ନୀଳଗିରି,୨୬/୦୯: ଦୁଇ ଦିନଧରି ଲଗାଣ ବର୍ଷା କାରଣରୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି । ବିଭିନ୍ନ ନଦୀରେ ଜଳସ୍ତର ବୃଦ୍ଧି ହୋଇଥିବା ବେଳେ ଆଦିବାସୀ ବହୁଳ ଅଞ୍ଚଳରେ ଥିବା ଚାଳଛପର ଭୁଶୁଡି ପଡିଛି । ଫଳରେ ବାସହୀନ ହୋଇପଡ଼ିଛନ୍ତି ଉମେଶ ସିଂ ଏବଂ ତାଙ୍କ ପରିବାର । ବାଲେଶ୍ୱର ଜିଲ୍ଲା ନୀଳଗିରି ବ୍ଲକ ଧୋବଶିଳା ପଞ୍ଚାୟତ ଚଲଣାପାଳ ଗ୍ରାମରେ ଏଭଳି ଦୃଶ୍ୟ ଦେଖିବାକୁ ମିଳିଛି । 

ସୂଚନା ମୁତାବକ, ଚଲଣାପାଳ ଗ୍ରାମର ଉମେଶ ସିଂ ଏକ ଚାଳ ଛପର ତଳେ ରହୁଥିଲେ । ଲଗାଣ ବର୍ଷା କାରଣରୁ ଛପର ଭିତରେ ପାଣି ଗଳି କାନ୍ଥ ଭାଙ୍ଗିବାରୁ ଚାଳ ଛପରଟି ଗଳି ପଡିଛି । ଏହି କାରଣରୁ ସ୍ତ୍ରୀ ସହ କୁନିକୁନି ପିଲାଙ୍କୁ ଧରି ଏବେ ସେ ଅସହାୟ ପଡିଛନ୍ତି। ଏବେ ପିଲାଛୁଆଙ୍କୁ ଧରି କୁଆଡେ ମୁଣ୍ଡ ଗୁଞ୍ଜିବେ, ସେନେଇ ଉମେଶ ଚିନ୍ତାରେ ପଡିଛନ୍ତି । ଘରେ ରୋଷେଇ ମଧ୍ୟ ବନ୍ଦ ହୋଇପଡିଥିବା ବେଳେ ଭୋକ ଓପବାସରେ ରହିବା ଛଡା ତାଙ୍କ ପାଖରେ କିଛି ଉପାୟ ନାହିଁ । ତାଙ୍କୁ ଖୁବଶୀଘ୍ର ସରକାରୀ ସହାୟତା ପ୍ରଦାନ କରିବାକୁ ସେ ନିବେଦନ କରିଛନ୍ତି।