ନୀଳଗିରି,୨୫/୯(ଆ.ପ୍ର): ନୀଳଗିରି ବ୍ଲକ ବଣସୀମା ଅଞ୍ଚଳରେ ଏବେ ହାତୀ ଉପଦ୍ରବ ବୃଦ୍ଧି ପାଉଛି। ଏକର ଏକର ଧାନ ଫସଲକୁ ପାଦ ତଳେ ଦଳିମକଚି ନଷ୍ଟ କରୁଛନ୍ତି ହାତୀପଲ।ବାରମ୍ବାର ଅଭିଯୋଗ ପରେ ବନବିଭାଗ ପକ୍ଷରୁ କୌଣସି  ପଦକ୍ଷେପ ନିଆଯାଇ ନ  ଥିବାରୁ   ଆନ୍ଦୋଳନ ଚେତାବନୀ ଦେଇଛନ୍ତି ଚାଷୀ।

ସୂଚନାଯୋଗ୍ୟ ନୀଳଗିରି ବ୍ଲକ ବରହମପୁର ଅଞ୍ଚଳର ଅଁଳାପାଳ, ବେତନାଳିଆ ଅଞ୍ଚଳରେ ପ୍ରତିଦିନ ଅପରାହ୍ନ ୪ଟା ସମୟରେ ହାତୀପଲ ପାଖ ଜଙ୍ଗଲରୁ କିଛି ହାତୀପଲ ଧାନକ୍ଷେତକୁ ଆସି ଉପଦ୍ରଵ କରୁଛନ୍ତି।ଚଳିତ ବର୍ଷ ସ୍ୱଳ୍ପବୃଷ୍ଟି କାରଣରୁ ଚାଷୀମାନେ ବହୁ କଷ୍ଟରେ ଧାନ ଫସଲ କରିଛନ୍ତି। ହାତୀ ଉପଦ୍ରବ ଯୋଗୁଁ ସ୍ଥାନୀୟ ଚାଷୀ ମୁଣ୍ଡରେ ହାତ ଦେଇ ବସିଛନ୍ତି।ଧାନକ୍ଷେତକୁ ପାଦତଳେ ଦଳି ମକଚି ଦେଇଥିବା ବେଳେ ଏଥିପ୍ରତି ବନବିଭାଗ ହାତୀ ଉପଦ୍ରଵ ରୋକିବା ପାଇଁ ଟ୍ରେଞ୍ଜ କିମ୍ବା ସୋଲାର ଫେନ୍ସି କାର୍ଯ୍ୟକ୍ଷମ କରାଉନଥିବାରୁ ଆଜି ଏଭଳି ଦୁରବସ୍ଥା ଉପୁଜିଥିବା ଅଭିଯୋଗ ଉଠିଛି। ଯଦି ବନବିଭାଗ ପ୍ରତିକାର ଖୁବଶୀଘ୍ର ନକରେ ତାହେଲେ ଆଗାମୀ ଦିନରେ ସମସ୍ତ ଚାଷୀ ରାଜରାସ୍ତାକୁ ଓହ୍ଲାଇବେ ବୋଲି ଚାଷୀ ନେତା ଚନ୍ଦନ କୁମାର ରାଉତ, ପୁରୁଷୋତ୍ତମ ସାହୁ  ସୂଚନା ଦେଇଛନ୍ତି।