ନୂଆଦିଲ୍ଲୀ: ପଶ୍ଚିମବଙ୍ଗର ମୁର୍ଶିଦାବାଦ ଜିଲ୍ଲାରେ ଶୁକ୍ରବାର ଦିନ ନିମଟିଟା ରେଳ ଷ୍ଟେସନରେ ଏକ ହିଂସାତ୍ମକ ଘଟଣା ଘଟିଛି। ଏକ ଉତ୍ତ୍ୟକ୍ତ ଲୋକମାନଙ୍କ ଦଳ ଷ୍ଟେସନରେ ଅଟକି ରହିଥିବା ଟ୍ରେନ ଉପରେ ପଥର ଫିଙ୍ଗା ଫୋପାଡ଼ିବା ସହ ଷ୍ଟେସନର ବ୍ୟାପକ ଭଙ୍ଗାରୁଜା କରିଛନ୍ତି। ଏହି ହିଂସାରେ ୭ରୁ ୧୦ ଜଣ ପୁଲିସ କର୍ମଚାରୀ ଆହତ ହୋଇଛନ୍ତି। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ସୀମା ସୁରକ୍ଷା ବଳ (BSF) ଯବାନଙ୍କୁ ଘଟଣାସ୍ଥଳରେ ମୃତୟନ କରାଯାଇଛି।

ଏହି ଘଟଣା ଯୋଗୁଁ ଅନ୍ୟୁନ ୨ଟି ଟ୍ରେନ ବାତିଲ ହୋଇଛି ଓ ୫ଟି ଟ୍ରେନର ମାର୍ଗ ପରିବର୍ତ୍ତନ କରାଯାଇଛି। କିଛି ଯାତ୍ରୀ ମଧ୍ୟ ଏହି ଆକ୍ରମଣରେ ଆହତ ହୋଇଥିବା ଜଣାପଡ଼ିଛି। ସ୍ଥାନୀୟ ସୂତ୍ର ଅନୁଯାୟୀ, ଏହି ହିଂସା ଓ୍ଵାକଫ (ସଂଶୋଧନ) ଆଇନ ୨୦୨୫ ବିରୁଦ୍ଧରେ ଚାଲିଥିବା ବିକ୍ଷୋଭ ସହ ଜଡ଼ିତ ବୋଲି ଜଣାପଡିଛି। ଯାହା ଗତ ମଙ୍ଗଳବାର ଦିନଠାରୁ ଆରମ୍ଭ ହୋଇଥିଲା।

ଏହା ପୂର୍ବରୁ ମଙ୍ଗଳବାର ଦିନ ମୁର୍ଶିଦାବାଦରେ ଓ୍ଵାକଫ ଆଇନ ବିରୋଧରେ ଏକ ବିକ୍ଷୋଭ ହିଂସାତ୍ମକ ହୋଇପଡ଼ିଥିଲା। ବିକ୍ଷୋଭକାରୀମାନେ ପୁଲିସ ସହ ସଂଘର୍ଷ କରିବା ସହ କିଛି ଗାଡ଼ିରେ ନିଆଁ ଲଗାଇ ଜାଳିଦେଇଥିଲେ। ରାଜ୍ୟପାଳ ସିଭି ଆନନ୍ଦ ବୋଷ ହିଂସାରେ ଜଡ଼ିତ ବ୍ୟକ୍ତିଙ୍କୁ କଡ଼ା ଚେତାବନୀ ଦେଇ ରାଜ୍ୟ ସରକାରଙ୍କୁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି।

ପରିସ୍ଥିତି ଏବେ ନିୟନ୍ତ୍ରଣାଧୀନ ଥିବା ଜଣାପଡ଼ିଛି। କିନ୍ତୁ ସ୍ଥାନୀୟ ଅଞ୍ଚଳରେ ଉତ୍ତେଜନା ଲାଗି ରହିଛି। ପୁଲିସର ବରିଷ୍ଠ ଅଧିକାରୀମାନେ ଘଟଣାର ତଦନ୍ତ ଆରମ୍ଭ କରିଦେଇଛନ୍ତି।