍କ ମଧ୍ୟରୁ ଏକ ହଜାରରୁ ଅଧିକ ଫ୍ୟାକ୍ଟ୍ରି ବାହାରେ ଟେଣ୍ଟ କରି ବିକ୍ଷୋଭ ଜାରି ରଖିଛନ୍ତି । କର୍ମଚାରୀଙ୍କ ସହ ଆଲୋଚନା ଜାରି ରହିଥିବା ବେଳେ ଖୁବଶୀଘ୍ର ସମସ୍ୟାର ସମଧାନ କରାଯିବ ବୋଲି କମ୍ପାନି ପକ୍ଷରୁ କୁହାଯାଇଛି ।
ସେପଟେ କମ୍ପାନି ଏବଂ ରାଜ୍ୟ ସରକାରଙ୍କ ସହ ଆଲୋଚନା ବିଫଳ ହେବା ପରେ କର୍ମଚାରୀମାନେ ସୋମବାର ଏକ ରାଲି କରିବାକୁ ଯୋଜନା କରିଥିଲେ । କିନ୍ତୁ ସେହି ଅଞ୍ଚଳରେ ସ୍କୁଲ ,କଲେଜ ଏବଂ ହସ୍ପିଟାଲ ଥିବାରୁ ରାଲି ପାଇଁ ପୋଲିସ ଅନୁମତି ଦେଇନଥିଲା । ଏପରିକି ପରେ ଆନ୍ଦୋଳନକାରୀଙ୍କୁ ଅଟକ ରଖିଛି ପୋଲିସ । ଏକ ବିବାହ ମଣ୍ଡପରେ ମୋଟ ୧୦୪ କର୍ମଚାରୀଙ୍କୁ ପୋଲିସ ଅଟକ ରଖିଥିବା ଜଣାପଡ଼ିଛି । ଏହାରି ମଧ୍ୟରେ ଡିଏମକେ ସମର୍ଥିକ ସଂଘ ସମେତ ୧୨ଟି କର୍ମଚାରୀ ସଂଘ ବୁଧବାର କର୍ମଚାରୀଙ୍କ ସମର୍ଥନରେ ବିକ୍ଷୋଭ ପ୍ରଦର୍ଶନ କରିବେ ବୋଲି ଜଣାପଡ଼ିଛି । ତେବେ ଏନେଇ ସାମସଙ୍ଗ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ ।
