ଆନନ୍ଦପୁର, ୨।୯ : ରାତିରେ ଘରୁ ଘୋଷାଡି ନେଇ ମହିଳାଙ୍କୁ ହାଣି ବିଭତ୍ସ ହତ୍ୟା  କରାଯାଇଛି ।  ଆନନ୍ଦପୁର ଉପଖଣ୍ଡ ଘସିପୁରା ଥାନା ନିଆଳିଝରଣ ଗାଁରେ ରବିବାର ବିଳମ୍ବିତ ରାତିରେ ଏଭଳି ଏକ ଲୋମହର୍ଷଣକାରୀ  ହତ୍ୟାକାଣ୍ଡ ଘଟିଛି ।  ମୃତା ମହିଳା ଜଣକ ହେଲେ ମୋହନ ହେମ୍ବ୍ରମଙ୍କ ପତ୍ନୀ  ସାଲକେ ହେମ୍ବ୍ରମ  । 

ରବିବାର ରାତିରେ ଗାଁରେ ଯାତ୍ରା ପାଇଁ ସାମୂହିକ  ଭୋଜି ହୋଇଥିଲା।  ଭୋଜି ଖାଇବାକୁ ସ୍ବାମୀ ମୋହନ ସମେତ ଘରର ଅନ୍ଯ ସଦସ୍ଯମାନେ ଯାଇଥିଲେ । ଘରେ ସାଲକେ ଓ ଶାଶୂ ସୁମି ଘରେ ରହିଥିଲେ ।  ଏହି ସମୟରେ ଏକ ଅଚିହ୍ନା ବ୍ଯକ୍ତି ଘରକୁ ଆସି ସାଲକେଙ୍କୁ  ହାଣ୍ଡିଆ କିଣି ଆଣି ଦେବାକୁ କହିଥିଲେ । ହେଲେ ସାଲକେ ମନା କରିବାରୁ ତାଙ୍କୁ ଘରୁ ପଦାକୁ ଘୋଷାଡି ନେଇ ଘର ସାମ୍ନାରେ ହତ୍ଯା କରିଥିବା ଶାଶୁ ସୁମି କହିଛନ୍ତି । ତେବେ ଏ ସମ୍ପର୍କରେ  ପରିବାର କିମ୍ବା ମୃତକଙ୍କ ସ୍ବାମୀଙ୍କ ତରଫରୁ ପୋଲିସକୁ କେହି ଜଣାଇ ନ ଥିଲେ ।  ମୃତକଙ୍କ ଭାଇ ଘନଶ୍ଯାମ ଖଦୁପଦା ଗାଁରୁ ଆସି ଘସିପୁରା ପୋଲିସକୁ ଖବର କରିଥିଲେ । ଯାହାକି ସନ୍ଦେହ ସୃଷ୍ଟି କରିଛି । ଆନନ୍ଦପୁର ଏସଡିପିଓଙ୍କ ନେତୃତ୍ବରେ ପୋଲିସ୍  ଟିମ୍ ଗାଁରେ ପହଁଞ୍ଚି ତଦନ୍ତ  ଆରମ୍ଭ  କରିଛି । ସାଇଣ୍ଟିଫିକ୍ ଟିମ୍ ମଧ୍ଯ ଘଟଣା ସ୍ଥଳରେ ପହଁଞ୍ଚି ତଦନ୍ତ ଚଳାଇଛି ।  ତେବେ ଗାଁରେ କେହି ଘଟଣା ସମ୍ପର୍କରେ ମୁହଁ ଖୋଲୁନଥିବାରୁ ଡାହାଣୀ ସନ୍ଦେହ ହତ୍ଯାକାଣ୍ଡ ହୋଇଥାଇପାରେ ବୋଲି ଅନୁମାନ  କରାଯାଉଛି ।