ନୂଆଦିଲ୍ଲୀ ୧୨/୦୪: ଅଷ୍ଟ୍ରେଲିଆର ଏକ ପ୍ରମୁଖ ଆଇଭିଏଫ୍ କ୍ଲିନିକ୍ରେ ଭ୍ରୂଣ ବଦଳ ଘଟଣା ସାମ୍ନାକୁ ଆସିଛି । ଏହି କ୍ଲିନିକ୍ ଭୁଲବଶତଃ ଜଣେ ମହିଳାଙ୍କୁ ଅନ୍ୟ ଜଣେ ଦମ୍ପତିଙ୍କର ଭ୍ରୂଣ ପ୍ରଦାନ କରିଛି, ଯାହାର ପରିମାଣ ସ୍ୱରୂପ ମହିଳା ଜଣଙ୍କ ଅପରିଚିତ ଦମ୍ପତିଙ୍କ ଶିଶୁକୁ ଜନ୍ମ ଦେଇଛନ୍ତି । ଏହି ଭୁଲ ପାଇଁ କ୍ଲିନିକ୍ କ୍ଷମା ପ୍ରାର୍ଥନା କରିଛି ଏବଂ ଏଥିପାଇଁ ମାନବୀୟ ତ୍ରୁଟିକୁ ଦାୟୀ କରିଛି ।
‘ମୋନାଶ ଆଇଭିଏଫ୍’ ସମଗ୍ର ଅଷ୍ଟ୍ରେଲିଆରେ ୧୦୦ରୁ ଅଧିକ କ୍ଲିନିକ୍ ଚଳାଉଛି । ଏକ ବୟାନରେ କ୍ଲିନିକ୍ କହିଛି, କର୍ମଚାରୀ ଏହି ତ୍ରୁଟି ପାଇଁ ହତଚକିତ । ଦେଶରେ ଏ ପ୍ରକାର ଘଟଣା ପ୍ରଥମ । ଏହାର ସିଇଓ ମାଇକେଲ କ୍ନାପ୍ କହିଛନ୍ତି, ମୋନାଶ ଆଇଭିଏଫ୍ ତରଫରୁ ଯାହା ଘଟିଛି ସେଥିପାଇଁ ମୁଁ ବାସ୍ତବରେ ଅତ୍ୟନ୍ତ ଦୁଃଖିତ । ଏଭଳି ଏକ କଷ୍ଟଦାୟକ ସମୟରେ ଆମେ ରୋଗୀଙ୍କୁ ସମର୍ଥନ ଜାରି ରଖିବୁ ।
ତେବେ ଦମ୍ପତିଙ୍କ ଗୋପନୀୟତାକୁ ସମ୍ମାନ ଦେଇ କ୍ଲିନିକ୍ ସେମାନଙ୍କ ନାଁ କହିନାହିଁ କିମ୍ବା ଶିଶୁ କେବେ ଜନ୍ମ ହେଲା ଏବଂ କାହା ହେପାଜତରେ ଅଛି, ତା’ର ବି ଉତ୍ତର ଦେଇନାହିଁ । କ୍ୱିନ୍ସଲାଣ୍ଡ୍ର ବ୍ରିସ୍ବେନ ସ୍ଥିତ ମୋନାଶ ଆଇଭିଏଫ୍ କ୍ଲିନିକ୍ରେ ଏହି ତ୍ରୁଟି ଘଟିଛି । ଏଠାରେ ଆଇନ ଜନ୍ମଦାତ୍ରୀ ମା’ ଓ ତାଙ୍କ ସାଥୀଙ୍କୁ ସନ୍ତାନର ବୈଧ ମାତାପିତା ଭାବେ ମାନ୍ୟତା ଦିଏ । ଏହି ତ୍ରୁଟିକୁ କ୍ଲିନିକ୍ ଆବିଷ୍କାର କରିବା ପୂର୍ବରୁ ଭ୍ରୂଣ ବଦଳ ହୋଇଥିବାର ସନ୍ଦେହ କିଏ କଲା ତାହା ଅଦ୍ୟାବଧି ସ୍ପଷ୍ଟ ହୋଇନାହିଁ ।
ୟୁନିଭର୍ସିଟି ଅଫ୍ ମେଲବର୍ନର କ୍ଲିନିକାଲ ଆସୋସିଏଟ୍ ପ୍ରଫେସର ତଥା ମେଲ୍ବର୍ନର ରୟାଲ ୱିମେନ୍ସ ହସ୍ପିଟାଲର ଫର୍ଟିଲିଟି କନ୍ସଲଟାଣ୍ଟ୍ ଆଲେକ୍ସ ପଲିଆକୋଭ୍ କହିଛନ୍ତି, ଅଷ୍ଟ୍ରେଲିଆରେ ଆଇଭିଏଫ୍ର ୪ ଦଶନ୍ଧିରେ ଏହା ପ୍ରଥମ ଘଟଣା । ସନ୍ତାନ ଜନ୍ମ ଦେଇଥିବା ମାତାପିତା ସେମାନଙ୍କର ବଳକା ଭ୍ରୂଣକୁ ଅନ୍ୟ ଏକ ଆଇଭିଏଫ୍ ପ୍ରଦାନକାରୀକୁ ସ୍ଥାନାନ୍ତର ପାଇଁ ଅନୁରୋଧ କରିବା ପରେ ଏହି ତ୍ରୁଟି ଗତ ଫେବ୍ରୁଆରୀରେ ସାମ୍ନାକୁ ଆସିଲା । ଭ୍ରୂଣ ଗଚ୍ଛିତ ରଖାଯାଉଥିବା ଭଣ୍ଡାର ଡବାରେ ଏକ ଅତିରିକ୍ତ ଭ୍ରୂଣ ମିଳିବା ପରେ ଆଭ୍ୟନ୍ତରୀଣ ଯାଞ୍ଚ୍ ଚାଲିଲା । ତା’ପରେ ଦମ୍ପତିଙ୍କୁ ଭୁଲ ଭ୍ରୂଣ ଦିଆଯାଇଥିବା ଜଣାପଡ଼ିଲା ।
ଏହି ତ୍ରୁଟି କେମିତି ହେଲା, ତାହା ସ୍ପଷ୍ଟ ହୋଇନାହିଁ । କିନ୍ତୁ ମୋନାଶ ଆଇଭିଏଫ୍ର ବୟାନ ଅନୁସାରେ, ଆଉ ଜଣେ ରୋଗୀଙ୍କ ଭ୍ରୂଣକୁ ଭୁଲବଶତଃ ଜନ୍ମଦାତା ମାତାପିତାଙ୍କୁ ଦିଆଯାଇଥିଲା । ତେବେ ଏହା ଏକମାତ୍ର ଘଟଣା ବୋଲି କମ୍ପାନି ଦାବି କରିଛି । ସମାନ ଘଟଣା ଆମେରିକାରେ ଘଟିଛି । ଏକ ସଦ୍ୟ ମାମଲାରେ ଜଣେ ଶ୍ୱେତ ମହିଳା ଏକ ଅଶ୍ୱେତ ଶିଶୁକୁ ଜନ୍ମ ଦେବା ପରେ ତାଙ୍କୁ ଭୁଲ ଭ୍ରୂଣ ଦିଆଯାଇଥିବା ସେ ଆବିଷ୍କାର କଲେ ।
