ଭୁବନେଶ୍ୱର, ୧୧/୧୦ : ବୁଧବାର ରାଜ୍ୟ ସରକାରଙ୍କ ପକ୍ଷରୁ ତିନିଟି ବିଜ୍ଞପ୍ତି ପ୍ରକାଶ ପାଇଥିଲା। ସେଥିମଧ୍ୟରେ ପ୍ରଥମଟି ବିଦ୍ୟାଳୟ ଓ ଗଣଶିକ୍ଷା ବିଭାଗ ଅଧୀନରେ ନୂତନ ଭାବେ ସୃଷ୍ଟି ହୋଇଥିବା ଲିଭ୍ ଟ୍ରେନିଂ ରିଜର୍ଭ (ଏଲଟିଆର୍) ଶିକ୍ଷକ ପୋଷ୍ଟ ପାଇଁ ଓଡ଼ିଶା କର୍ମଚାରୀ ଚୟନ ଆୟୋଗ(ଓଏସ୍ଏସସି) ତରଫରୁ ବିଜ୍ଞପ୍ତି ଜାରି କରାଯାଇଥିଲା। ସେହିପରି ଅନ୍ୟଟି ଉଚ୍ଚଶିକ୍ଷା ବିଭାଗ ପକ୍ଷରୁ ବେସରକାରୀ ଯୁକ୍ତଦୁଇ କଲେଜ(୪୮୮ବର୍ଗ)ରେ ନିଯୁକ୍ତି ପାଇଁ ସ୍ନାତକୋତ୍ତର(ପିଜିଟି) ଶିକ୍ଷକ ପରୀକ୍ଷା ସଂପର୍କିତ ବିଜ୍ଞପ୍ତି ଓ ମହିଳା ଓ ଶିଶୁ ବିଭାଗ ପକ୍ଷରୁ ଜିଲ୍ଲା ସମାଜ ମଙ୍ଗଳ ଅଧିକାରୀ ସମ୍ମିଳନୀ ପାଇଁ ମଧ୍ୟ ବିଜ୍ଞପ୍ତି ତଥା ଚିଠି ପ୍ରକାଶ ପାଇଥିଲା । ବଡ଼କଥା ହେଉଛି, ଏସବୁ ବିଜ୍ଞପ୍ତି ତଥା ଚିଠିଗୁଡ଼ିକ ଇଂରାଜୀରେ ଥିଲା । ନୂଆ ସରକାରଙ୍କ ନିର୍ଦ୍ଦେଶ ରହିଛି, ଯେ କୌଣସି ସରକାରୀ ବିଜ୍ଞପ୍ତି କିମ୍ବା ଚିଠି ପ୍ରସ୍ତୁତ ହେବ ତାହା ଉଭୟ ଓଡ଼ିଆ ଓ ଇଂରାଜୀ ଭାଷାରେ ପ୍ରକାଶ ହେବ । ଯଦ୍ୱାରା ସାଧାରଣ ଲୋକଟିଏ ସରକାରଙ୍କ ନିର୍ଦ୍ଦେଶକୁ ପଢ଼ିପାରିବ।
ନୂତନ ସରକାର ଆରମ୍ଭରୁ ଓଡ଼ିଆ ଭାଷାକୁ ଗୁରୁତ୍ୱ ଦେଉଛନ୍ତି । ସେଥିପଇଁ ମୁଖ୍ୟମନ୍ତ୍ରୀ ଦାୟିତ୍ୱ ଗ୍ରହଣ କରୁକରୁ ସବୁ ସରକାରୀ ଫାଇଲ କାମ ଓଡ଼ିଆରେ କରିବାକୁ ନିର୍ଦ୍ଦେଶ ଦେଇଥିଲେ । ସେହିପରି ଲୋକଙ୍କ ଅଭିଯୋଗ ସଂକ୍ରାନ୍ତୀୟ ଚିଠିକୁ ମଧ୍ୟ ଓଡ଼ିଆରେ କରିବାକୁ କୁହାଗଲା । କେବଳ ଆବଶ୍ୟକ ସ୍ଥଳେ ଇଂରାଜୀ ବ୍ୟବହାର କରାଯିବ ବୋଲି ନିୟମ ରହିଛି । ଏବେ ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗର ବିଭିନ୍ନ ଚିଠି ଓ ବିଜ୍ଞପ୍ତି ଓଡ଼ିଆରେ ପ୍ରକାଶ ପାଉଛି । ସେହିପରି ସ୍କୁଲ ଓ ଗଣଶିକ୍ଷା ବିଭାଗର ଚିଠି ଉଭୟ ଇଂରାଜୀ ଓ ଓଡ଼ିଆରେ ଆସୁଛି। ବୁଧବାର ‘ସହିଦ ମାଧୋ ସିଂ ହାତ ଖର୍ଚ୍ଚ ଯୋଜନାର ଗାଇଡ୍ଲାଇନ୍’ ଉଭୟ ଇଂରାଜୀ ଓ ଓଡ଼ିଆ ଭାଷାରେ ଆସିଥିଲା। ହେଲେ ବିଭିନ୍ନ ନିଯୁକ୍ତିଭିତ୍ତିକ ପରୀକ୍ଷା ପାଇଁ ଆସୁଥିବା ବିଜ୍ଞପ୍ତି ଇଂରାଜୀରେ ଆସୁଛି। ଯାହାକୁ ନେଇ ଅସନ୍ତୋଷ ପ୍ରକାଶ କରୁଛନ୍ତି ଗ୍ରାମାଞ୍ଚଳରେ ଥିବା ଆଶାୟୀ ଛାତ୍ରଛାତ୍ରୀ।
ଓଡ଼ିଶାରେ ହେଉଥିବା ବିଭିନ୍ନ ସରକାରୀ ପରୀକ୍ଷା ପାଇଁ ପ୍ରକାଶିତ ବିଜ୍ଞପ୍ତିକୁ ଇଂରାଜୀ ସହ ଓଡ଼ିଆରେ ଛପାଗଲେ ଏହାକୁ ସମସ୍ତେ ବୁଝିପାରନ୍ତେ । କେବଳ ସେତିକିନୁହେଁ, ଅନ୍ୟ ବିଭାଗର ଚିଠିପତ୍ର ମଧ୍ୟ ଇଂରାଜୀରେ ଆସୁଛି । ପ୍ରତିଦିନ ଇ-ଡେସ୍ପାଚ୍ରେ ବହୁ ବିଭାଗର ଚିଠି ଇଂରାଜୀରେ ଆସୁଛି । ଏଭଳି ସ୍ଥିତିରେ ଓଡ଼ିଆ ଭାଷାରେ ଚିଠିପତ୍ର କରିବାର ସରକାରଙ୍କ ଯେଉଁ ନିର୍ଦ୍ଦେଶ ରହିଛି ତାକୁ ବେଖାତିର କରାଯାଉଛି ବୋଲି ସାଧାରଣରେ ଆଲୋଚ୍ୟର ବିଷୟ ପାଲଟିଛି ।
