ନୂଆଦିଲ୍ଲୀ,୧୧/୦୪: ଚୀନ୍ ତାର ନାଗରିକମାନଙ୍କୁ ଘରେ ରହିବାକୁ ପରାମର୍ଶ ଦେଇଛି। ଉତ୍ତର ଚୀନରେ ପ୍ରବଳ ପବନ ବହିବା ଯୋଗୁଁ ଏହି ପରାମର୍ଶ ଜାରି କରାଯାଇଛି। ଏଥି ସହିତ, ଉତ୍ତର ଚୀନର ଅନେକ ରାଜ୍ୟରେ ସ୍କୁଲ ଏବଂ କଲେଜରେ ପାଠପଢ଼ାକୁ ସ୍ଥଗିତ ରଖାଯାଇଛି। ଏହା ବ୍ୟତୀତ ଖୋଲା ଆକାଶ ତଳେ ହେଉଥିବା ସମସ୍ତ କାର୍ଯ୍ୟକ୍ରମକୁ ମଧ୍ୟ ବାତିଲ କରାଯାଇଛି। ସରକାର କହିଛନ୍ତି ଯେ ପବନର ବେଗ ଏତେ ଦ୍ରୁତ ହୋଇପାରେ ଯେ ଏହା ଜଣେ ହାଲୁକା ବ୍ୟକ୍ତିକୁ ଉଡ଼ାଇ ନେଇପାରେ। ଚୀନରେ ଝଡ଼ ଯୋଗୁଁ ଅନେକ ଟ୍ରେନ୍ ଏବଂ ବିମାନ ଚଳାଚଳ ମଧ୍ୟ ବାତିଲ କରାଯାଇଛି।
ବେଜିଂ ପ୍ରମୁଖ କ୍ରୀଡ଼ା ଇଭେଣ୍ଟଗୁଡ଼ିକୁ ସ୍ଥଗିତ ରଖିଛି। ପାର୍କଗୁଡ଼ିକୁ ବନ୍ଦ କରିଦିଆଯାଇଛି। ଡଜନ ଡଜନ ଟ୍ରେନ ସେବାକୁ ସ୍ଥଗିତ ରଖିଛି ଏବଂ ଏହାର ୨୨ ନିୟୁତ ବାସିନ୍ଦାଙ୍କୁ ଅନାବଶ୍ୟକୀୟ ଯାତ୍ରା ବିରୁଦ୍ଧରେ ଚେତାବନୀ ଦେଇଛି। ବିମାନ ବାତିଲ କରାଯାଇଥିଲା। ସରକାରୀ ଖବର ଏଜେନ୍ସି ଜିନହୁଆ ରିପୋର୍ଟ କରିଛି ଯେ ପବନ ଘଣ୍ଟା ପ୍ରତି ୧୫୦ କିମି ବେଗରେ ବହିବ। ରିପୋର୍ଟ ଅନୁଯାୟୀ, ମାନହୋଲିଆରୁ ପ୍ରବାହିତ ଥଣ୍ଡା ପବନ ଶୁକ୍ରବାର ଅପରାହ୍ନରୁ ରବିବାର ପର୍ଯ୍ୟନ୍ତ ଚୀନର ଅନେକ ପ୍ରଦେଶରେ ନିଜର ପ୍ରଭାବ ଦେଖାଇପାରେ।
ବିବିସି ରିପୋର୍ଟ ଅନୁଯାୟୀ, ଲକ୍ଷ ଲକ୍ଷ ଲୋକଙ୍କୁ ଘର ଭିତରେ ରହିବାକୁ ଅପିଲ୍ କରାଯାଇଛି। ଚୀନର ସରକାରୀ ଗଣମାଧ୍ୟମ ସତର୍କ କରାଇ ଦେଇଛି ଯେ ପବନ ଏତେ ପ୍ରବଳ ହୋଇପାରେ ଯେ ୫୦ କିଲୋଗ୍ରାମରୁ କମ୍ ଓଜନର ଲୋକମାନେ "ସହଜରେ ଉଡ଼ି ଯାଇପାରନ୍ତି"। ଶୁକ୍ରବାରରୁ ରବିବାର ପର୍ଯ୍ୟନ୍ତ ବେଜିଂ, ତିଆନଜିନ୍ ଏବଂ ହେବେଇ ଅଞ୍ଚଳର ଅନ୍ୟାନ୍ୟ ସ୍ଥାନରେ ଘଣ୍ଟା ପ୍ରତି ୧୫୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି। ଦଶନ୍ଧି ମଧ୍ୟରେ ଏହା ପ୍ରଥମ ଥର ଘଟୁଛି, ଯେବେ ଚୀନ୍ ଟାଇଫୁନ୍ ପାଇଁ ଅରେଞ୍ଜ ଆଲର୍ଟ ଜାରି କରିଛି।
ଚୀନ୍ ଅଧିକାରୀମାନେ କହିଛନ୍ତି ଯେ ଶନିବାର ଦିନ ପ୍ରବଳ ପବନ ବହିବା ସମୟରେ ବେଜିଂରେ ୨୪ ଘଣ୍ଟା ମଧ୍ୟରେ ତାପମାତ୍ରା ୧୩ ଡିଗ୍ରୀ ସେଲସିୟସ୍ ହ୍ରାସ ପାଇବ। ସେହି ସମୟରେ, ପାଣିପାଗ ବିଜ୍ଞାନୀମାନେ ସତର୍କ କରାଇ ଦେଇଛନ୍ତି ଯେ ପବନର ବେଗ ୧୯୫୧ ମସିହାର ଏପ୍ରିଲ ରେକର୍ଡ ସହିତ ସମାନ କିମ୍ବା ଅତିକ୍ରମ କରିପାରେ। ମଙ୍ଗୋଲିଆରୁ ବାଲି ଏବଂ ଧୂଳି ନେଇ ମାଡ଼ି ଆସୁଥିବା ପ୍ରବଳ ପବନ ବର୍ଷର ଏହି ସମୟରେ ସାଧାରଣ କଥା, କିନ୍ତୁ ଜଳବାୟୁ ପରିବର୍ତ୍ତନ ପାଣିପାଗ ଘଟଣାଗୁଡ଼ିକୁ ଆହୁରି ତୀବ୍ର କରିଛି।
